Read bura-pabir 2 Samiwal 16 Bible Online

2 Samiwal 16 - bura-pabir bible

2 Samiwal 16

¹Sakatə Dauda ku təramta kəra gar ni raka, antə tsa kəɓa ka Ziba buɗar Mefibosheth ata si ka kwara suɗa ka kər buradi aru suɗa, gwandzal anap ul'ula aru pal, ka gwandzal yar nfwa həng'hari aru pal, ka zamzamiya nghyinghyari ka yimər anap.

²Kuthli Dauda yu Ziba, “Ga ata hara mi ka suayeri ngəni ri?” Ziba shinau abbər, “Kwarayeri ni kamnyar ka mjir kutakəyir nga fəla, buradi ni ka yar nfu ni ka mjir nga səma, tsuwa yimər anap ni ka da sa sakatə da ku ghəri akwa mtaku.”

³Antə kuthli yu ni abbər, “Mefibosheth na kəkar mdərkəyir nga Shawulu ama ri?” Ziba shinau alari abbər, “Tsa tsu akwa Urushalima, kamnyar tsa tamata abbər kulini mjir Israila ata hamta alari kuthlikur kəkarni Shawulu.”

⁴Kuthli pəla aka Ziba, “Shanga su na ar Mefibosheth ku ndzi ar nga.” Antə Ziba pəla, “I ku fatə kalau, ka barkar nga! Ndzi kəi wutə msərakur akəla ga!”

⁵Sakatə Kuthli Dauda ku si ahar Bahurim, yangkura Shawulu na ka thləmari Shimeyi, ɓzər Gera ku səɓəla ka thlakəma ri, ka nggənggəl ni.

⁶Shimeyi baɗitə ndzəndzəh Dauda kəga kwakunayeri arni ka pela, wala tə mjir sək kəra Dauda ku kalaktə ni.

⁷Shimeyi nggənggəla ni ka pəla, “Ləɓəla azi! Ləɓəla azi! Mdər tsi mda! Mdə hilhila!

⁸Ga ku dlutsə kuthlikur ar Shawulu, antə kulini MTHLAKU ata ɗi nga kamnyar mjir kutakəyir Shawulu tə ga ku kurəmta. MTHLAKU ku hamta kuthlikur aka ɓzər nga Absalom antə an shar nga, gə na mdər tsi mda!”

⁹Abishai natə mama'ni an Zeruwiya pəla aka kuthli, “Ka barkar nga, kamnyar mi tə gə zhar ka kila ngəni nggənggəl ngə ri? Ndzi kəi mwari kəi nthləmta kərari!”

¹⁰Amma kuthli pəla, “Giri na maɗa' Zeruwiya, su aɗi damitə ra ka giri wa. Ma tsa nggəl ra kamnyar tə MTHLAKU an pəla alari ka gə nggəl Dauda, mda aɗi na amzhi yuwa abbər, kamnyar mi tə gə hara su apani ri ya?”

¹¹Antə Dauda pəla aka Abishai ka shanga kwakunayeri, “Ɓzərna ata bara tsi ra, antə kamnyar mi tə giri ata ndatədzi ata kəra mdər Benjamin ngəni ri? MTHLAKU an pəla alari ka tsa nggəl ra, antə zhar giri ni ka tsa hara.

¹²Nuhum MTHLAKU ata wutə bwaniyirna ka tsa na ali barka ata vəya nggənggəl ni.”

¹³Antə Dauda kəga mjirni ku ləkəma ka mwa. Shimeyi tsuwa akwa mwa ka dzərgar ata wul ɗa. Tsa akwa nggənggəl su, ka ndzəndzəh pela, ka pu bərbər ata kəra ɗa.

¹⁴Antə kuthli kəga mjirni ku ghəra sakatə da ku mzhitə Jodan, antə da ku ghərəmtaghəra anda.

¹⁵Akwa saka ngəni Absalom ka Ahithlofel kəga shanga mjir Israila na adzə ɗa ku ləkwa Urushalima.

¹⁶Sakatə Hushai na pazhir Dauda ku si ka wutə Absalom, tsa haptə kuraku ka pəla, “Ka far kuthli fi! Ka far kuthli fi!”

¹⁷Antə Absalom yu Hushai, “An jili hirkur tə ga ata harari aka pazhir nga Dauda ya? Kamnyar mi tə ga aɗi nu ni wa ri?”

¹⁸Hushai pəla, “Awa. Tar kəi nu mdə natə MTHLAKU ka mji nayeri ni, ka shanga mjir Israila ku carɓəla. Antə tar kəi nu nga.

¹⁹Shang ma wan tə I ata hara kəthlər alari ri? Aɗi aka ɓzər ni wa ya? Tsu apatə I ku hara kəthlər aka baba' nga antə I ata hara ala ga.”

²⁰Antə Absalom pəla aka Ahithlofel abbər, “Antə man su tə ka mburu hara ri? Pəla sauriyir nga.”

²¹Ahithlofel shinau aka Absalom abbər, “Mwari ka ra pi ka mwanki na raka raka ar baba' nga, natə tsa zhari ka da wul kutakəyir kuthli. Antə shanga mjir Israila ata sənda abbər ga ku ndzi dawar baba' nga. Antə mjir nu nga ata wutə duna.”

²²Antə da ku latə tent aka Absalom ata kəra mbwa laga aviyar kuthli. Antə ata nca mji Absalom ku ləmbwa ka pi kəga mwanki na raka raka ar baba'ni.

²³Kəlara sauri natə Ahithlofel ku hamta akwa virayeri nda antə mdə ku dluwa apa an ndərər Hyel. Antə Dauda ka Absalom ku hara kəthlər ka sauriyirni.