Read bura-pabir 1 Kuthlyayeri 13 Bible Online

1 Kuthlyayeri 13 - bura-pabir bible

1 Kuthlyayeri 13

¹MTHLAKU ku tsawa aka mdər Hyel laga na akwa Yahuda ka tsa mwari akwa Bethlel akwa sakatə Yerobowam athləthlata adzə bagaɗi kamnyar hamta saɗaka ni.

²Antə mdər Hyel ni ku kəga ka kuraku apatə MTHLAKU ku tsawa abbər, “Bagaɗi ragai, bagaɗi ragai! Nggədza su tə MTHLAKU pəla, ‘Mda ata sə yaɓəla ɓzər sal akwa kutakəyir Dauda ka thləmari Yosiya. Antə tsa ata sə hamta saɗaka ka pristayeri ar haptu na ku hamta saɗaka ka mbamta ɗethlər mda ata kəra ga.’ ”

³Tsu vir nda antə mdər Hyel ni ncantə seɗa, ka pəla, “Mda ata ntəntau bagaɗi ni, ka mdə pumta pənju na ata kərari ni ata di.”

⁴Sakatə Kuthli Yerobowam nggatə su tə mdər Hyel pəla ɗimi ata kəra bagaɗiyir Bethlel ni, antə tsa ndərar tsiyari ka pəla, “Ngkəi gir ni.” Amma tsiyari tə tsa ndərar təbwar mdə ni ku ulantədzi, tə tsa aɗi mzhi ɓəlhari kəra wa.

⁵Tsuwa təkəma təng bagaɗi ni ntaudzi, antə pənju na ata ni pumtadzi, tsu apa seɗa tə mdər Hyel ni pəla, apatə MTHLAKU ku pəla alari ni.

⁶Antə kuthli ni pəla aka mdər Hyel ni, “Usa kara hara ali adduwa ka gə kiɗa ali kəra MTHLAKU na Hyelər nga, ka tsa mbantə tsi ni.” Antə mdər Hyel ni hara adduwa aka MTHLAKU, antə tsiya kuthli ni ku jaktə ngka ka ndzi ndəlang tsu apa na hwatu.

⁷Antə kuthli ni pəla aka mdər Hyel ni abbər, “Sər mwa təra ləharngkəya, ka gə səm susəma. I ata hir kəi hamta ala gə watsəɓər nga.”

⁸Amma mdər Hyel ni pəla, “Wala ga an ata hamta ali retar shanga sur nga, I aɗi ata mwari aharngkiri wa, wala səm susəma, wala sa yimi azi wa.

⁹MTHLAKU ku tsawa ali abbər I aɗiya səm susəma, wala sa yimi, wala ngka atar laku tə I si akwa wa.”

¹⁰Apani antə tsa ku nu laku damwa, tsa aɗi ngka atar laku tə tsa si akwa Bethlel ni kəra wa.

¹¹Naɓi laga aɗi na halhalari akwa Bethlel natə maɗashilərni ku si ka pəla alari shanga su tə mdər Hyel ni ku hara vir nda. Tsuwa da ku pəla alari su tə mdər Hyel ni pəla aka kuthli ni.

¹²Antə baba' ɗa yu ɗa abbər, “Tsa nu laku na madə ri?” Antə maɗa'ni ni ncanta alari laku tə mdər Hyel na thlata ahar Yahuda ni nuwa.

¹³Antə tsa pəla ala ɗa, “Putə giri ali libaru ata hila kwara.” Antə da putə libaru ata hila kwara ni, antə tsa fəlta.

¹⁴Antə mdə ni nu mdər Hyel ni ka ra wutə ni andzəndzi akira nfur ok. Antə tsa yuwa abbər, “Ga an mdər Hyel na thlata ahar Yahuda nə ya?” Antə mdə ni pəla, “I, iya.”

¹⁵Antə naɓi ni pəla alari, “Sər ka mwa ləharngkəya ka gə səm susəma.”

¹⁶Antə mdər Hyel ni pəla, “I amzhi ngka ka nu ngə wa, wala səm susəm, wala sa yimi azi wa.

