Read bura-pabir 2 Samiwal 20 Bible Online

2 Samiwal 20 - bura-pabir bible

2 Samiwal 20

¹Kulini mdə hilhila laga aɗi anda ka thləmari Sheba ɓzər Bikri, na akwa nyarmbwar Benjamin. Tsa ku mbur təmbəl ka haptə kuraku ka pəla, “Su aɗi na paktə mburu ka Dauda wa! Su aɗi tə mburu ata wutari akəla ɓzər Yesse wa! Ka waskəi ngka aviyarngkiɗa, mjir Israila!”

²Antə shanga mjir Israila ku hwi kazhar Dauda ka nutə Sheba ɓzər Bikri. Amma mjir Yahuda ku nutə kuthlir ɗa baɗita akwa Jodan ka mwanta ahar Urushalima.

³Sakatə Dauda ku ngka akwa kəyirni ahar Urushalima, antə tsa ku fatə mwankirni na raka raka kuma tə tsa ku zhari ka da wul kutakəyir kuthli, Antə tsa pwi ɗa ambwa akwa tsiya mdər gadi. Tsa ku na ɗa shanga su tə da ata turari, amma tsa aɗi ləmbwa adzə ɗa wa. Mdə ku hartə ɗa akwa vəi tə da aɗi ata səɓəla wa, har ka da mta, tə da ku ndzi apa kughungayeri.

⁴Antə kuthli pəla aka Amasa, “Kəga mjir Yahuda ka da si adzə ra akwa kuta vir makər, antə ka gə si tsuwa.”

⁵Amma sakatə Amasa ku təra ra kəga mjir Yahuda, tsa ku fəi ka təramta sakatə kuthli ku thlamta alari.

⁶Dauda pəla aka Abishai, “Kulini Sheba na ɓzər Bikri ata sə hara ala mburu bwani na ku təramta su tə Absalom ku hara. Antə fatə sojayeri arna ka giri kədla ni. Ma apani wa tsa ata ləkwa bərniyayeri na ka katangga ka sha ala mburu.”

⁷Apani antə sojayeri ar Yowab ka mjir Kerethli ka Pelethli ka shanga sojayeri na ka duna ku ləɓəla apatə Abishai ku tsawa. Da ku thlata ahar Urushalima ka kədla Sheba na ɓzər Bikri.

⁸Sakatə da adzə pela na ola akwa Gibeyon Amasa ku si ka da kəɓa. Akwa saka ngəni Yowab ku hatə ləptər mpa ka byal ar mbwadzi ka ingdla akwa kəyari, mbwimbwiyari ata kusarari. Tə tsa kəɓəla səlari pal aləkəma antə ingdla ni ku tərɓəla kazhar kəyari.

⁹Yowab pəla aka Amasa, “Gə lapiya ya ɓzərma'na?” Antə Yowab ku tamtə kumiya Amasa ka kəsi ni ata ka tsi mazəmari ka tsa vədza alari kəsəm mnyari.

¹⁰Amasa aɗi vədzə hangkalari aka ingdla na akwa tsiya Yowab wa, antə Yowab ku ntsəvə Amasa akwa kutari ka ingdla ni, antə hyalari ku puɓəladzi ata di. Antə Amasa ku mti. Antə Yowab ka ɓzərma'ni Abishai ku kədla Sheba na ɓzər Bikri.

¹¹Antə pal akwa nca mjir Yowab ku thləthlata adzə Amasa ka pəla, “Kəlara mdə na hir Yowab ka kəlara mdə na abwar Dauda, ka tsa nu Yowab!”

¹²Mshiyir Amasa ku takəltədzi akwa mamshi apsəmta akwa ɗəffa laku. Sakatə mdə wuta abbər kəlara mdə na si adzə Amasa ku thləthlata, antə tsa ndəkərəmta ni kazhar laku ka psu ni akwa kusar ka pungkər alari ləptu.

¹³Aghəla tə mdə ku tərar mshiyir Amasa kazhar laku antə shanga mji ku nu Yowab ka da kədla Sheba na ɓzər Bikri.

¹⁴Sheba ku mwa ka ntamta kuta Israila ka ləhar Abel Beth Maaka ka ləkwa bwar tsəɗiyir mjir Bikri. Antə mjir Bikri ku tsaptədzi ka nu ni.

¹⁵Shanga sojayeri na adzə Yowab ku si ka kalaktə Sheba akwa Abel Beth Maaka. Antə da ku tsaptə həi adza hil katangga bərni ni ka ləmta nal. Mji bwa duku akwa pukthla banggwa ni ka da ngkamta.

¹⁶Mwala laga aɗi ɗəɗu na ku kəga akwa kuta bərni ka pəla, “Psi gir thləm! Psi gir thləm! Pəla giri aka Yowab ka tsa si azi kəi gari alari.”

¹⁷Antə tsa mwari adzə mwala ni antə mwala ku yu ni, “Ga an Yowab ni ya?” Antə tsa shinau, “I an tsa.” Antə mwala ni pəla, “Psi thləm ka ra nggatə su tə mafar nga akwa pəlari.” Antə Yowab pəla, “I akwa ngga nga.”

¹⁸Tsa ləkəma ka pəla, “Waci da ana pəla, ‘Mwari ahar Abel ka ra dlu sauri.’ Antə ngəni ana nthləmta beɗi na aɗi.

¹⁹Yeru an mji na ana bara ndzəndzi lapiyakur ka jirkur akwa Israila. Ga ata bara huzamta bərni na ku ndzi apa məma akwa Israila. Kamnyar mi tə ga ata bara shamta bərni na ar MTHLAKU ri?”

²⁰Antə Yowab pəla, “Ka Hyel ngkata, ka Hyel ngkatə ta I ashamta wala huzamta bərni ni!

²¹Aɗi apani wa. Mdə laga aɗi ka thləmari Sheba ɓzər Bikri akwa tsəɗi gar ar Ifrayim na ku bara tsi Kuthli Dauda. Haɓəla giri ali mdə ni antə I ata zhar bərni ni. Mwala ni pəla aka Yowab, Mda ata ndzəhəɓəla ala gə kərari ata kəra katangga ni.”

²²Antə mwala ni ku mwari adzə shanga mji ka ɗəɗukur. Antə da ku nthləi kəra Sheba na ɓzər Bikri ka ndzəhəɓəla aka Yowab. Tə tsa ku mbur təmbəl antə mjirni ku təra kazhar bərni ni tə waskəi ku ngka ka ləha. Antə Yowab ku ngka adzə kuthli ahar Urushalima.

²³Yowab an ata kəra shanga sojayeri ar Israila, Benaiya na ɓzər Yehoyada an ata kəra mjir Kerethli ka Pelethli,

²⁴Ka Adoniram an ata kəra kəthlər dwali. Yehoshafat na ɓzər Ahilud an mdər kəsi su tə mdə ku rəbuta.

²⁵Sheva an sakatari, Zadok ka Abiyathlar an pristayeri,

²⁶ka tsuwa Ira na mdər Yayir an prist ar Dauda.