Read bura-pabir 1 Kuthlyayeri 10 Bible Online

1 Kuthlyayeri 10 - bura-pabir bible

1 Kuthlyayeri 10

¹Akwa tsəɗi Sheba, Kuthli Mwala laga aɗi na ku kəɗar nggatə laku Solaman hara thləm akwa atar haptə thləma MTHLAKU. Antə mwala ni si ka tsa ngkərtə ni atar yu suayeri na mwavər mwavər.

²Antə tsa fatə mjir pwar ni hang ka duna, ka dləkəmauwayeri na ka kəla ar kariyir yaji, ka kələr dinar hang, ka pelayeri ar dəɓa, ka si ka da adzə Solaman akwa Urushalima. Sakatə tsa mzhita antə tsa pəlaɓəla shanga su na akwa ɗəffari aka Solaman.

³Antə Solaman ngkərɓəla alari shanga su. Su aɗi ama kula Solaman mzhi ngkərɓəlari alari wa.

⁴Sakatə kuthli mwala ar Sheba ni ku wutə laku tə Solaman ni ɗəɗu akwa, ka kəi tə tsa ku həntə ni,

⁵ka jili susəma na ata tebər arni, ka laku tə kwakunayeri arni ndzəndzi akwa, ka laku tə buɗayeri arni akwa hara kəthlər akwa, ka ləptayeri arɗa, ka mjir hamta sur sa, ka ləptayeri arɗa, ka saɗaka mbamba tə tsa hamta akwa mbwar MTHLAKU, antə tsa kəsi mnyari ka ul həyak kamnyar ndatədzi.

⁶Antə tsa pəla aka kuthli, “Su tə mji pəla ali akwa tsəɗiyirna ata kəra suayeri tə ga akwa harari, ka ɗəɗukur ar ngə ni an jiri!

⁷Amma I aɗi mbərsa ka su tə da pəla ni wa, tar tə I si ka wutə ka nci surna. Azha ma shang su tə da ngkər ali ni aɗi ləkwa retar su tə I wutə ka nci ni wa. Jiri ɗəɗukur nga ka gənar nga ku təramta su tə I nggatə ni ciju!

⁸Jiri, ar mjir nga msəra ala ɗa! Msəra aka mji na akwa hara kəthlər ala ga, mji na ana thləthlata akəma ga tədəku ka nggatə ndər ar ɗəɗukur tə ga ana ngkəra!

⁹I akwa hu MTHLAKU na Hyelər nga, na ku nggatə msərakurər nga, ka vətə nga ata dəkəl kuthlikur ar Israila. MTHLAKU hir Israila kula vəi data, antə tsa ku namtə nga kuthlir ɗa, kamnyar ka gə hara su na kalkal ka jirkur.”

¹⁰Antə kuthli mwala ni hamta cautər dinar natə kəgəɓkurari ku təramta kilogram dəpu nfwar, ka kariyir yaji hang ka duna, ka pelayeri ar dəɓa. Mda aɗi ɗar jaktə səntə kariyir yaji hang aka Kuthli Solaman apatə kuthli mwala ar Sheba ku səntə ni wa.

¹¹Antə sharər yimi na ar Hiram ni ku thlata ahar Ofir ka səntə dinar, tsuwa da ku si ka udzəm almug hang, ka pelayeri ar dəɓa tsuwa.

¹²Antə kuthli ku kəthlər ka udzəm algum ni ka namtə suayeri ar dunautə mbwar MTHLAKU ka kəi kuthlikur ni. Tsuwa tsa ku namtə yakandiyayeri ka guləmayeri aka mjir hara ha tsu ka udzəm algum ni. Mda aɗi jaktə wutə jili udzəm algum ndaga akwa tsəɗi Yahuda har ba ashina wa.

¹³Antə Kuthli Solaman hamta aka kuthli mwala ar Sheba shanga suayeri tə tsa ku mwaɓta ka kiɗa, ata kəra kariyir kuthlikur na ɓɗakɓɗaku tə tsa ku kurtə hamta alari. Antə kuthli mwala ni ka mjirni ku ngka akwa tsəɗiyir ɗa.

