Read bura-pabir 2 Samiwal 24 Bible Online

2 Samiwal 24 - bura-pabir bible

2 Samiwal 24

¹Ɗəffa MTHLAKU ku jaktə mba ni ata kəra mjir Israila ka damwa, antə tsa ku tsukta Dauda ka mjir Israila ka pəla, “Mwari ka ra jikatə mjir Israila ka mjir Yahuda.”

²Antə kuthli pəla aka Yowab ka sojayeri na ol'ola ar Israila, “Mwar giri, akwa nca durayeri ar Israila, thlata akwa Dan ka mwari akwa Beyersheba, ka giri jikatə mji na ata mzhi ləkwa mpa. I ata bara kəi səndə hangkurər ɗa.”

³Amma Yowab shinau aka kuthli, “Ka MTHLAKU na Hyelər nga hara ka sojayeri jakə vəyari aru ka təramta na kulini. Tsuwa ka tsa hara akwa sakar nga ka nca ga wuta. Amma kamnyar mi tə ga ata bara hara su apani ri?”

⁴Amma kuthli aɗi hir pali dzamərni wa, antə Yowab kəga sojayeri na ol'ola ku təra mwari ra jikatə mjir Israila.

⁵Aghəla tə da ku fəlɓəla Thlyagha Jodan, antə da baɗitə jika mji na akwa bərni Arower, ka bərni damwa na ata ɗəffa mular. Da mwari akwa tsəɗiyir Gad har ka mzhitə Yazer na akwa yala.

⁶Aghəla nda antə da mwari akwa tsəɗiyir Gileyad ka ləhar Kadesh na akwa tsəɗiyir mjir Hitti. Sakatə da zhar Kadesh antə da mwari akwa Dan ka Iyon ka kalaktə təbwar Sidon.

⁷Thlatər ɗa anda antə da ku nu anəm ka mwara akwa bərni Taya na akwa katangga, ka təra akwa bərniyayeri ar mjir Hivi ka mjir Kanana. Da sə tsikəra mwar ɗa ahar Beyersheba na akwa anəmər Yahuda.

⁸Apani sakatə da ku dlarhə shanga tsəɗi ni, da ku ngka ahar Urushalima akwa kurər thliya pal pal əmdla ka vir sərkumari.

⁹Antə Yowab ku ngka ka pəla aka kuthli abbər, “Akwa Israila mji shili na ata mzhi ləkwa mpa ku hara dəpu aru ncisu, ka akwa Yahuda mji dəpu aru ntəfu.”

¹⁰Aghəla tə Dauda ku kuri jikatə shanga mji, təng tsa ɗangta abbər ma tsa an səndə tsa ahara wa. Antə tsa pəla aka MTHLAKU, “I ku hara biku na ola akwa su tə I ku hara ni, antə usa, ka gə tifəmta ali. MTHLAKU. I ku hara su apa caku.”

¹¹Akwabə Dauda athlatə səɓəla ɗəpari, MTHLAKU ku gari aka naɓi Gad na mdər wulsu aka Dauda abbər,

¹²“Mwari ka ra pəla aka Dauda abbər I ata na alari bwaniyayeri zumzum makər. Antə ka tsa carɓəla pal akwa nca ɗa natə kəi hara alari.”

¹³Antə Gad ku mwari adzə Dauda ka pəla alari su tə MTHLAKU pəla abbər, “Madi tə gə carɓəla ri akwa su ngəni makər nə ri? Ka mi təri ata kəra tsəɗiyir nga ar məva murfa ya? Nənga ka gə ndzi akwa hwi akəma dawar nga tə da ata kədla nga ar thliya pal pal makər ri? Nənga ka shilku təri ata kəra tsəɗiyir nga ar vir makər ri? Dzama ka ra pəla ali su tə kəi ra pəla aka MTHLAKU na thlentə ra.”

¹⁴Dauda shinau ka pəla aka Gad, “I ku ləkwa bwani, kamnyar car su ngəni an mwavər kamta. Amma kuji ka MTHLAKU ka kərni an ɗi yeru, kamnyar tsa ana kətadzə mda. Amma tsa aɗiya hir kəi tərkwa tsiya mdə wa.”

¹⁵Antə MTHLAKU ku thlentə shilku ata kəra Israila baɗitə ɗəɗəpa nda ka mwanta aka sakatə MTHLAKU ku thlamta. Antə baɗita akwa Dan ka mwanta akwa Beyersheba mji dəpu murfəkumari ku kurəmtadzi.

¹⁶Sakatə mdərthlentərhyel ni ku ndəraɓəla tsiyari təbwar Urushalima abbər tsa ata shamta bərni ni, təng MTHLAKU baɗitə kətadzə mjirni, ka pəla mda aɗi ata harari kəra wa. Antə tsa pəla aka mdərthlentərhyel na akwa hara bwani aka mji ni abbər, “Zhari! Ngkaghəl tsiya ga!” Ata saka nda mdərthlentər MTHLAKU ni adzə vəi dəkə mthli ar Arauna na mdər Yebusi.

¹⁷Sakatə Dauda wutə mdərthlentərhyel na ata tsəgəi mji ni, antə tsa pəla aka MTHLAKU abbər, “I an ka biku ni. I na mdər ɓəla ni an hara su na ɗimi ni. Mji nayeri ni ndzi apa təmarna, su aɗi na vu ɗa wa! Usa, zhar ɗa kara ɗi ra kəga mjir kutakəyirna daci.”

¹⁸Akwa vir ndaga Gad ku mwari ka pəla aka Dauda, “Mwari ka gə həntə bagaɗi aka MTHLAKU ata laliyir Arauna na mdər Yebusi.”

¹⁹Antə Dauda ku mwari apatə MTHLAKU ku tsawa alari atar Gad.

²⁰Sakatə Arauna ku wutə kuthli kəga mjirni akwa si atar ni, tsa ku ləɓəla ka zuzuri akəma kuthli ka nar səli.

²¹Arauna pəla aka kuthli abbər, “Ka barkar nga, kamnyar mi tə gə si adzə ra ri?” Dauda shinau alari ka pəla, “I sə masə laliyir ngə ni, kəi həntə bagaɗi aka MTHLAKU, kamnyar ka shilkə ni thləthlata.”

²²Arauna pəla aka Dauda, “Kəta kəlara su tə ga akwa barari, ka barkar nga, ka gə hamta saɗaka kəgari. Nggədza gyalayeri kamnyar saɗaka mbamba. Tsuwa nggədza udzəm dəka ka gang ar wulya thla kara mbahə u'u ni kəgari.

²³I ku hamta ɗa shang ala gə ka kiɗa abbər MTHLAKU na Hyelər nga ata jaktə dlu nga.”

²⁴Amma kuthli shinau aka Arauna, “Awa, I ata ntəmta kwabari. I aɗi ata hamta aka MTHLAKU na Hyelərna saɗaka mbamba ka su na kula I ghəra akwa wa.” Antə Dauda ku mastə vəi ni kəga gyalayeri ni ata kəra liyar adzərfa ntəfkumari.

²⁵Antə Dauda ku həntə bagaɗi aka MTHLAKU anda, ka hamta saɗaka mbamba ka saɗakar jakə mwardzi ata. Apani antə MTHLAKU ku nggatə kiɗər Dauda ata vəya tsəɗi ni, antə shilku na ata kəra Israila ku thləthlata.