Read bura-pabir 2 Samiwal 18 Bible Online

2 Samiwal 18 - bura-pabir bible

2 Samiwal 18

¹Antə Kuthli Dauda ku tsaptə shanga sojayeri arni ka ndəkəi ɗa akwa zara dəpu dəpu ka aru aru ka pungkər sojayeri na ol'ola ata kəra zarayeri ni.

²Antə tsa ku thlentə sojayeri ni ka bwa makər, pal akira Abishai na ɓzər Zeruwiya, ka pal akira Ittai na mdər Gath. Antə kuthli pəla aka mjirni, “I ka kəri ata mwari kəga giri.”

³Amma mji ni pəla abbər, “Aɗi kalkal ka mburu mwari kəga ga wa, kamnyar ma yeru hwi aɗi ata damita ɗa wa, wala ma retar yeru an kurəmtadzi aɗi ata damita ɗa wa. Amma ar nga gə kalkal ka sojayeri dəpu kuma. Antə su na təramta ta shang kuji ka gə ndzəndzi avi ka gə thlenta ala yeru dlara.”

⁴Antə kuthli ni pəla, “I ata hara kəlara su tə giri wuta abbər kalkal.” Antə tsa thləthlata anyarfur bərni sakatə mjirni akwa təramta aru aru ka dəpu dəpu.

⁵Antə kuthli tsawa aka Yowab, Abishai ka Ittai, “Usa ka giri wulwul ali ɓzərdakwi ni, Absalom.” Antə shanga sojayeri ku nggatə Dauda sakatə tsa akwa hamta tsawu ngəni aka sojayeri na ol'ol ni.

⁶Apani sojayeri ar Dauda ku təra ləɓəla ata hildi ka mpa mjir Israila akwa kuɓər nfwa ar Ifrayim.

⁷Mjir Dauda ku nggyari mjir Israila vir nda ka tsəgəi mji hang ka duna, na ku mwantə dəpu sərkumari.

⁸Mpa ni ku titiləmtadzi akwa shanga bwa, antə hangkur mji na ku mtəgəi kamnyar kuɓər nfu ni ku təramta natə mji ku tsi ka katsakar.

⁹Absalom ku kəɓa ka sojayeri ar Dauda kula səndərni. Absalom ata Kwaraləbandər antə sakatə tsa ata təramta akira nfur ok laga ola, kəra Absalom ku nggəli akwa tsiya nfwa ni. Kwaraləbandər ni ku hwi ka ləɓəla akira Absalom ka zhar ni ahəhəi akwa shambar.

¹⁰Duku akwa nca mjir Dauda ku wutə ni antə tsa ra pəla aka Yowab, “Zanuwa I wutə Absalom ahəhəi akwa nfur ok!”

¹¹Yowab shinau abbər, “Mi, ga ku wutə ni? Kamnyar mi tə ga aɗi tsi ni anda wa ri? Ai sakani I ata na ala ga adzərfa kuma ka sur mbwadzi.”

¹²Amma mdə ni shinau abbər, “Wala ma ga an ku kurtə na ali adzərfa dəpu I aɗi ata haptə tsi kəi tsəkwar ɓzər kuthli wa. Yeru ku nggatə kuthli akwa tsawa ala gə ka Abishai ka Ittai abbər, ‘Usa, giri aɗiya dəkəi ali Absalom wa.’

¹³Tsuwa, ma I an ɓəli tsawur kuthli ka tsi Absalom, kuthli ata nggatari antə ga aɗi ata sə mbul ra wa.”

¹⁴Antə Yowab pəla, “I aɗi ata shamta saka ka gə wa.” Antə tsa fatə mwasu makər ka mwari ka ntsəvəuwa kərathla Absalom sakatə tsa tsu ka mpika ahəhəi ata nfur ok ni.

¹⁵Antə mjir kəs kari mpa ar Yowab kuma ku pungkərdzi aka Absalom ka kuri tsi ni.

¹⁶Antə Yowab pəla ka mdə mbur təmbəl ar thləthlatə ka mpa, antə mjirni ku ngka ka zhar nu mjir Israila.

¹⁷Da kətə mshiyir Absalom ka ndzəhəuwa akwa ku laga zurang akwa kuɓər nfu ni, antə da tsaɓəngkər alari pela hang. Antə shanga mjir Israila ku hwi ka ləha.

