Read bura-pabir 2 Samiwal 15 Bible Online

2 Samiwal 15 - bura-pabir bible

2 Samiwal 15

¹Aghəla ngəni, antə Absalom ku tsaptə wagənayeri ar taku kəga takwayeri arni ka mjir pwar ni ntəfkumari.

²Absalom ana thlatə ɗəɗəpə mbing ka tsa thləthlata ata mnya laku akwa nyarfur bərni. Kəlara sakatə mdə ku si bara burka adzə kuthli, antə Absalom ata yu mdə ni, “Gə thlata akwa di madə ri?” Antə ma mdə ni pəla alari, “I na mafar ngə ni səɓəla akwa nyarmbwa laga akwa Israila,”

³Absalom ata pəla alari, “Burkar ngə ni kalkal amma wakil ar kuthli aɗi ka tsa nggatə tuwar ngə nə wa.”

⁴Antə Absalom ata ləkəma ka pəla, “Ka namtə ra alkali. Antə kəlara mdə na ku si burka akəmi I ata hara alari shariyar jirkur.”

⁵Ma mdə ni ku si ka zuzuri ka thlawar Absalom, antə Absalom ana fəfaha ni ka vədza kəsəm mnyari alari.

⁶Absalom ku hara ngəni aka shanga mjir Israila na ku si adzə kuthli kamnyar shariya. Apani antə tsa ku ndəkərta hangkala mjir Israila adzə ni.

⁷Aghəla məva nfwarkumari antə Absalom pəla aka Kuthli Dauda abbər, “Zanuwa, I ata kiɗə ka gə na ali laku kəi ləhar Hebron kamnyar nghyantə alkawal tə I ku hara aka MTHLAKU.

⁸Sakatə I andzəndzi ahar Geshur akwa Siriya, I ku hara alkawal aka MTHLAKU abbər, ‘Ma tsa ata jaktə ngka ka iya ahar Urushalima I ata vəngkər səli alari.’ ”

⁹Antə kuthli ni pəla, “Ka Hyel mwantə nga lapiya.” Antə Absalom ku təra ka ləhar Hebron.

¹⁰Amma tsa thlentə mji laga akwa shanga bwayeri ar Israila ka pəla, “Ma giri ku nggatə mbur təmbəl, ka giri haptə kuraku ka pəla, ‘Absalom ku ndzi kuthli ahar Hebron!’ ”

¹¹Mji ku hara aru suɗa natə Absalom ku kiɗə ɗa ka da nu ni. Antə da ku thlata ahar Urushalima ka nu ni kula səndə su tə Absalom ku ɗəmha. Antə da nu ni ka kuta duku.

¹²Antə sakatə Absalom akwa hamta saɗakayeri, tsa ku thlenta akwa di Gilo ka kəga Ahithlofel na mdər Gilo, na pal akwa nca mjir nar sauri aka Kuthli Dauda. Ɗəmhədzər dlutsə kuthlikur akəla Dauda tə Absalom akwa harari ni ku ndzi ka duna, antə hangkur mji na akwa nu Absalom ku jakjaka.

¹³Mdər thlentə laga ku si ka pəla aka Dauda abbər, “Hangkala mjir Israila ku nutə Absalom!”

¹⁴Antə Dauda ku pəla aka shanga kwakunayeri na adzə ni akwa Urushalima, “Thlatə giri ka mburu hwi, ma apani wa mburu aɗi ata msəra ta Absalom wa! Mwa giri taktar! Ma apani wa tsa ata kəli mburu ka hara asar ala mburu ka tsəgəi shanga mji na akwa bərni ni!”

¹⁵Antə kwakunayeri ni shinau aka kuthli abbər, “To ka barkar nga, yeru ɗəmhəɗəmhari ka yeru hara kəlara su tə ga ku pəla.”

¹⁶Antə kuthli ku təra kəga shanga mjir kutakəyirni ka kwakunayeri arni, təng mwankirni na raka raka kuma antə tsa ku zhari aghəli ka da wul kutakəyir kuthli.

¹⁷Sakatə kuthli kəga shanga mjirni ata təra kazhar bərni ni antə da ku thləthlata adzə kəi na ata hildi.

¹⁸Shanga kwakunayeri ku si ka təramta adzə ni akwa aduta alari. Mjir Kerethli ka mji Pelethli ku si ka təramta akəmari. Antə sojayeri na aru ngkwa na ku nu ni ahar Gath tsuwa ku si ka təramta.

