Read bura-pabir 2 Samiwal 3 Bible Online

2 Samiwal 3 - bura-pabir bible

2 Samiwal 3

¹Mpa na akwa daɓwa mjir Shawulu ka mjir Dauda ku ləkəma ka fi. Dauda ku ləkəma ka ndzi ka duna amma duna mjir Shawulu ku ləkəma ka kəmtadzi.

²Nayeri ni an maɗashili natə mdə ku yaɓəla aka Dauda ahar Hebron: Amnon an ɓzəra olari, natə mama'ni an Ahinowam ngkwar di Yezireyel,

³na suɗkur an Kileyab, natə mama'ni an Abigyal na mwalar msha Nabal ahar Karmel, na makərkur Absalom na ɓzər Maaka ngkwar kuthlir Talmai ahar Geshur.

⁴Na nfwarkur Adonija, na ɓzər Haggith, na ntəfkur Shefatiya, na ɓzər Abital,

⁵na ngkwakur an Ithreyam na ɓzər Egla. Shanga maɗashili ni mdə ya ɗa ahar Hebron.

⁶Apatə mpa ni ku ləkəma akwa daɓwa Dauda ka sojayeri ar Shawulu, Abner ku ləkəma ka ndzi ka duna akwa nca shanga mjir Shawulu.

⁷Shawulu ka mwala ngkyar laga ka thləmari Rizpa, na ngkwar Aiya. Vir laga Ishbosheth na ɓzər Shawulu ku yu mnya Abner abbər, kamnyar mi tə tsa pi ka Rizpa ri?

⁸Su ngəni ku ɓzamtə ɗəffa Abner. Antə tsa pəla, “Ga tamatə I ata səm mdəkur Shawulu ya? Nənga ga tamata abbər I kila na kula kər akwa kəthlər aka Yahuda ri? Tsu akwa baɗitari I ku ndzi ka jirkur aka baba' nga Shawulu, ka maɗama'ni kəga pazhayeri arni antə I ku msərantə nga akwa tsiya Dauda. Amma ashina antə ga ata pangkər ali su ata kəra mwala ngəni!

⁹Ka Hyel tsi ra ma I aɗi dlar Dauda ka tsa wutə su tə MTHLAKU ku hara alari alkawalari wa.

¹⁰MTHLAKU ku hara alkawal aka Dauda abbər tsa ata kələmta kuthlikur kazhar kutakəyir Shawulu ka tsa vəi Dauda ata kəra Israila ka Yahuda, thlata akwa Dan ka mwanta akwa Beyersheba.”

¹¹Ishbosheth aɗi shinangkər aka Abner wa kamnyar tsa akwa thlivər ni.

¹²Abner ku thlentə mji aka Dauda ahar Hebron, ka pəla alari, “Kulini ga an ata ndzi kuthlir tsəɗi ngəni. Ma mwa mbwi alkawal, I ata vu ka shanga mjir Israila nu nga.”

¹³Antə Dauda pəla, “Ɓɗaku! I ata hara ala ga alkawal, amma ntangkəma tar ma gə sənta ali Mikal, na ngkwar Shawulu katagu.”

¹⁴Antə Dauda ku thlentə mji aka Ishbosheth ka pəla, “Hamta ali mwalankiya Mikal, natə I ntə puwa ar kələrni ka kəsəm zəmbuləma mjir Filistiya aru pal.”

¹⁵Apani antə Ishbosheth ku dlutsə Mikal akəla salngkiɗa, Paltiyel na ɓzər Layish.

¹⁶Paltiyel nutə ni ka si akwa kuta di Bahurim ka tuwa. Amma Abner pəla alari, “Ngka ka ra laha”, antə tsa ngka.

¹⁷Abner ku mwari adzə mji ol'ola ar Israila ka pəla ala ɗa, “Tsu ɗəm antə giri ku bara ka Dauda ndzi kuthlir giri.

¹⁸Kulini ja an sakari, ka giri ɗangta abbər MTHLAKU ku pəla, ‘I ata sə thlentə buɗarna Dauda ka tsa msərantə mjirna Israila akwa tsiya mjir Filistiya ka shanga dawayeri arɗa.’ ”

¹⁹Abner ku gari tsuwa aka mji na akwa nyarmbwar Benjamin ka təra mwari ahar Hebron ka pəla aka Dauda su tə mjir Benjamin ka Israila ku ɗəmhə ka da hara.

²⁰Sakatə Abner ka mji sərkumari ku si adzə Dauda ahar Hebron Dauda ku hara susəma na ola ala ɗa.

