Read bura-pabir 2 Samiwal 4 Bible Online

2 Samiwal 4 - bura-pabir bible

2 Samiwal 4

¹Sakatə Ishbosheth na ɓzər Shawulu ku nggata abbər Abner ku mti akwa Hebron dzari ku mti tə shanga mjir Israila ku yakatədzi.

²Ishbosheth ka mji suɗa na ana pwar mji akwa dləra, da an Baana ka Rekab, maɗa' Rimmon, na ahar Beyeroth akwa nyarmbwar Benjamin. Beyeroth ku ndzi apa bwadukwa mjir Benjamin.

³Mjir Beyeroth na baɗitə ndzi anda ntangkəma ku hwi ka ləhar Gittayim ka ndzəndzi anda.

⁴Kəka Shawulu aɗi na ɓzər Jonathlan ka thləmari Mefibosheth natə tsa ka məvari ntəfu sakatə mdə ku tsi Shawulu ka Jonathlan. Sakatə da nggatə labarər mtər ɗa na thlata akwa bərni Yezireyel, antə mwala na ana wul ni ku kətə ni ka hwi ka tsa. Amma tsa akwa huva antə ɓzəngkyar ni ku təri alari, antə tsa ku ndzi nggurdəkəi.

⁵Baana ka Rekab na maɗa' Rimmon mdər Beyeroth, ku ləɓəla kamnyar bara Ishbosheth aharngkiɗa antə da si ata kərathlər pci sakatə tsa akwa ghərəmtaghəra.

⁶Mwala na andzəndzi anyarmbwa akwa tanggər alkama ni akwa nggətə heni, antə heni ku kəli ni. Antə Rekab ka Baana ku nggwar ləmbwa.

⁷Sakatə da ku ləkwa mbwar piyir Ishbosheth ka wutə ni ata vəi piyir ni, antə da ku ntsəvə ni ka tsi ni ka nthləi kərari. Antə da kətə kərari ni ka mwa har tə viri kura ala ɗa akwa Mular Jodan.

⁸Da mwantə kər ni aka Kuthli Dauda ahar Hebron ka pəla, “Nggədza kəra Ishbosheth, ɓzər Shawulu dawar nga, na ku bara tsi nga. Ashina MTHLAKU ku hir ka gə ntəmta dawakur ata kəra Shawulu kəga nyarmbwar ni.”

⁹Dauda shinau aka Rekab ka ɓzərma'ni Baana maɗa' Rimmon na ɓzər Biyeroth abbər, “I ku kahyel ka thləma MTHLAKU na ka mpika, na ku msərantə ra ta shanga asar!

¹⁰Mdər thlentə na si adzə ra akwa Zigklag ka pəla ali mtər Shawulu ku tamata abbər tsa ku sənta ali labar na msəra. I ku ngkəi ni ka tsi ni. An watsəɓərni ar labarərni ni!

¹¹Ata ndzi ɗimi ta shang aka mji na ku ra tsi mdə na kula biku ata vəi pi ambwar ngkiɗa! I ata ntə dawa ata giri kamnyar tə giri ku tsi ni antə I ata shamta giri ata kəra duniya!”

¹²Dauda ku tsawa antə sojayeri arni ku tsi Rekab ka Baana ka thləthlamta tsiya ɗa ka səla ɗa, tə da hahəi ɗa adzə kufa laga akwa Hebron. Da ku kətə kəra Ishbosheth ka harəmta akwa kulər Abner ahar Hebron.