Read bura-pabir 2 Samiwal 8 Bible Online

2 Samiwal 8 - bura-pabir bible

2 Samiwal 8

¹Aghəla saka laga antə Dauda ku səm mjir Filistiya akwa mpa ka damwa, antə an kura kuthlikur mjir Filistiya ata kəra tsəɗi Israila.

²Tsa ku nggyari mjir Mowab. Tsa vu ka pərsənayeri pəpəi ata di akwa layi makər. Tə tsa vu ka mdə tsəgəi shanga mji na akwa layi suɗə ni ka zhar layi pal daci ka mpika. Antə mjir Mowab na ku mbil ka mpikə ni baɗitə sənta alari su tə tsa ku yuwa.

³Dauda ku səm Hadadezer ɓzər Rehob, na kuthlir Zoba pal akwa nca tsəɗiyir Siriya. Dauda ku səm di ni sakatə tsa akwa lakur ra dlutsə dunar hara kuthlikur ata kəra Thlyagha Yufiretis.

⁴Dauda ku ngkəi mjir takur Hadadezer dəpu pal ka aru murfa ka sojayeri arni ar səl dəpu sərkumari. Tsa ku kəsi takwayeri aru pal kamnyar ndəkər wagən ka thləthlamta səla na ku mbili.

⁵Sakatə mjir Siriya na akwa Damaska ku thlentə sojayeri ka da dlar Hadadezer kuthlir Zoba, Dauda ku pwa ata kəra ɗa ka mpa ka tsəgəi mji dəpu sərkumari ka suɗa.

⁶Antə tsa ku latə vəi ndziyir sojayeri arni akwa Damaska di kuthlikur ar Siriya, antə da ku ndzi akirari ka nta alari tsəma. MTHLAKU ku nar nggyari su aka Dauda akwa kəlara bwa.

⁷Dauda ku dlutsə partauwayeri ar dinar natə kwakunayeri ar Hadadezer ana kəla, ka mwantə ɗa ahar Urushalima.

⁸Tsa ku fatsa əmza hang ahar Betah ka Berothlai, bərniyayeri na akira kuthlikur ar Hadadezer.

⁹Kuthli Toyi ar Hamath ku nggata abbər Dauda ku nggyari shanga sojayeri ar Hadadezer.

¹⁰Antə tsa ku thlentə ɓzərni Yoram ka ra thlawar Kuthli Dauda ka tsa hu ni kamnyar tə tsa ku səm mjir Hadadezer akwa mpa. Kamnyar Hadadezer ku mpa ka Kuthli Toyi ka hang. Antə Yoram ku mwanta aka Dauda kariyayeri tə mdə namtə ka, adzərfa, ka dinar, ka əmza,

¹¹Dauda ku hamta ɗa kamnyar kəthlər aka MTHLAKU ka paktə ka adzərfa ka dinar tə tsa fata akəla tsəɗiyayeri tə tsa ku səma.

¹²Tsa ku fatə su nayeri ni ahar Edom, Mowab, ka Ammon, ka Filistiya, ka Amalek, kəga bwadukwa su tə tsa fata akəla Hadadezer na ɓzər Rehob, kuthlir Zoba.

¹³Thləma Dauda ku vərvər tuwa sakatə tsa ku ngka aghəla tə tsa ku tsi mjir Edom dəpu kumnya ncisu akwa Mular Una.

¹⁴Antə Dauda ku pwi sojayeri arni zara zara akwa Edom, tə shanga mjir Edom ku ndzi akirari. Antə MTHLAKU ku nar nggyari su aka Dauda akwa kəlara vəi tə tsa ku mwari akwa.

¹⁵Apani antə Dauda ku hara kuthlikur ata kəra shanga Israila, tsuwa Dauda ku ndzi ka jirkur ka hara su na kalkal aka shanga mjirni.

¹⁶Antə Yowab natə thləma mama'ni Zeruwiya, an ata kəra sojayeri. Antə Yehoshafat na ɓzər Ahilud tsuwa an mdər rəbutə sur vəi.

¹⁷Antə Zadok na ɓzər Ahitub ka Ahimelek na ɓzər Abiyathlar an pristayeri, Seraiya an sakatari ar kuthli.

¹⁸Benaiya na ɓzər Yehoyada an olər mjir Kerethli ka Pelethli na an mjir sək kəra Kuthli Dauda. Maɗashilər Dauda an pristayeri.