Read bura-pabir 1 Kuthlyayeri 14 Bible Online

1 Kuthlyayeri 14 - bura-pabir bible

1 Kuthlyayeri 14

¹Ata saka nda Abija na ɓzər Yerobowam ku hara nggawa.

²Antə Yerobowam pəla aka mwalankiɗa, “Thlatə kara shamta dludzər nga ta mda anggaɓəla nga abbər gə mwala' Yerobowam. Ka gə mwari ahar Shilo adzə naɓi Ahija, mdə na pəla ali abbər I ata sə ndzi kuthlir Israila ni.

³Ka gə kətə kər buradi kuma, ka kekayeri, ka cirməma akwa tughum ka gə mwanta alari. Ka gə yu ni su na ata sə wutə ɓzər ni, antə tsa ata pəla ala gə su na ata sə wutə ni.”

⁴Antə mwala' Yerobowam ni ɗəmhədzi ka təra mwari ahar Ahija na ahar Shilo. Akwa saka ngəni nca Ahija amzhi wutə su kəra wa, kamnyar tsa ku hali.

⁵Amma MTHLAKU ku pəla aka Ahija abbər, “Mwala' Yerobowam akwa si ka tsa yu nga ata kəra ɓzərni, kamnyar ɓzərni ni nggawa. Antə ka gə pəla alari su tə I pəla ala ga. Ma sakatə tsa ku si tsa ata shamta dludzərni ka ndzi apa mwala damwa.”

⁶Antə təkəma tə Ahija nggatə kur səla mwala ni akwa si anyarmbwa, antə tsa pəla, “Asəmbwa mwala' Yerobowam, kamnyar mə tə ga akwa namtə kər nga apa mdə damwa ri? I ka labar ala ga na aɗi msəra wa.

⁷Mwari kara pəla aka salngkiri Yerobowam su tə MTHLAKU na Hyelər Israila akwa pəla alari abbər, ‘I ku carɓəla nga akwa nca mji ka vəi nga kuthlir mjir Israila.

⁸I ku ndəkəmta kutakəyir Dauda ka kuthlikur, ka hamta ala ga. Amma ga aɗi hir ndzi apa buɗarna Dauda wa. Tsa ku ɓəlatə tsawayeri arna, ka nu ra ka ɗəffari duku, ka hara su na kalkal.

⁹Ga ku hara ɗimikur na təramta shanga mji na hara kuthlikur akəmata ga. Ga ku namtə haptayeri ka dludzər suayeri ka liya. Ga ku nggəlar ra antə su ngəni ku ɓzamtə ɗəffi.

¹⁰Kamnyar ngəni I ata sənta asar na ɗimi ata kəra kutakəyir nga. I ata tsəgəi shanga maɗashilər nga ola ka ntsaha. I ata shamta kutakəyir nga apatə mda ana mbamta kuɓa, tar ma shanga ɗa ku kuri karkar.

¹¹Kilayeri ata sə ɓɗə mshiyir kəlara yangkura ga na mta akwa kutadi, antə kutəkcivəi ata sə səm mji na mta akwa mtakəu. I na MTHLAKU an hara gari ngəni!’ ”

¹²Ahija ləkəma ka pəla aka mwala' Yerobowam ni abbər, “Ar nga, ngka, kara ləha. Antə təkəma sakatə səla ga ku ntsari bərni ni, ɓzəngkyar ni ata mta.

¹³Antə shanga mjir Israila ata sə tuwa ni, ka harəmta ni. Tsa shini akwa kutakəyir Yerobowam an ata wutə hara na ɓɗaku kamnyar tsa an kura mdə na pwa tə MTHLAKU na Hyelər Israila wuta akwa kutakəi ni.

¹⁴MTHLAKU ata vəi mdə damwa na ata sə hara kuthlikur ata kəra Israila, mdə na ata sə shamta nyarmbwar Yerobowam. Su ngəni ata hara kulikulini.