¹⁴Abaka kəlara məva Kuthli Solaman ana dlu dinar natə kəgəɓkurari ku mwanta apa kilogram dəpu sərkumari ka makər,

¹⁵zhar ka kwabar tsəma tə tsa ana wuta akəla mjir nggala ka mjir fəli, ka na akəla kuthlyayeri ar Arabiya ka gwamnayeri na akwa tsəɗi ni.

¹⁶Kuthli Solaman ku namtə partauwayeri ol'ola aru suɗa, ka fəi dza kəlara partau ka dinar natə kəgəɓkurari ku hara apa kilogram murfa.

¹⁷Tsuwa tsa ku namtə partauwayeri damwa raka raka aru makər, ka fəi dza kəlara pal ka dinar natə kəgəɓkurari ku hara apa kilogram suɗa. Antə kuthli ni ku pwi ɗa akwa Mbwar Kuɓər Nfur Lebanon.

¹⁸Aghəla nda antə kuthli ni ku namtə dəkəl kuthlikur na ola ka thlira ciwar, ka fəi dzari ka dinar.

¹⁹Dəkəl kuthlikur ni ka sətepu ngkwa ar ndləɓəla ata su, ka kəra bwahila dəkəl ni tawarwar. Tsuwa dəkəl ni ka vəi vətə tsi athlimbəli abwani ka abwanda, ka tsəngi suɗa athləthlata athlimbəla vəi putə tsi ni.

²⁰Tsuwa Solaman ku namtə dludzər tsəngi kumnya suɗa athləthlata athlimbəla vəi ndlətə su ni, kəlara vəi vətə səl pal ka tsəngi abwani ka abwandari. Mda aɗi ɗar wutə jili dəkəl kuthlikur ngəni akwa kuthlikur damwa wa.

²¹Shanga kapayeri ar Kuthli Solaman mdə nam ka dinar. Tsuwa shanga kari kəthlər na akwa Mbwar Kuɓər Nfwa ar Lebanon ni mdə hara ka dinar shini. Mda aɗi hara ɗa ka adzərfa wa, kamnyar adzərfa aɗi su laga akwa sakar Solaman wa.

²²Kamnyar kuthli Solaman ka sharayeri ar yimi hang ahar Tarshish ata vəi duku ka sharayeri ar Hiram. Antə sharayeri ni ana səntə dinar, ka adzərfa, ka thlira ciwar, ka candəmayeri kəga ɗikar kuthli, ka pal akwa kuta kəlara məva makər.

²³Apani antə Kuthli Solaman ku təramta shanga kuthlyayeri ar duniya ka gəna ka ɗəɗukur.

²⁴Antə shanga mjir duniya ku bara si adzə Solaman ka da nggatə ɗəɗukurərni natə Hyel na alari ni.

²⁵Tsuwa tədək məva, kəlara mda akwa nca ɗa, ana səntə cautərni ar su tə mdə nam ka adzərfa, ka dinar, ka ləptayeri na ol'ola, ka mur, ka yaji, ka takwayeri, ka kwara ləmbandərayeri hang

²⁶Antə Solaman ku tsaptə wagənayeri dəpu ka aru nfwar ka mjir fəl taku dəpu kumnya suɗa. Antə tsa pwi ɗa akwa diyayeri ar wagənayeri ka na adzə ni akwa Urushalima.

²⁷Antə kuthli ku namta adzərfa hang apa su gapani akwa Urushalima apa pela, ka namtə nfur seda hang apa nfur kwataɓəla na ana ptsa akwa dzər garayeri ar Yahuda.

²⁸Mjir fəli ar kuthli ku mastə takwayeri ahar Masar ka Kuye aka Kuthli Solaman.

²⁹Tsuwa da ana mastə kəlara wagənər taku pal ata kəra liyar adzərfa aru ngkwa, ka kəlara taku pal ata kəra liyar adzərfa aru pal ka ntəfkumari. Tsuwa da ana ɗələmta ɗa aka kuthlyayeri ar Hitti ka na ar Siriya.