Read bura-pabir 1 Kuthlyayeri 12 Bible Online

1 Kuthlyayeri 12 - bura-pabir bible

1 Kuthlyayeri 12

¹Vir laga Rehobowam ku təra mwari ahar Shekem, kamnyar shanga mjir Israila ku tsaptədzi anda kamnyar ka da vəi ni kuthli.

²Sakatə Yerobowam na ɓzər Nebat nggata abbər mda ata vəi Rehobowam kuthli, antə tsa zhar Masar, vəi tə tsa hwi ta Kuthli Solaman ka ra ɗuwardzi akwa ni, ka ngka avəi.

³Antə nyarmbwayeri na akwa yala ni thlenta aka Yerobowam abbər ka tsa si. Antə tsa ka shanga mjir Israila na tsaptədzi ni mwari ka pəla aka Rehobowam abbər,

⁴“Baba nga ku ɗar bwani ala yeru ka duna. Antə kulini, kəmta ala yeru bwani tə baba' ngə vəngkər ala yeru ni, antə yeru ata hara shanga su tə gə pəla ala yeru.”

⁵Antə Rehobowam shinau abbər, “Mwar giri ka giri hara vir makər, aghəla nda ka giri ngka adzə ra.” Antə mji ni ku təra.

⁶Aghəla nda antə kuthli Rehobowam ku yu sauri akəla mji na halhalari, na ku hara kəthlər aka baba'ni Solaman sakatə tsa ka mpika. Tsa pəla ala ɗa abbər, “Jili sauri madi tə giri ata na ali kəi hamta aka mji ngəni ri?”

⁷Antə da pəla alari, “Ma ga ata ndzi apa buɗa aka mji ngəni ashina ka hara kəthlər ala ɗa, ka gari na msəra ala ɗa akwa kəlara sakatə ga akwa shinau ala ɗa, to, da ata hara kəthlər ala gə ka jirkur tədəku.”

⁸Amma Rehobowam aɗi hir kəthlər ka sauri tə mji ol'ola na alari ni wa. Tsa kətə sauri natə maɗadakwi na kəmarni ka tsuwa na ana kəthlər alari ku na alari.

⁹Antə tsa pəla ala ɗa, “Ni giri amsa tə kəi hamta aka mji na pəla ali abbər, ‘Kəmta ala yeru bwani natə baba' nga vəngkər ala yeru ni.’ ”

¹⁰Antə maɗadakwi na kəla ata kəma duku ka tsa ni pəla alari, “Nggədza amsa tə ga ata hamta aka mji na pəla abbər, ‘Baba nga ku ɗar bwani ala yeru kamta, antə kəmta ala yeru bu’ ni. Pəla ala ɗa abbər, ‘Gajir kulengi bitu ta kusara baba'na!

¹¹Antə ma baba'na ku vəngkər ala giri kəl na kəgəɓu, I ata jakəngkər aka kəl ndaga. Baba'na ku ɓu giri ka purpu, amma arna I ata ɓu giri ka kwandeng na ata kəta apa njir hiɗi.’ ”

¹²Antə aghəla vir makər Yerobowam ka mji ni ngka adzə Rehobowam, tsu apatə tsa ku tsawa ala ɗa.

¹³Antə kuthli ni ku nggəlar sauriyir mji na halhalari ni, ka shinau ala ɗa ka ɗəffu.

¹⁴Tsa kəthlər ka sauri tə maɗadakwi na alari ni, ka pəla ala ɗa, “Baba'na ku vəngkər ala giri kəl na kəgəɓu, amma I ata jakəngkər aka ndaga. Baba'na ku ɓu giri ka purpu, amma I ata ɓu giri ka kwandeng na ata kəta apa njir hiɗi!”

¹⁵Apani kuthli ni aɗi psi thləm aka mji ni wa, kamnyar su ngəni akwa pal ni thlata akəla MTHLAKU. Tsa hara apani kamnyar ka tsa nghyaɓəla su tə tsa pəla aka Ahija na mdər Shilo abbər ka tsa pəla aka Yerobowam na ɓzər Nebat.

¹⁶Sakatə shanga mjir Israila ku wuta abbər kuthli ni aɗi psi thləm ala ɗa wa, antə da shinau aka kuthli ni abbər, “Su aɗi na damitə yeru ka Dauda wa, Su aɗi tə yeru akwa barari akəla ɓzər Yesse wa, Mjir Israila, ka waskəi ngka avəyarngkiɗa! Mbura təra kazhar Rehobowam ma'ra, ka Dauda wul kutakəyirni!” Apani antə mjir Israila ku ngka akwa kəyayeri arɗa.