¹⁸Akwa sakatə tsa ka mpika tsa ku nci pela shanggam aka kərari akwa Mular kuthli, kamnyar tsa aɗi ka ɓzər tə mji asə ɗangtə thləmari atar ni wa. Antə tsa vətə thləmari aka shanggam natə tsa ku nci ni antə ba ashina mda asəndə shanggam ngəni ka thləm, “Shanggamər Absalom.”

¹⁹Antə Ahimaaz na ɓzər Zadok pəla aka Yowab, “Ndzi kəi hwi mwari ra pəla labar na msəra ni aka kuthli abbər MTHLAKU ku msərantə ni ta dawayeri arni.”

²⁰Antə Yowab pəla, “Awa, ashina ga aɗi ata mwantə labar na msəra ni wa, tar vir damwa, kamnyar ashina ɓzər kuthli ku mti.”

²¹Antə Yowab pəla aka mdər Ithliyopiya, “Mwari ka ra pəla aka kuthli su tə ga ku wuta.” Antə mdər Ithliyopiya ni ku nggyarghəidzi ka hwi mwari.

²²Ahimaaz na ɓzər Zadok jaktə kiɗə ka pəla aka Yowab, “Wala man ata hara ri, zhar ra usa kəi mwantə labar ni.” Antə Yowab pəla, “Kamnyar mi tə ga ata bara mwari ri? Diya watsəɓa aɗi akwa wa.”

²³Antə Ahimaaz pəla alari, “Wala man ata wutə ra ri, I ata mwari.” Antə Yowab pəla alari, “Hwi mwari.” Antə Ahimaaz ku hwihwi atar lakur bəbal ka mzhita akəmata mdər Ithliyopiya ni amzhəta.

²⁴Akwa saka ngəni Dauda andzəndzi akwa daɓwa nyarfu na avivi ka na aɓəlaɓəla ar bərni ni. Tsuwa mdər gadi ni ku ləmta ata kəra mbwar gadi na akwa nyarfu ni, ka thləthlata ata kəra nyarfu ni, antə tsa wutə mdə laga akwa si ka hwi.

²⁵Mdər gadi haptə kuraku ka pəla aka kuthli, antə kuthli pəla, “Ma tsa shini tsa ata səntə labar na msəra.” Antə Mdə na akwa hwihwi ni si kudzəha.

²⁶Antə mdər gadi ni ku jaktə wutə mdə damwa akwa hwi si, antə tsa ku kəga mdər sək nyarfu ka pəla, “Nggədza, mdə damwa akwa si ka hwi.” Antə kuthli pəla, “Tsa ma tsa akwa si ka labar na msəra.”

²⁷Mdər gadi ni pəla, “Ya wula apa mdə na akəma ni apa Ahimaaz na ɓzər Zadok.” Antə kuthli pəla, “Tsa mdə na pwa, I tamatə tsa ata səntə labar na msəra.”

²⁸Ahimaaz thlawar kuthli, ka pəla, “Bundi.” Antə tsa ndla ata di akəma ri, ka pəla, “Ka gə hu MTHLAKU na Hyelər nga na ku na gə nggyari su ata kəra mji na ata mula ala ga ka barkar nga!”

²⁹Antə Kuthli pəla, “Ɓzər dakwi Absalom ni lapiya ya?” Antə Ahimaaz shinau abbər, “Zanuwa, sakatə Yowab thlentə yeru ka buɗar ngə ni, I ku wutə mji tsaptsaɓa ndəndandəndari, amma I aɗi səndə su na hara wa.

³⁰Antə kuthli pəla, Thləthlata anda ka gə səka.” Antə tsa mwari ka thləthlata anda.

³¹Antə mafa na mdər Ithliyopiya ku si ka pəla aka kuthli, “I ka labar na msəra aka barkar nga! Ashina MTHLAKU ku hamta ala gə nggyari su ata kəra shanga mji na akwa thlentə hangkala ga.”

³²Antə kuthli ku yu ni abbər, “Ɓzərna Absalom lapiya ya?” Antə mdə ni shinau abbər, “Zanuwa, I hir abbər su na hara alari ni ka tsa hara aka shanga dawayeri ar nga, ka aka shanga mji na thlentə hangkala ga.”

³³Antə ɗəffa kuthli ku ɓzi ka duna har tə dzari baɗitə kədza. Antə tsa ləmta akwa mbwa na ata kəra nyarfu ni akwa tuwa, abbər, “Ai ɓzərna! Ɓzərna Absalom! Absalom ɓzərna! Kuji ka I an mta ata vəya ga! Ɓzərna! Absalom ɓzərna!”