Read bura-pabir 2 Samiwal 6 Bible Online

2 Samiwal 6 - bura-pabir bible

2 Samiwal 6

¹Dauda ku jaktə tsaptə sojayeri ar Israila na carcarari dəpu makkumari.

²Antə tsa kəga mjirni ku mwari ahar Baala ar Yahuda kamnyar ka da səntə Akwati Alkawal ar Hyel na ka thləma MTHLAKU na ka Duna ta Shang ata, natə mdə ku vətə kerubayeri.

³Da ku kətə Akwati Alkawal ni aviyar Abinadab na ata kəra gar ka vəta ata kəra wagən na bilən. Uzza ka Ahiyo, na maɗa' Abinadab ku pwar wagən ni.

⁴Ahiyo an akwa mwa akəma.

⁵Dauda kəga shanga mjir Israila akwa kucali ka ɓathla ka ha ka duna akwa nar olkur aka MTHLAKU. Da akwa tsa guləmayeri, yakandiyayeri, kəcaikəcai, kwacakwaca, liyar ɓu tsi.

⁶Sakatə da si ata vəi dəkə mthli ar Nakon antə thlayeri ni abaka ndla antə Uzza ku ha tsiyari ka tsa kathli Akwati Alkawal ar Hyel.

⁷Antə ɗəffa MTHLAKU ku ɓzi, antə Hyel ku tsi ni təkəma adzə Akwati Alkawal ar Hyel kamnyar tsa ku tsəkwar Akwati Alkawal ni.

⁸Antə ɗəffa Dauda ku ɓzi kamnyar tə MTHLAKU ku tsi Uzza. Antə mda ana kəga vəi nda ba kulini abbər, Perez Uzza.

⁹Antə Dauda ku thlivər MTHLAKU tə tsa pəla, “Kulini apa madi tə I ata ləvəi ka Akwati Alkawal nə ri?”

¹⁰Antə tsa kwamta abbər tsa aɗi ata mwantə Akwati Alkawal ni ahar Urushalima wa. Amma tsa ata ra sutiyari aviyar Obed Edom, na mdər Gath.

¹¹Akwati Alkawal ni ku ndzi anda thliya makər antə MTHLAKU ku vədzə barka aka Obed Edom ka kutakəyirni.

¹²Kuthli Dauda ku nggata abbər MTHLAKU ku vədzə barka aka Obed Edom ka kutakəyirni kamnyar tə Akwati Alkawal ar MTHLAKU aviyarngkiɗa. Apani Dauda ku ra kətə Akwati Alkawal ni ahar Obed Edom ka sənta ahar Urushalima ka kucali.

¹³Aghəla tə mji na ata kəl Akwati Alkawal ni ku baɗitə mwa ka kəɓəla səla ɗa ka ngkwa, antə Dauda pəla ka da thləthlata, antə tsa ku hamta saɗaka aka MTHLAKU ka gyal ka mwaɓi na təksətəksari.

¹⁴Dauda ku hatə ləptər lilin antə tsa ku ɓathla ka duna kamnyar nar olkur aka MTHLAKU.

¹⁵Tsa kəga shanga mjir Israila ku mwantə Akwati Alkawal ni ahar Urushalima ka haptə kurakər kucali ka mbur təmbəlayeri.

¹⁶Sakatə Akwati ar MTHLAKU ni akwa ləvəi akwa kuta Bərniyir Dauda, antə Mikal na ngkwar Shawulu ku haɓəla kəmari akwa windau, ka wutə Kuthli Dauda akwa ɓathla ka fəgəlta akəma MTHLAKU, antə tsa rutəmta ni akwa ɗəffari.

¹⁷Antə da ku səntə Akwati Alkawal ar MTHLAKU ni, ka vəi ni akwa vəi vəyirni, akwa kuta tent natə Dauda ɗəmhə kamnyar ni ni. Antə Dauda hamta saɗaka mbamba ka saɗakar jakə mwardzi akəma MTHLAKU.

¹⁸Aghəla tə Dauda ku kuri hamta saɗaka mbamba, ka saɗakar jakə mwardzi, antə tsa vədzə barka aka mji akwa thləma MTHLAKU na ka Duna ta Shang.

¹⁹Antə tsa ndəkəmta susəm ni aka shanga mji, watau shanga dlamar mjir Israila, shili ka mwanki. Tsa hamta aka waskəi kər buradi pal, ka dakulər kum ptsaptsa, ka kek tə mdə nam ka mpur anap ul'ula. Antə shanga mji ku təra, tə waskəi ku ləhar ngkiɗa.

²⁰Aghəla nda antə Dauda ku ləvəi ka tsa thlawar mjirni antə Mikal ku səɓəla ka sə wutə ni. Antə Mikal pəla, “Ashina kuthlir Israila ku hara thləm aka kərari. Tsa ku ntsui ləptərni ka ndzi dura apa caku akəma maɗankwi na buɗayeri ar kwakunayeri arni!”

²¹Dauda pəla aka Mikal, “I akwa ɓathla kamnyar nar olkur aka MTHLAKU na carɓəla ra ata vəya baba' nga ka mjir kutakəyirni kəi ndzi mdər pwar mjirni Israila. Antə I ata ləkəma ka ɓathla kamnyar nar olkur aka MTHLAKU,

²²kəi tsi səliyirna təramta ngəni. Ga ata tamata abbər I su ma wa, amma maɗankwi ndaga ata ni mdəkur ka duna!”

²³Mikal na ngkwar Shawulu aɗi ɗar ya wa har tə tsa mta.