¹⁹Antə kuthli pəla aka Ittai na mdər Gath, “Kamnyar mi tə ga ata nu yeru ri? Ngka ka gə ra ndzəndzi ka kuthli na bilən ni. Ga mətəpi na hwi akwa tsəɗiyir nga.

²⁰Ga aɗi fəi azi wa, antə kamnyar mi tə kəi vu ka gə nu ra ri? I aɗi səndə vəi tə I ata mwari ata wa. Antə ngka ka gə fatə mjir nga antə ka MTHLAKU kətadzə nga ka tsa hara ala gə mdəkur.”

²¹Amma Ittai ku kətə alkawal abbər, “Apatə MTHLAKU ka mpika, ka apatə barkar kuthli ka mpika, kəlara vəi tə barkarni ata ndzi ata, wala ka mpika, wala akwa mta, I ata ndzi anda.”

²²Antə Dauda pəla, “Ɓɗaku, Təramta.” Apani Ittai ku mwari kəga shanga mjirni kəga yangkurari na amzhi vəi kərɗa wa.

²³Mji ku tuwa ka kuraku sakatə mjir nu Dauda ku təra. Antə kuthli ka mji na akwa nu ni ku fəlɓəla zərkəu Kidron. Antə shanga ɗa ku nu lakur mtaku.

²⁴Zadok ka Abiyathlar na pristayeri ku mwari ata kəma duku kəga mjir Lawi na akwa kəl Akwati alkawal. Da ku kəli Akwati ni ka zhari ata di, tar sakatə Dauda ka mjirni ku ləɓəla kazhar bərni ni.

²⁵Antə kuthli pəla aka Zadok, “Ngka ka Akwati Alkawal ni akwa bərni. Ma MTHLAKU ku hir ali, vir laga tsa ata ngka ka iya kəi jaktə wutə ni ka vəi tə mdə vəi ni ata.

²⁶Amma ma tsa pəla abbər tsa aɗi nggatə msərakur na wa to, ka tsa hara su tə tsa hir ka iya.”

²⁷Kuthli ləkəma ka pəla aka Zadok na prist, “Ga wula ya, kətə ɓzər nga Ahimaaz ka ɓzər Abiyathlar, Jonathlan ka giri ngka akwa bərni ka lapiyakur.

²⁸I ata ɗarndzi kəi səka ata vəi fəlɓəla thlyagha na akwa mtaku ni tar ma I ku nggatə labar akəla ga.”

²⁹Antə Zadok ka Abiyathlar ku kətə Akwati Alkawal ka ngka akwa Urushalima ka ndzəndzi anda.

³⁰Dauda ku ləkəma ka ndlə Gar Zaitun ka tuwa, kula ɓaɓi akwa səlari. Tsa putə tsiyari ata kərari kamnyar ncantə ɗəffə ɓzəɓzəkur. Antə shanga mjirni ku putə tsiya ɗa ata kəra ɗa akwa tuwa.

³¹Sakatə mdə ku pəla aka Dauda abbər Ahithlofel ku paktə kər ka Absalom kamnyar dlutsə kuthlikur ar nga, antə Dauda ku hara adduwa abbər, “Usa, MTHLAKU ka gə shinar sauriyir Ahithlofel ka tsa ndzi su gapani!”

³²Sakatə Dauda ku mzhitə kəra gar, vəi tə mji ana vəngkər səli aka Hyel ata, antə Hushai na mdər Arkite ku si wutə ni ka ləptərni thluhthluhwari ka bərbər ata kərari.

³³Dauda pəla alari, “Ma ga nu ra, ga ata ghərantə ra daci.

³⁴Amma ma ga ata ngka akwa bərni ka pəla aka Absalom abbər ga ata ndzi buɗarni ka hara kəthlər alari ka jirkur apatə ga ku hara aka baba'ni, ga ata dlar ra. Apani ga ata mzhi sharəmta kəlara sauriyir ar Ahithlofel.

³⁵Zadok ka Abiyathlar na pristayeri ata ndzi anda. Antə kəlara su tə ga ku nggata akwa kəi kuthli ka gə pəla ala ɗa.

³⁶Maɗa' ɗa: Ahimaaz ka Jonathlan adzə ɗa. Antə ga ata thlentə ɗa adzə ra ka shanga su tə ga ku nggata.”

³⁷Apani antə Hushai na pazhir Dauda ku ngka akwa bərni sakatə Absalom akwa səvi akwa Urushalima.