Read bura-pabir 2 Samiwal 21 Bible Online

2 Samiwal 21 - bura-pabir bible

2 Samiwal 21

¹Akwa sakar kuthlikur ar Dauda antə məi ku təri ata kər ata kər ar məva makər, antə Dauda ku kiɗə dlara akəla MTHLAKU. Antə MTHLAKU pəla, “Mi ngəni təri ni an kamnyar bikər tsi mdə natə Shawulu ka kutakəyirni hara. Kamnyar tə da ku kurəmta mjir Gibeyon.”

²Mjir Gibeyon aɗi mjir Israila wa, amma da an mjir Amor na ku mbili, mjir Israila ku hara alkawal abbər da aɗi ata tsi ɗa wa, amma Shawulu ku bara tsəgəi ɗa kamnyar tə tsa bara ka da ndzi akira Israila ka Yahuda. Apani antə Kuthli Dauda ku kəga mjir Gibeyon ka gari ala ɗa.

³Dauda ku yu mjir Gibeyon, “Man tə kəi hara ala giri ri? Laku madi tə kəi namtə daɓwa mburu ka giri sə vədzə barka aka mjir MTHLAKU ri?”

⁴Mjir Gibeyon shinau alari, “Wujir ngəni na akwa daɓwa yeru ka Shawulu kəga mjir kutakəyirni, kwaba amzhi kuriyari wa, wala an yiɗauri! Tsuwa yeru aɗi ka duna ka yeru tsi mdər Israila wala duku wa.” Dauda pəla, “Ka man tə giri ata bara kəi hara ala giri ri?”

⁵Da shinau aka kuthli, “Shawulu ku bara ka tsa shamta yeru karkar, natə wala mdə duku aɗi ata mbila akwa nca yeru akwa Israila wa.

⁶Antə ka mdə na ala yeru maɗashili murfa na akwa nyarmbwarni ka yeru tsi ɗa akəma MTHLAKU ahar Gibeya ar Shawulu vəi tə MTHLAKU ku carɓəla.” Antə kuthli pəla, “I ata hamta ɗa ala giri.”

⁷Kuthli Dauda ku zhar Mefibosheth, na ɓzər Jonathlan, na ɓzər Shawulu kamnyar alkawal tə tsa kəta akwa daɓwa ɗa ka Jonathlan na ɓzər Shawulu.

⁸Amma kuthli ku fatə Ammoni ka Mefibosheth na maɗa' Rizpa ngkwar Aiya, natə Rizpa ku ya aka Shawulu, ka maɗashili ntəfu ar Merab na ngkwar Shawulu, natə tsa ku ya aka Adriyel na ɓzər Barzillai na mdər Mehola.

⁹Tsa hamta ɗa aka mjir Gibeyon, antə da mbwamta ɗa ata kəra gar, adzə vəi vəngkər səli aka MTHLAKU. Antə shanga ɗa murfə ni ku mti ata kəma duku. Mdə ku tsi ɗa akwa baɗitər sakar thla barli.

¹⁰Rizpa na ngkwar Aiya ku kətə bufu ka pshari ata pirakthlya ka ndzəndzi ata baɗita akwa səɓəlar fakəu har tar tə yimi pwa ata kəra mshiyayeri akwa səghəi vəya. Tsa aɗi zhar ka ɗika səm ɗa təpci, wala mwaɓiyir mtaku aviri wa.

¹¹Sakatə Dauda ku nggatə su tə Rizpa na ngkwar Aiya, mwala raka ar Shawulu ku hara,

¹²antə Dauda ku mwari ka dlu ɗethlər Shawulu ka Jonathlan akəla mjir Yabesh akwa Gileyad. Mjir Yabesh ku nggwar fata akwa bəbal ar Beth Shan, vəi tə mjir Filistiya ku kukwamta mshiyir ɗa, vir tə da tsi Shawulu akwa Gilbowa.

¹³Dauda ku səntə ɗethlər Shawulu ka ɓzərni Jonathlan ka ɗethlər mji murfa natə mjir Gibeyon ku tsi, ka tsapta ata kəma duku.

¹⁴Da ku harəmta ɗethlər Shawulu ka ɓzərni Jonathlan akwa kulər baba' Shawulu, Kish, ahar Zela akwa tsəɗiyir Benjamin, ka hara shanga su tə kuthli ku tsawa. Aghəla nda antə Hyel ku nggatə kiɗər tsəɗi ni.

¹⁵Antə mpa ku jaktə thlata akwa daɓwa mjir Filistiya ka mjir Israila. Dauda ku ləghəi kəga mjirni ka da mpa mjir Filistiya. Antə akwa mpa na dukwari Dauda ku ghəri.

¹⁶Antə Ishbibenob duku akwa nyarmbwa gurjamayeri natə kəgəɓkur kəra mwasərni ar əmza ku hara apa kilogram makər ka reta, na mbwidzi ka katsakar bilən ku tamata abbər tsa ata tsi Dauda.

¹⁷Amma Abishai ɓzər Zeruwiya ku si adzə Dauda ka pwa ata kəra mdər Filistiya ni ka tsi ni. Antə sojayeri ar Dauda ku pəla alari abbər, “Ga aɗi ata jaktə ləɓəla akwa mpa kəga yeru wa, ta nyarmbwar kuthlikurər nga asə sha akwa Israila.”

¹⁸Aghəla ngəni antə mpa damwa ku jaktə thlata akwa daɓwa ɗa ka mjir Filistiya ahar Gob. Ata saka ndaga antə Sibbekai, mdər Husha ku tsi Saf, duku akwa nyarmbwa gurjamayeri.

¹⁹Aghəla nda mpa damwa ku thlata akwa daɓwa Filistiya ka Israila, ahar Gob. Elhanan na ɓzər Yari mdər Bethlelehem ku tsi Goliyath na mdər Gath na ka mwasu natə zwalari kəkəsu apa udzəm gargar tsa puwa.

²⁰Antə mpa damwa ku jaktə thlata ahar Gath, vəi tə gurjam laga aɗi na ka kuleng tsiyari ngkwa ngkwa ka kuleng səlari ngkwa ngkwa, da sərkumari ka nfwar ata kəma duku. Tsa ma tsa səɓəla akwa nyarmbwar mji na gurjam gurjam ni.

²¹Antə sakatə mdə ni hara mnya ɗimi aka mjir Israila, antə Jonathlan na ɓzər Shimeyi, na ɓzərma' Dauda ku tsi ni.

²²Nayeri ni an mji nfwar na akwa nyarmbwar mji na gurjam gurjam ahar Gath natə Dauda kəga sojayeri arni ku kurəmta.