Read bura-pabir 2 Samiwal 19 Bible Online

2 Samiwal 19 - bura-pabir bible

2 Samiwal 19

¹Mdə ku pəla aka Yowab abbər Kuthli Dauda akwa tuwa mtər ɓzərni Absalom.

²Antə kucali kamnyar səma akwa mpa ni vir nda ku shin ka ɗəffə ɓzəɓza aka shanga sojayeri ar Dauda, kamnyar da ku nggata abbər kuthli akwa dzam dəmar ɓzərni.

³Antə sojayeri ni ku nggwar səvi akwa bərni ni tsu apatə mji na hwi akwa mpa ana nggwar səvi kamnyar sur səli.

⁴Kuthli ku hartə kəmari ka tuwa ka kuraku, “Ai ɓzərna! Ɓzərna Absalom! Absalom, ɓzərna!”

⁵Antə Yowab ku təra ləhar kuthli ka pəla alari, “Ashina ga ku kəli səliyir yeru na mbantə mpika ga, ka mpika maɗa' nga shili ka mwanki, ka mwankir nga, ka mwankir nga na raka raka.

⁶Ga ku nggəlar mji na hir nga, ka hir mji na nggəlar nga! Ga ku ncanta ata bəbal ashina abbər sojayeri na ol'ola ka shanga sojayeri ar nga aɗi suma ala gə wa. I wuta abbər ga ata ndzi ka kucali ma Absalom ka mpika amma shanga yeru ku mti.

⁷Antə kulini thlata, ka gə ra usar ɗa kamnyar su tə da ku hara. Kamnyar I kahyel ka thləma MTHLAKU abbər ma ga aɗi mwari wa, mda aɗi wala duku na ata mbila adzə nga kwabə tahaku wa. Antə ma su apani ku hara, tsa ata ndzi ɗimi ta shanga asarayeri na ku ɗar wutə nga.”

⁸Antə kuthli ku thlatə ka mwari ka ndzəndzi akwa nyarfu di. Mjirni ku nggata abbər tsa anda antə shanga ɗa ku ra tsaptədzi adzə ni. Akwa saka ngəni shanga mji na abwahila Absalom ku hwi ka ləha.

⁹Shanga mjir tsəɗi ni akwa beɗi ka nvwa ɗa. Da pəla aka nvwa ɗa, “Kuthli Dauda ku msərantə mburu ta dawayeri. Tsa ku msərantə mburu akwa tsiya mjir Filistiya, amma kulini tsa ku hwi ta Absalom ka zhar tsəɗi ni.

¹⁰Mburu an vəi Absalom ka tsa ndzi kuthlir mburu, amma mdə ku tsi ni akwa mpa. Antə kamnyar mi tə mburu angka ka Kuthli Dauda wa ri?”

¹¹Labar ar suayeri tə mjir Israila akwa ngkərari ni ku mzhitə Kuthli Dauda. Apani tsa ku thlentə Zadok ka Abiyathlar na pristayeri adzə mji ol'olər Yahuda abbər, “Kamnyar mi tə giri an ata ndzi na aghəli akwa dlar ka səntə kuthli akwa kəyirni ri?

¹²Giri an yangkuri ka mamshirna, kamnyar mi tə giri an ata ndzi aghəli akwa ngka ka iya ri?”

¹³Tsuwa Dauda ku pəla ala ɗa ka da pəla aka Amasa, “Ga an mamshirna. Antə I ata vəi nga ola ata kəra sojayeri arna ata vəya Yowab. Ma I aɗi hara apani wa, ka Hyel pthli ra.”

¹⁴Antə Dauda ku ndəkərta hangkala shanga mjir Yahuda tə mnya ɗa ku ndzi duku, antə da ku thlentə kuraku alari ka tsa ngka kəga shanga mjirni.

¹⁵Kuthli Dauda ku baɗitə ngka akwa Urushalima. Antə sakatə tsa ku mzhitə Thlyagha Jodan, mjir Yahuda ku kəɓa ka tsa anda. Tangkəma da tsaptədzi akwa Gilgal kamnyar ka da pwar ni ka tsa fəlɓəla Thlyagha Jodan.

¹⁶Ata saka nda tsuwa mdər Benjamin Shimeyi na ɓzər Gera ahar Bahurim ku mwari ka huva ata kəma duku kəga da akwa Jodan kamnyar ka tsa kəɓa ka Kuthli Dauda.

¹⁷Shimeyi ku si ka mji dəpu pal na akwa nyarmbwar Benjamin. Antə Ziba na buɗar mjir kutakəyir Shawulu ku si ka maɗa'ni kumnya ntəfu ka buɗayeri sərkumari, antə da ku si akwa Jodan kəma ta kuthli.

¹⁸Da ku fəlɓəla thlyagha ka pwar kuthli kəga mjirni ka hara kəlara su tə kuthli akwa barari. Sakatə kuthli ku ɗəmhədzi ka tsa fəlɓəla thlyagha, Shimeyi ku ndla ata di akəma ri.

¹⁹Tsa pəla, “Ka barkar nga usa ka gə fwari ata kəra su tə I hara ala gə vir nda sakatə ga akwa zhar Urushalima. Ga aɗiya kəsi akwa ɗəffa ga wa, wala dzama ata kər wa.

²⁰I ku sənda abbər I ku hara biku, an su na hara tə I an mdə na ntangkəma akwa nyarmbwar Yusuf na si ka wutə nga ashina.”

