Read bura-pabir 2 Samiwal 14 Bible Online

2 Samiwal 14 - bura-pabir bible

2 Samiwal 14

¹Sakatə Yowab na ɓzər Zeruwiya ku nggaɓəla abbər ɗəffa Kuthli Dauda ku ngka adzə Absalom ka duna,

²antə tsa ku thlentə ka kəga mwala laga na ɗəɗu ahar Tekowa. Sakatə tsa ku si, Yowab pəla alari, “Namta apa ga akwa tuwa mshi, ka gə hata zhaɓər tuwa, tsuwa ga aɗiya kəkər mal wa, amma ka gə hara apa mwala na ku fəi akwa tuwa mshi.

³Antə ka gə mwari adzə kuthli ka gə pəla alari su tə I ata pəla ala ga.” Apani Yowab ku pəla alari su tə ka tsa sə pəla aka kuthli.

⁴Mwala Tekowa ni ku təra mwari adzə kuthli antə tsa ku zuzuri ka dləri kəmari ata di akəma kuthli ka nar səli ka pəla, “Ka gə dlar ra ka barkar nga!”

⁵Antə kuthli ku yu ni, “Ga ata bara mə ri?” Antə tsa pəla, “I mwala kughung zanuwa, salngkəya ku mti.

⁶Zanuwa, I ka maɗashili suɗa, antə vir laga da ku mpa ka nvwa ni akwa faku, tə mda aɗi anda ka mbuləmta ɗa wa, antə dukwa da ku tsa nvwa ni ka tsi ni.

⁷Antə kulini shanga yangkuri ku pungkərdzi ali abbər tar kəi hamta ala ɗa ɓzərna na mbil duku ni ka da tsi ni kamnyar tə tsa ku tsi ɓzərma'ni. Apani antə da ata shamta mdər fa kifa na mbil duku ata tsi, kəi shar kəm ka dəla, antə da ata hartə nyarmbwar salngkəya.”

⁸Antə kuthli pəla alari, “Thlatə ka ra ləha, antə I ata kuri wujir ngəni.”

⁹Antə mwala ni pəla, “Ka barkar nga, kəlara su tə gə hara ata ndzi ata kəra kutakəyirna, ga ka mjir kutakəyir nga aɗi ka biku wa.”

¹⁰Kuthli shinau abbər, “Ma kəlara mda madi ku damitə nga, ka gə səntə ni ali antə tsa aɗi ata jaktə damitə nga kəra wa.”

¹¹Antə mwala ni pəla, “Ka barkar nga, ka gə kiɗa ali MTHLAKU na Hyelər nga, ta mjir ntəskur ar ɓzərna ni asə tsi ɓzərna na dukwa ni.” Antə Dauda pəla, “I ku hara alkawal ka thləma MTHLAKU na ka mpika abbər su aɗi na ata tsəkwar ɓzər nga wala raka wa.”

¹²“Usa ka barkar nga, ndzi kəi jaktə pəla su duku bu”, ndə mwala ni, Antə kuthli pəla, “Gari.”

¹³Antə tsa pəla, “Kamnyar mi tə gə hara su ɗimi apani aka mjir Hyel ri? Kamnyar atar shariya ngəni kuthli ku ngkəi kərni, ma ku ndzi abbər kuthli aɗi ngka avi ka ɓzərni na aɓəla ni wa.

¹⁴Shanga mburu ata sə mta, mburu apa yimi na ku pumtadzi ata di, natə mda amzhi fatə wa. Wala Hyel aɗi ana jaktə ngka ka mdə na ku mtə wa, kulini su na təramta diya an ka gə ngka ka ɓzər na aɓəla ni.

¹⁵Antə kulini I ku si pəla gari ngəni aka kuthli na mthlakərna kamnyar mji ni ku thlivərantə ra. Antə I dzama abbər, ma I ku gari ala gə nuhum ga ata hara su tə I kiɗa.

¹⁶Nuhum barkar kuthli ata msərantə yeru ka ɓzərna akwa tsiya mdə na ata bara tsi yeru ka ɓzərna ka ngkata ala yeru ndzi akwa tsəɗi tə Hyel na ala yeru.

