Read bura-pabir 2 Samiwal 7 Bible Online

2 Samiwal 7 - bura-pabir bible

2 Samiwal 7

¹Kuthli Dauda ku ndzəndzi akwa kəyirni antə MTHLAKU ku nar msərakur ka ghərəmtaghəra akəla dawayeri arni.

²Antə kuthli ku pəla aka naɓi Nathlan, “Nggədza I andzəndzi akwa mbwa tə mdə ku latə ka udzəmər seda, amma Akwati Alkawal ar Hyel andzəndzi akwa tent!”

³Nathlan pəla alari, “Hara su tə gə wutə kalkal, kamnyar MTHLAKU ata vəi duku ka ga.”

⁴Amma vir nda aviri MTHLAKU ku pəla aka Nathlan,

⁵“Mwari ka ra pəla aka buɗar na Dauda abbər I pəla alari, Ga an ata lata ali mbwa tə kəi ndzəndzi akwa ya?

⁶Təng sakatə I msərantə mjir Israila akwa Masar ba kulini, I aɗi ndzi akwa mbwa wa. Parang I ana ndzi akwa tent.

⁷Akwa shanga vəyayeri tə I mwari akwa kəga mjir Israila, I ku ɗar pəla aka mji na ol'olər mjirna abbər kamnyar mi tə da aɗi lata ali mbwa ka udzəmər seda wa ya?

⁸Antə ka gə pəla aka buɗar na Dauda abbər I MTHLAKU na ka Duna ta Shang an pəla, ‘I ku kətə nga akwa ɓəla təma akwa mtaku ka namtə nga kuthlir mjirna Israila.

⁹I ku ndzi ata vəi duku ka ga akwa kəlara vəi tə ga ku mwari antə I ku nggyari dawayeri ar nga. I ata namtə ka thləma gə tuwa apa shanga mji ol'ola natə thləma ɗa ku tuwa ta shang akwa duniya.

¹⁰Antə I ata hamta vəi ndzəndzi aka mjirna Israila, antə I ata nci ɗa, kamnyar ka da ndzəndzi akwa tsəɗiyir kəra ɗa, tə mda aɗi ata damitə ɗa kəra wa. Antə mji na ɗimi aɗi ata ɗar bwani ala ɗa apa na waci kəra wa,

¹¹baɗitə ka sakatə I ku vəi alkaliyayeri ata kəra mjirna Israila. Antə giri ata wutə ghərəmtaghəra akəla dawayeri ar giri. I hara ala ga alkawal abbər ga ka kutakəyir nga ata ləkəma ka ndzi ka kuthlikur.

¹²Ma sakatə sakar ləhər nga ku mzhi, tə ga ku ngka adzə kəkayeri ar nga, I ata sə vəi pal akwa nca maɗa' nga ka tsa ndzi kuthli. Antə I ata namtə ka kuthlikur arni sə ndzi ka duna.

¹³Tsa an ata sə lata ali mbwa antə I ata sə hara ka nyarmbwar kuthlikur arni ləkəma ba saka madi.

¹⁴I ata ndzi tədda antə tsa ata ndzi ɓzərna. Ma tsa ku hara su na ɗimi antə I ata hara ka mji ɗi ni, antə mji ni ata ndzi purpurna.

¹⁵Amma I aɗi ata zhar hir ni apatə I ku hara aka Shawulu wa. Shawulu natə I ku kəli kazhar kuthlikur kamnyar ka gə ndzi kuthli.

¹⁶Nyarmbwar nga ka kuthlikur ar nga ata ndzi ba saka madi. Tsuwa dəkəl kuthlikur ar nga ata ndzi har ba saka madi.’ ”

¹⁷Antə Nathlan ku mwari, ka jikata aka Dauda shanga ndərayeri ngəni, kəga suayeri na kəlardzi alari ni.

¹⁸Antə Kuthli Dauda ku ləmbwa akwa tent ni, ka ndzəndzi akəma MTHLAKU, ka hara adduwa abbər, “MTHLAKU na ka Duna ta Shang, I an wa ri, tsuwa mjirna mi laga ri, tə ga ata haptə ra apani ni?

¹⁹Tsuwa ba kulini apa su ngəni ku hara raka ala ga, MTHLAKU na ka Duna ta Shang, antə ga ku gari ata kəra kəyir mafar nga abbər tsa ata fəi. Apani antə ga ana hara hwatu aka mji ya MTHLAKU na ka Duna ta Shang?

²⁰Mə damwa ana aɗi tə I ata mzhi jaktə pəla ala gə ri? Kamnyar MTHLAKU na ka Duna ta Shang, ai ga asəndə mafar nga cau!

²¹Kamnyar alkawalər nga ka atar hirər ɗəffa ga, antə ga ku hara shanga suayeri ngəni ol'ol ni, ka hara tə I ku səndə ɗa.

²²Apani ga an ol ka duna, MTHLAKU na ka Duna ta Shang! Kamnyar aɗi apa gə wa! Hyel damwa aɗi wa, tar gə shinga. Ngəni an su tə thləma yeru nggata.

²³Dur damwa aɗi akwa duniya apa Israila wa, natə ga ku msəranta akwa mafakur ka namtə ɗa mjir nga. Surndatayeri na ol'ol tə ga ku hara ala ɗa, ku tuwantə thləma ga akwa duniya. Ga ku kədləɓəla durayeri damwa kəga haptər ɗa sakatə mjir nga akwa si, mji tə ga ku msəranta akwa Masar ka da ndzi ar nga.

²⁴Ga ku namtə mjir Israila ka da ndzi mjir nga ba saka madi, antə ga, MTHLAKU, ku ndzi arɗa.

²⁵Antə kulini MTHLAKU na Hyel ka gə nghyantə alkawal tə ga ku hara ata kəra kəkayeri arna ba saka madi, ka gə hara su tə gə pəla ga ata harari.

²⁶Thləma ga ata ndzi ola ba saka madi antə mji ata sə pəla abbər, ‘MTHLAKU na ka Duna ta Shanga an Hyel na ata kəra Israila.’ antə ga ata sə kukwi nyarmbwa kuthlikurərna.

²⁷MTHLAKU na ka Duna ta Shang, Hyelər Israila, I ku wutə dunar hara adduwa ngəni ala ga, kamnyar ga ku kəlar ali shanga su nayeri ni, antə ga ku pəla ali ga ata namtə kəkayeri arna kuthlyayeri.

²⁸Antə kulini MTHLAKU na Hyel, ga an Hyel na ana nghyaɓəla alkawalayeri ar nga, antə ga ku hara alkawal ar su ngəni ɓɗaku ni aka buɗar nga.

²⁹I ata kiɗə nga ka gə vədzə barka aka kəkayeri arna, ka nyarmbwar kuthlikurər yeru ləkəma ba saka madi. MTHLAKU Hyel, ga an hara alkawal ngəni, antə barkar nga ata ndzi ata kəra kəkayeri arna ba saka madi.”