Read bura-pabir 1 Kuthlyayeri 11 Bible Online

1 Kuthlyayeri 11 - bura-pabir bible

1 Kuthlyayeri 11

¹Kuthli Solaman ku hir maɗangkwi na akwa durayeri damwa. Tsa ku kəl ngkwar kuthli, ka maɗangkwi mjir Mowab, ka maɗangkwi mjir Ammon, ka maɗangkwi mjir Edom, ka maɗangkwi mjir Sidon, ka maɗangkwi mjir Hitti.

²Da an durayeri natə MTHLAKU pəla abbər mjir Israila aɗiya kəldzi kəga da wa, ta da asə vu mjir Israila akwa nu haptayeri arɗa. Amma wala apani, Solaman ku mwardzi ka da ka kəl ɗa.

³Tsa ku kəl mwanki aru murfa natə shanga ɗa maɗa' kuthli, ka mwanki damwa tə tsa kəta aru makər. Antə da ku ndəkərəmta hangkalari kazhar MTHLAKU.

⁴Akwa sakatə Solaman ku hali, antə mwankirni ku shinantə ɗəffari aka haptayeri. Apani tsa aɗi hamta ɗəffari aka MTHLAKU na Hyelərni apatə Dauda na baba'ni ku hara wa.

⁵Kamnyar Solaman ku vəngkər səli aka Ashtaroth na haptər mjir Sidon, ka Molek, haptər mjir Ammon na ku ndzi sur cika.

⁶Apani Solaman ku hara su na ɗimi aka MTHLAKU, tə tsa aɗi hamta kərni swakti ka nu MTHLAKU apatə baba'ni Dauda ku hara wa.

⁷Apani antə Solaman ku namtə mashiɗayeri aka Kemosh na haptər mjir Mowab na ku ndzi sur cika, ka aka Molek haptər mjir Ammon na ku ndzi sur cika, ata kəra gar na təbwar raghəi ka Urushalima.

⁸Antə tsa ku namtə mashiɗu aka kəlara mwalarni na ngkwar dur damwa, kamnyar ka da ləkəma ka mba sur shiwura ka hamta saɗaka aka haptayeri arɗa.

⁹Antə ɗəffa MTHLAKU ku ɓza adzə Solaman kamnyar tə ɗəffari ku shinardzi kazhar MTHLAKU, na Hyelər Israila, na ku wutədzi alari har ka suɗa.

¹⁰Wala tə MTHLAKU ku tsaktə Solaman ta nu haptayeri, Solaman aɗi ɓəlatə tsawur MTHLAKU ni wa.

¹¹Kamnyar ngəni antə MTHLAKU pəla aka Solaman abbər, “Tə ga aɗi mzhi kəsi alkawal ka tsawu natə I na ala gə ni wa, I ata ndəkəmta nga ka kuthlikur ni, kəi hamta aka buɗar nga.

¹²Wala apani, kamnyar baba' nga Dauda, I aɗi ata hara ngəni akwa sakatə gə tsu ka mpikə wa, amma I ata sə dlutsari akwa tsiya ɓzər nga.

¹³Amma I aɗi ata dlutsə shanga kuthlikur ni kazhar ni wa. I ata sə hamta alari nyarmbwa pal kamnyar Dauda na buɗarna ka Urushalima natə I ku carɓəla.”

¹⁴Antə MTHLAKU ku hara tə Hadad na mdər Edom na akwa nyarmbwar kuthlikur ar Edom ku ndzi dawar Solaman.

¹⁵Akwa saka na təramta sakatə Dauda ka Yowab na ola ata kəra sojayeri ku təra mwari akwa Edom kamnyar harəmta mshiyir mjir Israila na ku mti akwa mpa, antə sojayeri ar Israila kurəmta shanga mji shili na akwa Edom.

¹⁶Antə Yowab ka shanga sojayeri ar Israila ku ndzi anda har thliya ngkwa tar tə da kurəmta shanga mji shili na akwa Edom.

¹⁷Amma Hadad na tsu ɓzəngkyar, ku hwi mwari ahar Masar kəga kwakunayeri ar Edom na hara kəthlər aka baba'ni.

¹⁸Antə da thlatə kazhar Midiyan ka mwari ahar Paran. Antə da fatə mji ahar Paran ka mwari kəga da ahar Masar, adzə kuthlir Masar na ku hamta kəi, ka susəma aka Hadad ka thli alari di.

¹⁹Apani kuthli ku hir Hadad ka duna, har tə tsa ku hamta alari ngkwarma' mwalankiɗa ka tsa kəla, ngkwarma' kuthli mwala Tapanhes.

²⁰Antə ngkwarma' Tapanhes ni ku yaɓəla alari ɓzər sal ka thləmari Genubath, natə Tapanhes ku kəlantə akwa kəi kuthlikur. Anda antə Genubath ku ndzəndzi kəga maɗa' kuthli.

²¹Sakatə Hadad nggata abbər Dauda ku mti, ka tsuwa Yowab na olər sojayeri ku mti, antə Hadad pəla aka kuthli, “Ndzi kəi ngka akwa tsəɗiyirna.”

²²Antə kuthli ni yu ni abbər, “Man su tə gə ni kəgari azi ri, tə ga ata bara ngka akwa tsəɗiyir ngə ni?” Antə Hadad pəla, “Suari aɗi wa, amma usa zhar ra kəi ləha!”