¹⁷Amma Rehobowam ku ləkəma ka hara kuthlikur ata kəra mjir Israila, akwa bərniyayeri ar Yahuda.

¹⁸Antə Kuthli Rehobowam ku thlentə Adoram, natə tsa an ola ata kəra kəthlər dwalikur, ka tsa mwari adzə mjir Israila. Antə shanga mjir Israila ni ku ndzəndzəhtə ni ka pela har tə tsa ku mti. Sakatə Kuthli Rehobowam ku nggatə labar ni antə tsa thlatə ka huva ka fəlwa wagənər takurni ka hwi ləhar Urushalima.

¹⁹Antə mjir Israila na abwar yala baɗitə nggəlar mjir nyarmbwar Dauda təng akwa saka ndaga har ka ba ashina.

²⁰Sakatə shanga mjir Israila nggata abbər Yerobowam ku zhar Masar ka ngka, antə da tsaptədzi ka thlenta abbər ka tsa si. Sakatə tsa ku si antə da vəi ni kuthlir shanga Israila. Apani tar mji na akwa nyarmbwar Yahuda an kələngkər ka da ndzi akira kuthlikur ar mjir kutakəyir Dauda.

²¹Sakatə Rehobowam ku si akwa Urushalima, antə tsa tsaptə sojayeri na akwa nyarmbwar Yahuda ka na akwa nyarmbwar Benjamin, na mulmulari akwa mpa, mji dəpu aru ka nciskumari. Antə tsa ɗəmhə ɗa kamnyar ka da ra mpa mjir Israila, ka ngka ka da akira kuthlikurərni.

²²Amma Hyel ku gari aka Shemaiya na mdər Hyel abbər,

²³“Pəla aka Rehobowam na ɓzər Solaman na kuthlir mjir Yahuda, ka aka shanga mjir Israila na akwa Yahuda ka Benjamin abbər,

²⁴‘MTHLAKU pəla, giri aɗiya ra mpa maɗama' giri wa. Ka waskəi ngka avəyarngkiɗa kamnyar su ngəni thlata akəli.’ ” Antə da ku kələngkər aka ndər tə MTHLAKU pəla, ka ngka. Da aɗi ra dlər Yerobowam ni kəra wa.

²⁵Aghəla nda antə Yerobowam ku jaktə həntə Shekem akwa tsəɗiyir gar ar Ifrayim, ka ndzəndzi anda. Aghəla nda antə tsa zhar Shekem ka mwari ka hənɓəla Penuwel.

²⁶Antə Yerobowam ku dzama akwa ɗəffari abbər, “Kulini ma I aɗi ngga ngga wa, kuthlikur ni ata jaktə ngka akwa kutakəyir Dauda.

²⁷Ma mji ngəni ku təra ka mwari ahar Urushalima kamnyar hamta saɗaka akwa mbwar vəngkər səli aka MTHLAKU, hangkala ɗa ata jaktə ngka adzə mthlakər ɗa Rehobowam na kuthlir Yahuda. Antə da ata sə tsi ra.”

²⁸Aghəla tə kuthli ni ku hara sauri ka mji, antə tsa namtə kənayeri suɗa ar dinar. Antə tsa pəla aka mjirni, “Giri ku ghəri akwa mwari ahar Urushalima kamnyar vəngkər səli aka MTHLAKU. Mjirna Israila, nayeri ni an haptayeri ar giri na fwaɓəla giri akwa Masar!”

²⁹Antə tsa vəi na duku akwa Bethlel, ka na dukwari akwa Dan.

³⁰Antə su ngəni ku ndzi biku na ɗimi, kamnyar mji ku mwari ba ahar Dan kamnyar vəngkər səli.

³¹Tsuwa tsa ku həntə mashiɗayeri ata garayeri ka pwi pristayeri na aɗi akwa nyarmbwar mjir Lawi wa.

³²Tsa ku vəi vir kucali akwa vira thliya kumnya ntəfu ar thliya na ncisu apa vir kucali tə mda ana hara akwa Yahuda. Tsa ku hamta saɗakayeri ka kənayeri ni ata bagaɗi na akwa Bethlel, ka pwi pristayeri ata kəra mashiɗayeri tə tsa həntə ni.

³³Apani tsa ku mwari ahar Bethlel ka hamta saɗaka ata bagaɗiyir hamta saɗaka tə tsa ku həntə ni akwa vira thliya kumnya ntəfu ar thliya na ncisu, thliya natə tsa ku carɓəla. Antə tsa ku vəi aka mjir Israila vir kucali, tə tsa ana mwari adzə bagaɗi ni kamnyar hamta saɗaka mbamba.