Read bura-pabir 2 Samiwal 2 Bible Online

2 Samiwal 2 - bura-pabir bible

2 Samiwal 2

¹Aghəla tə Dauda ku kuri tuwar Shawulu ka ɓzərni Jonathlan antə tsa yu MTHLAKU, “Kəi mwari ra hara kuthlikur ata kəra pal akwa nca bərniyari ar Yahuda ya?” Antə MTHLAKU shinau alari, “I, mwari.” Antə Dauda pəla, “Kəi mwari akwa di madə ri?” Antə MTHLAKU shinau alari abbər, “Hebron.”

²Antə Dauda ku ləhar Hebron ka mwankirni suɗa, Ahinowam na ngkwar di Yezireyel ka Abigyal na mwalar msha Nabal na ahar Karmel.

³Sakatə tsa akwa mwari, tsa ku fatə mjirni kəga mjir kutakəyir ɗa, antə da ku ndzəndzi akwa kauyayeri na kalaktə Hebron.

⁴Antə mjir Yahuda ku si ahar Hebron ka bartə kəra Dauda ka tsa ndzi kuthlir Yahuda. Sakatə Dauda ku nggata abbər mjir Yabesh akwa Gileyad ku harəmta Shawulu.

⁵Antə tsa thlentə labar abbər, “Ka MTHLAKU vədzə barka ala giri kamnyar jirkur tə giri ncanta aka kuthlir giri tə giri ku harəmta ni.

⁶Antə kulini ka MTHLAKU hir giri ka tsa hamta watsəɓa ala giri. I tsuwa, I ata wulwul giri kamnyar su tə giri ku hara.

⁷Ka giri ndzi ɓəɓal ka katsala. Shawulu na mthlakər giri ku mti antə mjir Yahuda ku bartə kəri kəi ndzi kuthlir ɗa.”

⁸Olər sojayeri ar Shawulu, Abner na ɓzər Ner ku hwi ka Ishbosheth na ɓzər Shawulu ka fəlɓəla Thlyagha Jodan ka ləhar Mahanayim.

⁹Antə anda Abner ku namtə Ishbosheth kuthli ar tsəɗi Gileyad, Asher, Yezireyel, Ifrayim ka Benjamin ka shanga Israila.

¹⁰Tsa ka məvari nfwarkumari sakatə mdə ku vəi ni kuthlir Israila, antə tsa ku hara kuthlikur ar məva suɗa. Amma nyarmbwar Yahuda ku nu Dauda,

¹¹antə Dauda ku hara kuthlikur akwa Hebron ata kəra Yahuda ar məva murfa ka reta.

¹²Abner ka sojayeri ar Ishbosheth ku thlata ahar Mahanayim ka ləkwa bərni ar Gibeyon.

¹³Yowab natə mama'ni an Zeruwiya, ka Sojayeri ar Dauda ku baɗitə ləɓəla. Antə sojayeri ar Ishbosheth ka ar Dauda ku kəɓa adzə kufar Gibeyon ka thləthlata, mji ngəni aɓəlabwani ka mji ndaga aɓəla bwanda kufa ni.

¹⁴Antə Abner pəla aka Yowab, “Ndzi ka mburu carɓəla maɗadakwi ka da ɗar mpa akəma mburu.” Antə Yowab pəla, “To, kalkal.”

¹⁵Antə maɗadakwi kumnya suɗa ku thlata abwar Ishbosheth na akwa nyarmbwar Benjamin, ka mpa ka mji kumnya suɗa ar mjir Dauda.

¹⁶Waskəi ku ngkəi kəra nvwa ni ka ntsəvəuwa katsakar ni akwa thlimbəla nvwani, antə shanga ɗa sərkumari ka nfwar ku ndla ka mti ata kəma duku. Antə vəi ngəni mda ana kəga abbər, “Bəbal ar katsakar.”

¹⁷Antə mpa na mwavər ku thlata, mjir Dauda ku nggyari Abner ka mjir Israila.

¹⁸Maɗa' Zeruwiya na makər ni da anda. Da an Yowab, ka Abishai, ka Asahel. Asahel na ana hwi ka duna apa kimar,

¹⁹ku baɗitə kədla Abner kula pəra.

²⁰Abner haghəl kəmari antə tsa pəla, “Ngəni gə ya Asahel?” Antə tsa pəla “I.”

²¹Antə Abner pəla, “Zhar kədla ra ni. Kədlə dukwa sojayeri ni ka ra dlutsə kariyirni.” Amma Asahel ku ləkəma ka kədla ni.

²²Abner jaktə pəla, “Zhar kədla ra! Kamnyar mi tə ga ata vu ra kəi tsi ngə ri? Ma I tsi nga man tə I ata sə pəla aka ɓzərma' nga Yowab ri?”

²³Amma Asahel aɗi zhar wa. Antə Abner ku thləl mwasu ka bwahili ka ntsəvəmta kutari ka mbuhəɓəla abwahilari. Asahel ku təri ata di ka mti, antə kəlara mdə na ku si ata vəi tə tsa apsəmta ata ku thləthlata anda.

²⁴Amma Yowab ka Abishai ku baɗitə kədla Abner. Antə sakatə pci akwa təri da ku si adzə gar Amma, na abwar raghəi ka Gaiya ata lakur ləkwa mtakər Gibeyon

²⁵Mji na akwa nyarmbwar Benjamin ku tsaptədzi adzə Abner ata kəra gar ka ɗəmhədzi kamnyar mpa.

²⁶Abner haptə kuraku ka kəga Yowab, “Tar ka mburu ləkəma ka mpa ya? Ga aɗi sənda abbər kurari ata sə ndzi ɗimi wa ya? Yeru an maɗama' nga. Nawa tə ga ata tsawa ka mjir nga zhar kədla yeru ri?”

²⁷Antə Yowab, “I ku kahyel ka thləma Hyel na ka mpika abbər ma ga aɗi ndər wa, mjirna ata ləkəma ka kədla nga har ɗəpə ɗəɗəpa.”

²⁸Antə Yowab ku mbur təmbəl ar ngkatə mjirni ta kədla sojayeri ar Israila. Apani antə sojayeri arni ku zhar kədlə dawar ɗa.

²⁹Abner kəga mjirni ku mwa akwa Mular Jodan aviri ka fəlɓəla Thlyagha Jodan. Aghəla tə da baɗitə mwa, səɓəla ɗəpari ɗəɗəpə mbing har kərathlər pci da ku sə mzhitə Mahanayim.

³⁰Sakatə Yowab ku zhar kədla ɗa, antə tsa ku tsaptə shanga mjirni ka wuta abbər mji kumnya əmdla ka vəngkər Asahel aɗi wa.

³¹Tsuwa mjir Dauda ku tsi sojayeri ar Abner aru makər ka ngkwakumari akwa nyarmbwar Benjamin.

³²Yowab kəga mjirni ku kətə mshiyir Asahel ka harəmta akwa kulər kutakəyir ɗa ahar Bethlelehem. Antə da ku mwa shang ka sə mzhitə Hebron ɗəɗəpa.