²³Antə Hyel ku hara tə Rezon na ɓzər Eliyada ku ndzi dawar Solaman, Rezon na hwi kazhar mdərkəyirni Hadadezer na kuthlir Zoba.

²⁴Antə tsa tsaptə maɗa' shambar ka ndzi olər ɗa. Aghəla tə Dauda ku kurəmta sojayeri ar Hadadezer, antə maɗa' shambar ni təra mwari ahar Damaska, akwa vəi tə da ndzəndzi ka vəi ni kuthli.

²⁵Rezon ku ndzi dawar Israila akwa sakatə Solaman ka mpika, ka hara ɗimikur aka Israila apatə Hadad ku hara. Apani antə Rezon ku hara kuthlikur akwa Aram, ka nggəlar mjir Israila.

²⁶Tsuwa Yerobowam na ɓzər Nebat na akwa nca kwakunayeri ku thlentə hangkala Solaman na mdər Ifrayim na ahar Zereda, ka mama'ni mwala kughung na ka thləmari Zeruwa.

²⁷Nggədza laku tə tsa thlentə hangkala kuthli ni akwa. Sakatə Solaman akwa hən Millo, watau vəi tə mdə shiktə ka həi ni, tə tsa akwa jaktə hənɓəla katanggar Bərniyir baba'ni Dauda ni,

²⁸antə tsa nggaɓəla abbər Yerobowam ana kəthlər ka ufti. Sakatə Solaman ku wuta abbər ɓzərdakwi ngəni ka ɗəɗukurər kəthlər, antə tsa vəi ni ata kəra shanga kəthlər ar dwalikur na akwa tsəɗi Ifrayim ka Manasse.

²⁹Vir laga sakatə Yerobowam akwa ləɓəla Urushalima, antə tsa kəɓa ka naɓi Ahija na mdər Shilo ata laku. Ahija ku hatə ləptu bilən. Tsuwa təng da shiɗa an akwa mtakə ni.

³⁰Antə Ahija tamtə ləptu na bilən na ata dzari ni, ka kukwahuwa ka bwa kumnya suɗa.

³¹Antə tsa pəla aka Yerobowam, “Kara fatə vəyari kuma aka kəra ga. Kamnyar ngəni an su tə MTHLAKU na Hyelər Israila ku pəla, abbər, ‘Wula, I ata sə dlutsə kuthlikur akəla Solaman kəi hamta aka nyarmbwayeri kuma.

³²Amma kamnyar buɗarna Dauda ka kamnyar Urushalima natə I ku carɓəla akwa shanga tsəɗi Israila, antə Solaman ata sə mbila ka nyarmbwa pal.

³³I ata sə hara ngəni kamnyar tə Solaman ku nggəlar ra ka vəngkər səli aka Ashoreth na haptər mjir Sidon, ka Kemosh na haptər mjir Mowab, ka Molek na haptər mjir Ammon. Solaman aɗi nu su tə I pəla alari wa, wala ɓəlatə tsawayeri arna apatə Dauda na baba'ni ku hara wa.

³⁴Amma wala apani I aɗi ata dlutsə shanga kuthlikur ni akəla Solaman wa. I ku vəi ni kuthli har kurər mpikari kamnyar Dauda na buɗarna, mdə natə I ku carɓəla, na ku ɓəlatə tsawayeri arna.

³⁵I ata sə kəɓəla kuthlikur ni akwa tsiya ɓzərni, kəi hamta ala ga. I ata hamta nyarmbwayeri kuma ala ga.

³⁶I ata sə hamta nyarmbwa pal aka ɓzərni kamnyar ka kəkayeri ar Dauda na buɗarna sə ndzi ka kuthlikur tədəku akwa Urushalima, bərni natə I carɓəla ka mdə vəngkər səli ali akwa.

³⁷Amma ar nga, Yerobowam, I ata vəi nga kuthlir Israila, antə ga ata hara kuthlikur ata kəra shanga lardu apatə ɗəffa ga ku mwaɓta.

³⁸Ma ga ku hara kəlara su tə I tsawa ala ga, ka kələngkər aka tsawayeri arna apatə Dauda ku hara, I ata ndzi adzə nga. Antə I ata vəi nga kuthlir Israila, ka wuta abbər kəkayeri ar nga ku hara kuthlikur aghəla ga, tsu apatə I ku hara aka Dauda.

³⁹I ata ɗi kəkayeri ar Dauda, amma aɗi ata ndzi har ba saka madi wa.’ ”

⁴⁰Antə Solaman ku bara ka tsa tsi Yerobowam, amma Yerobowam ku hwi ka mwari ahar Masar, adzə Shishak na kuthli. Antə tsa ku ndzi anda har tə Solaman mta.

⁴¹Shanga suayeri natə Solaman ku hara, ka ɗəɗukurərni, mdə ku rəbutə ɗa akwa Kakaɗər Labar ar Solaman.

⁴²Solaman ku hara kuthlikur akwa Urushalima ata kəra shanga Israila ar məva nfwarkumari

⁴³Aghəla nda antə Solaman ku mti, antə mdə ku harəmta ni akwa Bərniyir Dauda na baba'ni. Antə Rehobowam na ɓzərni ku ndzi kuthli ata vəyari.