²¹Abner pəla aka Dauda, “I ata mwari kulini kəi tsaptə shanga mjir Israila ka da hara alkawal aka kuthli na mthlakərna. Da ata hara alkawal ala ga ka namtə nga kuthlir ɗa. Antə ga ata mzhi hara shanga su tə ɗəffa ga hira, ka hara kuthlikur ata kəra shanga tsəɗi ni.” Apani antə Dauda ku salamtə Abner tə tsa təra lapiya.

²²Təkəma aghəla nda antə Yowab ka sojayeri ar Dauda ku ngka akwa dləra ka kari hang tə da fatsa. Abner aɗi anda ahar Hebron kəra wa kamnyar Dauda ku kurtə salamtə ni tə tsa ku təra lapiya.

²³Sakatə Yowab kəga sojayeri arni ku mzhita, mji ku pəla alari abbər Abner na ɓzər Ner ku si adzə Kuthli Dauda antə tsa ku pwarɓəla ni tə tsa təra lapiya.

²⁴Antə Yowab ku mwari adzə kuthli ka pəla, “Man tə gə hara nə ri? Abner si adzə nga, kamnyar mi tə gə zhar ni tə tsa təra ri?

²⁵Ai ga asəndə surharar Abner tsa si ka tsa pwaktə nga ka tsa wulɓəla shanga vəi mwarər nga, ka shanga su tə ga ana hara.”

²⁶Aghəla tə tsa ku ləɓəla kazhar Dauda, Yowab ku thlentə mji ka da ngka ka Abner. Antə da kəli ni adzə jiɓər Sira ka ngka ka tsa. Amma Dauda aɗi səndə su ata kər wa.

²⁷Sakatə Abner ku si ahar Hebron, antə Yowab ku kəgamta ni apa tsa ata bara gari alari, tsa shini. Tə Yowab ku mwantə Abner akwa pal akwa nca mbwayeri na akwa nyarfur di ka ntsəvəmta ni akwa kutari. Yowab ku tsi ni kamnyar Abner ku tsi Asahel na ɓzərma' Yowab.

²⁸Aghəla sakatə Dauda ku nggatə labar ni, antə tsa pəla, “MTHLAKU asənda abbər yeru kəga mjirna aɗi ka bikər tsi Abner wa.

²⁹Ka bikər tsi Abner ndzi ata kəra Yowab ka shanga kutakəyirni! Akwa kəlara zaman, ndzi ka mdə wutə mda akwa kutakəyirni na ka kwadakəli, wala haju, wala mdə na ana kuri wujir wa, wala mda tə mda ata tsiyari akwa mpa, wala mdər tur susəma!”

³⁰Apani antə Yowab ka ɓzərma'ni Abishai ku ntəskur ata Abner kamnyar ɓzərma'ɗa tə tsa tsi akwa mpa ahar Gibeyon

³¹Antə Dauda vu Yowab kəga mjirni ka da thləhumta ləptər ɗa, ka da hata dasa kamnyar tuwa Abner. Antə ata vəi tuwa ni Kuthli Dauda ku pwar mshiyir Abner.

³²Antə mdə ku harəmta Abner ahar Hebron, antə kuthli ku tuwa ka kuraku ata kul ni tə shanga mji ku tuwa tsuwa.

³³Dauda jikatuwar Abner apani: “Kamnyar mi tə tar ka Abner mti apa kəgaɓu ri?

³⁴Tsiyari aɗi mbwimbwiyari wa, səlari aɗi akwa məsəsal wa. Tsa ku mti apa mdə natə maɗa' shambar an tsi ni!”

³⁵Antə har tə pci təri mji akwa kiɗə kəra Dauda ka tsa səm susəma, amma tsa ku hara alkawal ka pəla, “Ka Hyel tsi ra ma I ku səm susəma akəmata pci atəri!”

³⁶Mji ku wutə su ngəni antə ku ndzi msəra ala ɗa. Jiri shanga su tə kuthli ku hara ku kəskəra mji.

³⁷Shanga mjir Dauda ka shanga mji na akwa Israila ku nggaɓəla vir nda abbər mnya kuthli aɗi akwa tsi Abner wa.

³⁸Antə Kuthli ni pəla aka kwakunayeri arni, “Giri aɗi nggaɓəla abbər mdə na ola ku mti akwa Israila ashina wa ya?

³⁹Wala tə I an kuthli tə mdə ku vəi, I ku ndzi kula duna ashina. Maɗa' Zeruwiya, ku ndur duni. Ka MTHLAKU ɗi mdə na hara biku ni kalkal ka ɗimikurərni.”