Read bura-pabir 2 Samiwal 5 Bible Online

2 Samiwal 5 - bura-pabir bible

2 Samiwal 5

¹Antə shanga nyarmbwayeri ar Israila ku si adzə Dauda ahar Hebron ka pəla alari, “Yeru an mamshir nga.

²Akwa saka na ku təramta tə Shawulu an kuthlir yeru, ga an ku pwar mjir Israila ka ngka ka da akwa mpa, antə MTHLAKU ku hara alkawal ala ga abbər ga ata sə pwar mjirni ka sə ndzi kuthlir ɗa.”

³Sakatə shanga mji ol'olər Israila ku si adzə Kuthli Dauda ahar Hebron, antə tsa ku mbwi alkawal ka da akəma MTHLAKU. Antə da ku bartə kərari tə tsa ndzi kuthlir Israila.

⁴Dauda ka məvari makkumari sakatə tsa baɗitə hara kuthlikur, antə tsa ku hara kuthlikur ar məva nfwarkumari.

⁵Tsa hara kuthlikur akwa Hebron ata kəra Yahuda ar məva murfa ka reta, ka akwa Urushalima ata kəra shanga Israila ka Yahuda ar məva makkumari ka makər.

⁶Kuthli Dauda kəga mjirni ku təra ləhar Urushalima ka ra dlər mjir Yebusi na andzəndzi anda. Mjir Yebusi tamata abbər Dauda aɗi ata mzhi nggyari bərni ni wa, antə da pəla alari, “Ga aɗi ata mzhi si azi wa, kamnyar wala mdlyang ka nggurdəkəi ata mzhi ngkatə nga ta səvi.”

⁷Amma Dauda ku səm bərni Sihiyona, natə mda ana kəga abbər, “Bərniyir Dauda.”

⁸Sakatə ndər ɗimi ar mjir Yebusi ni ku mzhitə Dauda, antə tsa pəla aka sojayeri arni, “Nu giri gular yimi ni ka giri ləkwa bərni ni, ka giri tsəgəi mjir Yebusi na mdlyang ka nggurdəkəi. I aɗi ata bara ɗa wa.” Ngəni an baɗitər sur pəla na abbər, “Mdlyang ka nggurdəkəi aɗi ata ləkwa mbwar vəngkər səli aka MTHLAKU wa.”

⁹Aghəla tə Dauda ku nggyari di na akwa katangga ni, antə tsa ku ndzəndzi akwa ka nar thləm abbər, “Bərniyir Dauda.” Tsa ku kalaktə di ni ka hənayeri baɗita akwa Millo har ka vədza aka zarar kuthli.

¹⁰Antə Dauda ku ləkəma ka ndzi kuthli na ka duna kamnyar MTHLAKU na ka dunar dlamar sojayeri adzə ni.

¹¹Kuthli Hiram ar Taya ku thlentə mji aka Dauda. Tsa thlenta alari katako ka kapəntayeri, ka mjir hən ka pela ka da hənta alari kəi kuthli.

¹²Apani antə Dauda ku nggaɓəla abbər MTHLAKU ku vəi ni kuthlir Israila ka namtə kuthlikur arni ka duna kamnyar mjirni.

¹³Aghəla tə Dauda ku ɗuwa kazhar Hebron ka ləhar Urushalima, tsa ku fatsa ngkwarkəmayeri kəga mwanki damwa. Antə mwankirni ku ya alari maɗashili kəga maɗankwi.

¹⁴Nayeri ni an maɗa' tə mdə ku ya alari ahar Urushalima. Shammuwa, Shobab, ka Nathlan, ka Solaman,

¹⁵ka Ibhar, ka Elishuwa, ka Nefeg, ka Yafiya,

¹⁶ka Elishama, ka Eliyada, ka Elifelet.

¹⁷Sakatə mjir Filistiya ku nggata abbər Dauda ku ndzi kuthlir Israila, antə sojayeri arɗa ku səɓəla ka da ngkəi ni. Amma Dauda ku nggata ata kər antə tsa ku ləghəi akwa kuta katangga.

¹⁸Sojayeri ar Filistiya ku mwari ka ndəkəmtadzi akwa mular Refa

¹⁹Antə Dauda ku yu MTHLAKU “Kəi ra mpa mjir Filistiya ya? Ga ata hamta ɗa akwa tsi ya?” Antə MTHLAKU ku shinau alari, “Mwari, I ata hamta ɗa akwa tsiya ga!”

²⁰Dauda ku mwari akwa Baal Perazim antə tsa ku nggyari mjir Filistiya. Tsa pəla, “MTHLAKU ku ɓələmta dawarna akəmi apa pərtu.” Kamnyar ngəni antə mda ana kəga vəi ni Baal Perazim[1].

²¹Mjir Filistiya ku hwi kazhar haptayeri arɗa antə Dauda kəga mjirni ku fatə ɗa.

²²Antə mjir Filistiya ku ngka akwa mular mjir Refa ka damwa ka ndəkəmtadzi.

²³Antə Dauda ku jaktə yu MTHLAKU, Antə tsa shinau alari, “Ga aɗiya pwa ata kəra ɗa ka mpa azi wa, amma kalaktə kara mwari abwahila ɗa, ka gə pwa ata kəra ɗa ka mpa awul nfur baka ni[2].

²⁴Sakatə ga ku nggatə tsəkuya su akwa mwa akwa kəra nfwayeri ni, ɗəmhədzi ka gə pwa ata kəra ɗa kamnyar I akwa mwa akəma ga kəi nggyari sojayeri ar Filistiya.”

²⁵Dauda ku hara su tə MTHLAKU ku tsawa antə tsa ku mzhi kədləmta mjir Filistiya baɗita akwa Geba ka mwanta adzə Gezer.