¹⁷MTHLAKU ku pəla ali abbər I aɗiya səm susəm, wala sa yimi azi, wala ngka atar laku tə I si ata wa.”

¹⁸Antə mdə halhal ni pəla abbər, “I ma I naɓi tsu apa ga. Antə mdərthlentərhyel laga pəla ali abbər kəi ngka ka ga akwa kəyirna kamnyar ka gə səm susəma ka sa yimi.” Amma tsa akwa thlandər alari.

¹⁹Apani antə mdər Hyel ni ku ngka ka nu ni tə tsa ku səm susəma avəyarngkiɗa.

²⁰Sakatə da tsu andzəndzi akwa vəi səm susəm ni, antə MTHLAKU pəla aka naɓi na halhalari ni,

²¹ka tsa pəla aka mdər Hyel na thlata ahar Yahuda ni abbər, “Ga ku nggəlar ta kələngkər aka tsawur MTHLAKU na Hyelər nga.

²²Ga ku ngka ka səm susəma akwa vəi tə tsa pəla ala gə, ‘Ga aɗiya səm su wala sa yimi wa.’ Kamnyar ngəni ga ata mta, antə mda aɗi ata harəmta nga akwa kulər kəkayeri ar ngə wa.”

²³Sakatə mdər Hyel ni kuri səm susəma, antə naɓi na halhalari ni puta alari libaru ata hila kwararni.

²⁴Sakatə tsa akwa təra, antə tsa kəɓa ka tsəngi ata laku. Antə tsəngi ni ku tsi ni, ka psəmta mshiyirni ata laku. Antə kwara ni ka tsəngi ni ku thləthlata athlimbəlari.

²⁵Antə mji na akwa təramta akwa laku nda wutə mshiyirni apsəmta ka tsəngi athləthlata athlimbəlari. Antə da mwantə ndərari akwa kuta Bethlel, di natə naɓi na halhalari akwa ni.

²⁶Antə sakatə naɓi na halhalari ni nggatə su ata kər, antə tsa pəla, “Ngəni an mdər Hyel na ku nggəlar ta kələngkər aka tsawur MTHLAKU. Apani MTHLAKU ku hamta ni aka tsəngi na ku thləthləhumta ni ka tsi ni tsu apatə MTHLAKU ku pəla alari.”

²⁷Antə naɓi ni pəla aka maɗa'ni, “Vətə giri ali libaru ata kwara.” Antə da ku hara.

²⁸Antə tsa təra ka mwari ka wutə mshiyir mdə ni apsəmta ata laku, ka kwara ka tsəngi athləthlata athlimbəlari. Tsəngi ni aɗi ɓɗə mshi ni, wala dəkəi kwara ni wa.

²⁹Antə naɓi ni kətə mshiyir mdər Hyel ni, ka vəta ata kwara ni ka ngka kəgari akwa Bethlel kamnyar tuwa ni ka harəmta ni.

³⁰Aghəla ndaga antə tsa ku harəmta mshi ni akwa kulərni. Antə tsa ka maɗa'ni ku tuwa ni akwa pəla, “Ai ɓzərma'na.”

³¹Aghəla tə mdə ku harəmta ni, antə tsa pəla aka maɗa'ni abbər, “Ma sakatə I ku mti ka giri harəmta ra tsu akwa kula natə mdə ku harəmta mdər Hyel ni, ka vəi mshiyirna adzə ɗethlərni.

³²Kamnyar su tə MTHLAKU pəla aka mdər Hyel ata kəra bagaɗi na akwa Bethlel, ka ata kəra mashiɗər haptayeri na akwa Samariya ni, ata sə nghyantədzi.”

³³Amma ba kulini, Yerobowam aɗi zhar lakur ɗimikurərni ni wa. Tsa ləkəma ka pwi pristayeri ata kəra mashiɗayeri kula nu tsawur vəi prist. Kəlara mdə na ata bara ndzi prist, tsa ata vəngkər ni ata kəra mashiɗu.

³⁴Ngəni an bikər kutakəyir Yerobowam na səntə ndlar kuthlikurərni ka shamtadzər kutakəyirni ata kəra duniya.