¹⁷I ku dzama abbər alkawal ar kuthli na mthlakərna ata msərantə ra, kamnyar kuthli ku ndzi apa mdərthlentərhyel na ana ndəkəmta ɗimikur ka ɓɗakkur. Ka MTHLAKU na Hyelər nga ndzi adzə nga!”

¹⁸Antə kuthli pəla, “I ata yu nga su, antə tar ka gə pəla ali jirkur.” Antə mwala ni shinau abbər, “Ka barkar nga, yu suari.”

¹⁹Antə tsa yu ni abbər, “Aɗi Yowab an vu nga hara su ngəni wa?” Antə mwala ni shinau, “I ata ngkər ala gə shanga su na aɗi, laku aɗi tə ka mdə zhar ta shinau sur yuwur ngə wa. Jiri, buɗar nga Yowab an pəla ali su tə kəi hara ka su tə kəi pəla.

²⁰Amma tsa hara ngəni kamnyar ka tsa namtə shanga su na aɗi. Ka barkar nga ga ɗəɗu apa mdərthlentərhyel antə ga asəndə shanga su na akwa duniya.”

²¹Aghəla nda antə kuthli ku pəla aka Yowab, “I ku kwamta kəi hara su tə ga akwa barari, mwari kara wutə Absalom, ka gə ngka ka tsa.”

²²Yowab ku zuzuri ata di akəma Dauda ka nar olkur ka pəla, “Ka barkar nga, ka Hyel vədza ala gə barkar! Kulini I ku sənda abbər I ku nggatə msərakurər nga kamnyar ga ku na ali su tə I ku kiɗa.”

²³Antə Yowab ku thlatə ka mwari ahar Geshur ka səntə Absalom ahar Urushalima.

²⁴Kuthli pəla aka Yowab, “I aɗi ata bara wutə Absalom akəmi wa. Pəla alari ka tsa ndzi tsu akwa kəyirni.” Apani Absalom ku ndzəndzi akwa kəyirni kula si adzə kuthli.

²⁵Ata saka ngəni mda aɗi akwa Israila wala duku na ku kəli dakwikur Absalom wa, baɗita ata kərari ka səghəi ata səlari nangka aɗi tsəkwar wa.

²⁶Shishir kərari hang, antə tsa ana thlamta ma sakatə shishi ni ku kəli saɓəl kamta ka hara kəgəɓu alari. Ma mda ngkərtə shishi ni ata kəra sur ngkərtə kəgəɓkur ar kuthlikur, kəgəɓkurari ana hara apa kilogram suɗa.

²⁷Absalom ka maɗashili makər ka ɓzərngkwa pal, ka thləmari Tamar, tsa mwala na dakwi ka duna.

²⁸Absalom ku ndzəndzi ar məva suɗa cur akwa Urushalima kula si akəma kuthli.

²⁹Antə Absalom ku thlentə ka Yowab si ka tsa thlentə ni adzə kuthli amma Yowab aɗi si wa. Antə Absalom ku jaktə thlentə ka tsa si amma Yowab ku nggəlar ta si.

³⁰Antə Absalom pəla aka buɗayeri arni abbər, “Giri ku wutə fakər Yowab kudzəhə ka arna, ka barli ata. Ka giri mwari ka hata u'u.” Antə da ku mwari ka hata u'u.

³¹Yowab mwari ahar Absalom ka yuwa, “Kamnyar mi tə buɗayeri ar nga hata u'u ata fakərna ri?”

³²Absalom shinau abbər, “Kamnyar tə ga ku nggəl ta si sakatə I ku thlentə ka gə si. I ku bara ka gə ləhar kuthli ka ra yu ni ali, Kamnyar mi tə I ku zhar Geshur ka si azi ri? Kuji mi tsu anda!” Antə Absalom ku ləkəma ka pəla, “I ata bara ka gə ɗəmha ali kəi wutə kuthli, antə ma I ku hara biku ka mdə tsi ra.”

³³Antə Yowab ku mwari adzə Kuthli Dauda ka pəla alari su tə Absalom ku pəla. Kuthli ku thlentə ka Absalom si antə tsa ku si ka zuzuri ata di akəmari. Antə kuthli ku vədzə mnyari alari.