Read bura-pabir 2 Samiwal 23 Bible Online

2 Samiwal 23 - bura-pabir bible

2 Samiwal 23

¹Dauda an ɓzər Yesse, natə Hyel ku namtə ni mdə na ola, natə Hyelər Yakub ku carɓəla ka tsa ndzi kuthli, na ku hara ha na msəra aka Israila. Ngəni an ndərayeri na aghəl ta shang ar Dauda:

²“Mambələr MTHLAKU ku gari atar na, labar arni an akwa mnyi.

³Hyelər Israila ku ndəra, mdər ɓəla Israila ku pəla ali, na ku hara kuthlikur ata kəra mji ka jirkur, na ku hara kuthlikur ka thlivər Hyel,

⁴tsa ana ndzi apa parakər səɓəlar pci na ɗəɗəpa kula dlamba, apa parakər pci na aghəla tərər yimi, apa yimi na ana hara ka kusar ptsa ata di.

⁵Apani antə Hyel ku vədzə barka aka kəkayeri arna, kamnyar tsa ku hara ali alkawal na ba saka madi. Tsa ku ɗəmhə shanga su, antə tsa aɗi ata ɓəli alkawalər ni wa. Kamnyar tədəku tsa ata dlar ra ka na ali shanga su tə I ata mwaɓari

⁶Amma mji na ɗimi an apa mtəhəra tə mda ana pumta ka mbamta mda amzhi tsəkwarari ka tsi wa.

⁷Kəlara mdə na ata nthlə mtəhəra tsa ana kəsi ka zwal liya wala zwal mwasu, ka mbamta ɗa tuktukku tsu anda.”

⁸Nayeri ni an thləma katsalayeri ar Dauda: Yosheb Basshebeth, mdər Takemon, tsa an ola akwa nca katsalayeri na makər ni. Tsa ku tsi mji aru ncisu ka mwasərni akwa mpa duku.

⁹Na ata nu ni an Eleyazar, ɓzər Dodo na akwa nyarmbwar Ahohi. Tsa ka Dauda an thləthlatə ka mpa mjir Filistiya sakatə mjir Israila ku hwi.

¹⁰Tsa ku thləthlatə ka mpa ka mjir Filistiya har tə tsiyari ku ghəri ka ulantədzi ka katsakar ni natə tsa amzhi kəlarari wa. Vir nda MTHLAKU ku səntə nggyari su na ola. Antə sojayeri ar Israila ku sə ngka adzə Eleyazar amma təng kamnyar ka da fəi kari mji natə da kurəmta daci.

¹¹Na ata nu ni an Shamma ɓzər Agi ahar Hara. Sakatə mjir Filistiya ku tsaptədzi ahar Lehi akwa vəi fakər tsər, sojayeri ar Israila ku hwi,

¹²amma Shamma ku thləthlata ata ɗəffa fakə ni ka mbuli ɗa. Tsa ku tsəgəi mjir Filistiya. Antə MTHLAKU ku hamta nggyari su na ola aka Israila.

¹³Akwa sakar nthlə mthli antə mji makər akwa nca katsalayeri makkumari ku si adzə Dauda akwa kur Adullam. Ata saka nda mjir Filistiya ku latə vəi mpar ɗa akwa mular mjir Refa.

¹⁴Ata saka ndaga Dauda akwa vəi ɗuwardzi na ata gar, antə mjir Filistiya ku dlutsə Bethlelehem ka ndzəndzi anda.

¹⁵Dauda ku mwaɓa ka pəla, “Ya wan akətsa ali yimi na akwa jiɓə na kudzəhə ka nyarfur ləvəi akwa Bethlelehem kəi sari ri?”

¹⁶Apani katsalayeri na makər ni ku tərkwa nca mjir Filistiya ka kətsə yimi akwa jiɓə na kudzəhə ka nyarfur Bethlelehem ka sənta aka Dauda. Amma tsa nggəlari ta sa ri ata vəyari, tsa pwi ata di apa saɗaka aka MTHLAKU.

¹⁷Tsa pəla aka MTHLAKU, “I amzhi sa yimi ngəni wa! Kamnyar ata ndzi apa sa mamshir mji na psəmta mpika ɗa ka səntə yimi ni.” Antə Dauda aɗi sa wa. An su tə katsalayeri na makər ni ku hara.

¹⁸Abishai na ɓzərma' Yowab ɓzər Zeruwiya an olər katsalayeri na makkumari ni. Tsa ku tsəgəi mji aru makər ka mwasərni, antə thləmari ku tuwa apa mji na makər ni.

¹⁹Thləmari ku tuwa akwa nca mji makkumari ni antə tsa ku ndzi olər ɗa, amma tsa aɗi mzhitə mji na makər nda wa.

²⁰Benaiya na ɓzər Yehoyada an soja na mulmulari ahar Kabzeyel. Tsa ku hara suayeri na ol'ola. Tsa ku tsi katsalayeri suɗa ar Mowab na masəku ta shang. Tsa ku ləkwa ku akwa sakar vəi mtathlaku na mwavər ka tsi tsəngi akwa.

²¹Tsa ku tsi mdər Masar laga na dakwi. Wala tə mdər Masar ni ka mwasu akwa tsiyari Benaiya ku mwari ka zwal ka dlutsə mwasu akwa tsiya mdər Masar ni ka tsi ni ka mwasərni surni.

²²Nayeri ni an su tə Benaiya ɓzər Yehoyada ku hara, antə thləmari ku tuwa apa katsalayeri na makkumari ni.

²³Thləmari ku tuwa akwa nca ɗa na makkumari ni amma aɗi mzhita ar katsalayeri na makər ni wa. Antə Dauda ku vəi ni ata kəra mjir sək kərari.

²⁴Akwa nca katsalayeri na makkumari an, Asahel na ɓzərma' Yowab, ka Elhanan na ɓzər Dodo mdər Bethlelehem,

²⁵ka Shamma mdər Harod, ka Elika mdər Harod,

²⁶ka Helez ahar Palti, ka Ira na ɓzər Ikkesh mdər Tekowa,

²⁷ka Abiyezer mdər Anathloth, ka Mebunnai, mdər Hushath,

²⁸ka Zalmon mdər Ahohi, ka Maharai mdər Netofa,

²⁹ka Heleb ɓzər Baana ahar Netofa, ka Ittai ɓzər Ribai ahar Gibeya akwa Benjamin,

³⁰ka Benaiya mdər Pirathlon, ka Hiddai na akwa zərkayeri ar Gaash,

³¹ka Abiyalbon mdər Araba, ka Azmaveth mdər Bahurim,

³²ka Eliyaba ahar Shaalbon, maɗa' Yashen, ka Jonathlan,

³³ka Shamma mdər Harari, ka Ahiyam na ɓzər Sharar mdər Harari,

³⁴Elifelet na ɓzər Ahasbai mdər Maaka, ka Eliyam na ɓzər Ahithlofel mdər Gilo,

³⁵ka Hezro mdər Karmel, ka Paarai mdər Arba,

³⁶ka Igal na ɓzər Nathlan mdər Zoba, ka Bani mdər Gad,

³⁷ka Zelek mdər Ammon, ka Naharai mdər Beyeroth mdər kəsi kari mpa aka Yowab na ɓzər Zeruwiya,

³⁸ka Ira ka Gareb na mjir Yithri,

³⁹ka Uriya mdər Hitti. Shanga ɗa ata kəma duku da makkumari ka murfa.