¹⁵MTHLAKU ata sə ɗi Israila. Antə da ata sə kənggəra apatə duwathlu ana kənggəra akwa yimi. Tsa ata kədləɓəla mjir Israila kazhar tsəɗi na ɓɗaku tə tsa hamta aka kəkayeri arɗa ni, ka titiləmta ɗa aɓəla bwanda Thlyagha Yufiretis. Tsa ata hara ngəni kamnyar tə da ku namtə haptayeri ar Ashera ka ɓzamtə ɗəffa MTHLAKU.

¹⁶MTHLAKU ata nggəlar Israila kamnyar Yerobowam ku hara biku ka vu mjir Israila akwa biku.”

¹⁷Antə mwala' Yerobowam ku thlatə ka təra mwari ahar Tirza. Təkəma tə səlari ntsari kutakəyirni təng ɓzəngkyar ni mta.

¹⁸Antə mjir Israila ku harəmta ni ka tuwa ni apatə naɓi Ahija na buɗar MTHLAKU ku pəla ni.

¹⁹Shanga suayeri tə kuthli Yerobowam ku hara, mpayeri tə tsa hara, ka laku tə tsa hara kuthlikurərni akwa shang, mdə ku rəbuta akwa Kakaɗər Labar ar Kuthlyayeri ar Israila.

²⁰Yerobowam ku hara kuthlikur ar məva sərkumari ka suɗa kambəla tsa mta, antə mdə ku harəmta ni. Aghəla nda antə ɓzərni Nadab ku ndzi kuthli ata vəyari.

²¹Rehobowam na ɓzər Solaman ku ləkwa kuthlikur akwa Yahuda sakatə tsa ka məvari nfwarkumari ka ntang. Tsa hara kuthlikur ar məva kumnya murfa akwa Urushalima. Urushalima an bərni tə MTHLAKU ku carɓəla akwa nca shanga tsəɗi ar Israila kamnyar ka mdə vəngkər səli alari akwa. Thləma mama' Rehobowam ni an Naama, ngkwar di Ammon.

²²Mjir Yahuda ku hara biku aka MTHLAKU. Da hara biku na ɗimi kamta, təramta shanga su tə kəkayeri arɗa ku hara, ka mbwantə ɗəffa MTHLAKU ka duna.

²³Kamnyar da ku həntə mashiɗayeri aka haptayeri arɗa ka nci shanggamayeri, ka dludzər Ashera ata garayeri, ka akira nfwayeri na ol'ola.

²⁴Na ɗimi ta shang an shili ka mwanki akwa hara karwakur akwa mashiɗayeri ni. Mjir Yahuda ku hara shanga sur səli natə durayeri damwa ku hara, durayeri natə MTHLAKU kədləɓəla sakatə mjir Israila akwa ləkwa tsəɗi ni.

²⁵Akwa məva na ntəfkur ka ləkwa kuthlikur ar Rehobowam, antə Shishak na kuthlir Masar dlər Urushalima.

²⁶Antə tsa famnya shanga gənar mbwar vəngkər səli, ka gənar kəi kuthlikur, purəm kəga partauwayeri ar dinar natə Solaman namta.

²⁷Antə kuthli Rehobowam jaktə namtə partauwayeri ar əmza ata vəya ɗa, ka puwa akwa tsiya mji ol'ola ar sək nyarfur kəi kuthlikur.

²⁸Kəlara sakatə kuthli ata mwari akwa mbwar vəngkər səli aka MTHLAKU, mjir səka ata fatə partauwayeri ni ka pwar ni, aghəla nda da ata ngka ka da akwa mbwar səkə ni.

²⁹Shanga suayeri natə Rehobowam ku hara, mdə ku rəbutə ɗa akwa Kakaɗər Labar ar Kuthlyayeri ar Yahuda.

³⁰Antə mpa ku ləkəma akwa daɓwa Rehobowam ka Yerobowam tədəku.

³¹Rehobowam ku mti, antə mdə harəmta ni ata vəi duku kəga kəkayeri arni akwa Bərniyir Dauda. Thləma mama'ni an Naama na ngkwar di Ammon. Antə Abijam na ɓzərni ku ləkwa kuthlikur ata vəyari.