Read bura-pabir 2 Samiwal 22 Bible Online

2 Samiwal 22 - bura-pabir bible

2 Samiwal 22

¹Dauda ku hara ha aka MTHLAKU ka ndərayeri ngəni sakatə MTHLAKU ku msərantə ni akwa tsiya dawayeri arni ka akwa tsiya Shawulu.

²Tsa pəla MTHLAKU ga an vəi ɗuwardzərna, ga an katanggarna ka mdər mbantə ra.

³Hyelərna an vəi ɗuwardzərna ka mdər mbantə ra. Ga an partauwurni ka kari mparna na ka duna. Ga an vəi ɗuwardzərna na ka duna mdər mbantə ra ta maɗa' shambar.

⁴I ana kəga nga MTHLAKU, antə ga ana mbantə ra ta dawarna. I ata hu nga MTHLAKU!

⁵Kamnyar yimər mta ku fatə səli, pərtu ar mta ku təra ka iya.

⁶Səwur mta ku pərta ra. Shiwa ar mta ku ngkəi səli.

⁷Akwa ɗar bwaniyirna I ku kəga MTHLAKU. I ku kəga nga Hyelərna kamnyar dlara. Akwa vəi vəngkər səli ala ga, ga ku nggatə kurakəi, ga ku nggatə ra sakatə I ku tuwa.

⁸Duniya ku kədza ka kənggərantədzi. Səla vəi na amtazi ku kənggərantədzi, kamnyar ɗəffari ku ɓzi.

⁹Ɗer ku səɓəla akwa kucira ga, kyanggyara u'u ku səɓəla akwa mnya ga, vina na ata mba ku puɓəladzi akwa mnya ga.

¹⁰Ga ku kəlar vəi na amta ka səghəi, dlamba na mənggəl an akira səla ga.

¹¹Ga ku fəltə kerubayeri ka səghəi, Ga ku mwa ata ɓəɓəka shambar.

¹²Ga ku namtə kuthlu an səva ata kəra ga, zhimaru na mənggəl an kalaktə nga.

¹³Atar səɓəlar parakəu na ata mbəla adzə nga vina ku tamtə u'u.

¹⁴MTHLAKU ku dləra amtazi, kuraka ga ku ndəra amtazi.

¹⁵Ga ku sha afayeri ka titiləmta dawayeri, ka wurka ka dləra ga ku kədləmta ɗa.

¹⁶Kira yimi ku ndzi ata bəbal. Səla duniya ku ndzi ata bəbal. Atar mpa sur nga MTHLAKU, Atar uftiyir shambar na səɓəla akwa kucira ga.

¹⁷Ga ku haghəi tsiya ga ka mbantə ra, Ga ku kəɓəla ra kazhar yimi na zurang.

¹⁸Ga ku msərantə ra akəla dawayeri arna na ɓəɓal akwa tsiya mji na nggəlar ra, kamnyar da ku təra duni.

¹⁹Da ku si ata kəri sakatə I kula duna, amma MTHLAKU ku msərantə ra.

²⁰Ga ku kəɓəla ra kazhar asar. Ga ku msərantə ra kamnyar ga ku nggatə msərakurərna.

²¹Ga ku na ali watsəɓərna MTHLAKU, kamnyar tə I ana kələngkər ala ga, Ga ku ntəmta ra kamnyar tə I kula biku.

²²Kamnyar tə I ku ɓəlatə tsawur nga, MTHLAKU. I aɗi shinardzi kazhar Hyelərna wa.

²³Kamnyar I ku ɓəlatə shanga tsawur nga. I aɗi psəmta surthlipər ngə wa.

²⁴I aɗi hara su na ɗimi ata nca ga wa, I ku ɓəlatə kərna ta hara biku.

²⁵Antə apani ga ku na ali watsəɓərna, MTHLAKU kamnyar tə I ku kələngkər ala ga, kamnyar tə I kula biku.

²⁶Aka mji na ka jirkur ga ana nghyantə alkawalər nga, aka mji na pwa ga ku ndzi ɓɗaku ka duna.

²⁷Ga ana hara ɓɗakkur aka mji na ka ɗəffa ɗa mwapu ga an kuzəkər mji na ana zamba.

²⁸Ga ana mbantə mji na ka tərghəikər, amma ga ana kəlghəi mji na ka kər olkur.

²⁹Ga an pitəlar na, MTHLAKU, ga ana hara ka kuthlu ndzi parakəu ali.

³⁰Ga ana ni duna kəi dlidlirəmta dawayeri arna, ga ana ni duna kəi ndlamta katangga.

³¹Hyelərna, lakur nga an kula vəi sha, ndərər nga an jiri MTHLAKU, ga an partau aka mji na hwi si adzə nga.

³²MTHLAKU, ga shinga an Hyel ga shinga an vəi ɗuwardzər yeru.

³³Hyel, ga an vəi ɗuwardzərna na ka duna ga ku msərantə ra ka vu ra akwa laku.

³⁴Ga ana namtə səli ɓəɓatu apa səla kimar ga ana ɓəlatə ra ata kəra gar.

³⁵Ga ku thlipta ali lakur mpa ka tsi kətsə yimər lali na ɓəɓal ta shang.

³⁶Ga ana na ali partauwur nga na ana mbantə mpikəi, ga ku nggatə adduwarna ka namtə ra mdə ola.

³⁷Ga ku tsarəmta ali laku antə I aɗi tsamta səli wa.

³⁸I ku kədla dawayeri arna ka kurəmta ɗa. I aɗi thləthlatə wa tar tə I ku kuri ka da.

³⁹I ku ntsəntsəvəmta ɗa ka kurəmta ɗa, apani da aɗi mzhi thlatə wa, I ku dlidlirəmta ɗa akira səli.

⁴⁰Ga ku dunautə ra kamnyar mpa, ka hara tə dawayeri arna ku pəpəi akəmi.

⁴¹Ga ku hara tə dawayeri arna ku hwi akəmi, antə I ku shamta mji na nggəlar ra.

⁴²Da ku bara dlara, amma mdər mbantə ɗa aɗi wa, da tuwa aka MTHLAKU amma tsa aɗi shinau ala ɗa wa.

⁴³I ku hadləmta ɗa tə da ku ndzi apa bərbər, I ku ntsəntsartə ɗa apa maɓu ata layi.

⁴⁴Ga ku msərantə ra ta mji na ka kəra ɗa ɓəɓal, ga ku namtə ra kəi ndzi ata kəra mji, mji natə I aɗi səndə wa, da ku ndzi mafarna.

⁴⁵Mətəpiyayeri ku si ka zuzuri akəmi, təkəma tə da nggatə ra, da ku kələngkər ali.

⁴⁶Dza da ku mti, da ku səɓəla akwa katanggar ɗa akwa kədza.

⁴⁷Ga an MTHLAKU na ka mpika! I ata hu nga! Ga an vəi ɗuwardzərna na ka duna. I ata na gə səli kamnyar ga ku mbantə ra!

⁴⁸Ga ku na ali nggyari su ata kəra dawayeri arna. Ga ku hangkir mji aka kuthlikurərna.

⁴⁹Ga ku mbantə ra ta dawayeri arna, ga ku vətə ra ata kəra dawayeri, ka msərantə ra ta sojayeri.

⁵⁰Kamnyar ngəni I ata hu nga MTHLAKU, akwa nca mji, kəi fwaltə thləma ga akwa hayeri.

⁵¹Ga ana nar nggyari su aka kuthlir nga, ga ana ncantə hirkur tədəku aka mdə natə ga ku carɓəla, aka Dauda ka kəkayeri arni ba saka madi.