²¹Abishai ɓzər Zeruwiya shinau ka pəla, “Kalkal ka mdə tsi Shimeyi kamnyar tsa ku nggənggəl mdə natə MTHLAKU ku carɓəla.”

²²Amma Dauda ku pəla aka Abishai ka ɓzərma'ni Yowab, “Wan yu dzamər giri ri maɗa' Zeruwiya? Giri ku ndzi apa dawa ali ashina. I an kuthlir Israila, antə mdər Israila aɗi tə mda ata tsiyari ashina wa.”

²³Antə kuthli pəla aka Shimeyi, “I akwa pəla ala ga mda aɗi ata tsi ngə wa.”

²⁴Antə Mefibosheth, na kəkar Shawulu ku səghəi ka kəɓa ka kuthli. Tsa ku nggəlari ta kəcimta səlari wala pamta kumiyari, wala kəcimta kari hata arni, təng sakatə kuthli ku zhar Urushalima, tar tə tsa ku ngka lapiya.

²⁵Sakatə Mefibosheth ku si akwa Urushalima ka tsa kəɓa ka kuthli, kuthli ku yu ni abbər, “Mefibosheth, kamnyar mi tə ga aɗi nu ra wa ri?”

²⁶Antə tsa shinau ka pəla, “Ka barkar nga, apatə ga sənda abbər I nggurdəkəi. I pəla aka buɗarna Ziba ka tsa vətə sərɗu aka kwararna kəi fəltə kəi nu nga, amma tsa təra kazhar ra.

²⁷Tsa thlandər ata kəri, ka barkar nga, amma gə ndzi apa mdərthlentərhyel, antə ka gə hara su tə gə wutə kalkal ala ga.

²⁸Kalkal ka gə tsi shanga mjir kutakəyir baba'na, amma ga ku zhar ra kəi səma ata tebərər nga. Antə aɗi kalkal kəi jaktə kiɗə mdəkur akəla barkar ngə wa.”

²⁹Kuthli ku shinau, “Ga aɗiya jaktə gari su ma kəra wa. I ku ɗəmha abbər ga ka Ziba ata ndəkəi fakər Shawulu.”

³⁰Antə Mefibosheth shinau abbər, “Zhar ka Ziba fatə ɗa shang. Ai ku ndzi msəra tə barkar nga ku ngka avi lapiya.”

³¹Barzillai na mdər Gileyad ku thlata ahar Rogelim ka tsa pwar kuthli ka mwantə ni aɓəla bwanda Thlyagha Jodan.

³²Barzillai an mdə na ku hali, tsa ka məvari nciskumari. Tsa ka gəna antə tsa ku nar susəma aka kuthli sakatə tsa andzəndzi ahar Mahanayim.

³³Kuthli pəla alari, “Asəra ka mwa ləhar Urushalima antə I ata vəi nga.”

³⁴Amma Barzillai pəla, “Məvarna mbil yiɗau ri tə kəi nu kuthli ka yeru ləhar Urushalima?

³⁵Kulini I ku hara məva nciskumari, I amzhi ndəkɓəla su na msəra ka su na aɗi msəra wa. I amzhi nggaɓəla msərakur su tə I ata səmari wala sari wa. I amzhi nggatə msərakur kurakər mjir ha wa. I ata ndzi kəla ala gə daci ka barkar nga.

³⁶Ga aɗiya ghərantə kər nga ali wa. I ata pwar nga ka mwa fəlɓəla Thlyagha Jodan daci.

³⁷Antə zhari kəi ngka avi akwa diyir na kəi ra mta adzə kulər baba'na ka mama'na. Nggədza ɓzərna Kimham. Kəta ni ka giri təra, ka barkar nga, ka gə hara alari su tə gə tamatə kalkal.”

³⁸Kuthli shinau abbər, “I ata kətə ni kəi hara alari kəlara su tə gə bara. Tsuwa I ata hara ala gə kəlara su tə gə yuwa.”

³⁹Antə Dauda kəga shanga mjirni ku fəlɓəla Jodan. Tsa vədzə mnyari aka Barzillai ka vədza alari barka, antə Barzillai ku ngka avi.

⁴⁰Sakatə kuthli ku fəlɓəla Jodan tə shanga mjir Yahuda ka retar mjir Israila ku pwar ni antə tsa ka Kimham ku mwari ahar Gilgal.

⁴¹Antə shanga mjir Israila ku mwari adzə kuthli ka pəla, “Ka barkar nga, kamnyar mi tə maɗama' yeru na mjir Yahuda, ku kətə nga kazhar yeru, ka pwarɓəla nga, ka mjir kutakəyir nga ka sojayeri ar nga ka mwanta aɓəla bwanda Jodan ri?”

⁴²Mjir Yahuda shinau abbər, “Yeru hara ngəni kamnyar kuthli ni yangkura yeru. Antə kamnyar mi tə su ngəni ata hara ɗəffu ala giri ri? Yeru aɗi səma ata tsa wa, tsuwa yeru aɗi dlu su akəlari wa.”

⁴³Antə mjir Israila shinau abbər, “Yeru kudzəhə ka Kuthli Dauda ka bwa kuma ka təramta giri. Kamnyar mi tə giri ata rutə yeru ri? Giri aɗiya fwari abbər yeru an mji na ntangkəma na gari ata kəra ngka ka kuthli wa!” Amma mjir Yahuda ku thlatə ka duna akwa mbul kuthli ni ta mjir Israila.