Read bura-pabir 1 Kuthlyayeri 15 Bible Online

1 Kuthlyayeri 15 - bura-pabir bible

1 Kuthlyayeri 15

¹Akwa məva na kumnya nciskur ar kuthli Yerobowam na ɓzər Nebat, antə Abijam baɗitə hara kuthlikur ata kəra Yahuda.

²Antə tsa hara kuthlikur ar məva makər akwa Urushalima. Thləma mama'ni an Maaka na ngkwar Absalom.

³Abijam ku hara shanga bikayeri natə baba'ni Rehobowam ku hara. Tsa aɗi hamta ɗəffari swakti aka MTHLAKU na Hyelərni apatə Dauda na kəkarni ku hara wa.

⁴Amma wala apani, kamnyar Dauda, MTHLAKU na Hyelərni ku hamta alari ɓzər akwa Urushalima na ata sə lətə vəi ndzəndziyirni ka kəsi Urushalima.

⁵MTHLAKU hara apani kamnyar tə Dauda ku hara su na kalkal alari. Akwa shanga virayeri ar mpikari tsa aɗi ɗar ɓəli tsawurni wa, tar akwa wujir Uriya na mdər Hitti.

⁶Mpa na baɗita akwa daɓwa Rehobowam ka Yerobowam ku ləkəma har akwa ndzəndziyir mpika Abijam.

⁷Shanga suayeri tə Abijam ku hara ni, mdə ku rəbutə ɗa akwa Kakaɗər Labar ar Kuthlyayeri ar Yahuda. Antə mpa ku ləkəma akwa daɓwa Abijam ka Yerobowam.

⁸Sakatə Abijam mta, antə mdə harəmta ni akwa Bərniyir Dauda. Antə Asa na ɓzərni ku ləkwa kuthlikur ata vəyari.

⁹Asa baɗitə ndzi kuthlir Yahuda akwa məva na sərkumarkur ar Yerobowam na kuthlir Israila.

¹⁰Antə Asa ku hara kuthlikur ar məva nfwarkumari ka ntang akwa Urushalima. Thləma kəkarni an Maaka na ngkwar Abishalom.

¹¹Asa ku hara su na kalkal aka MTHLAKU apatə Dauda na kəkarni ku hara.

¹²Tsa ku kədləɓəla shanga shili ka mwanki na ana hara karwakur akwa mashiɗayeri ar haptu, ka famta shanga haptayeri natə kəkayeri arni ku namta.

¹³Tsuwa har Kuthli Asa ku kəli Maaka na kəkarni kazhar vəi ndzəndziyir kuthli mwalakur, kamnyar tsa an namtə haptu Ashera na sur cikə ni. Asa ku tadərəmta haptu ni, ka mbamta ni akwa Mular Kidron.

¹⁴Wala tə Asa aɗi famta mashiɗayeri wa, tsa ku ndzi ka kələngkər aka MTHLAKU akwa shanga ndzəndziyir mpikari.

¹⁵Tsuwa tsa ku səntə cautayeri natə babani hamta aka Hyel, ka cautayeri natə tsa ka kərari an hamta, ka pwi ɗa akwa mbwar vəngkər səli aka MTHLAKU. Cautayeri ngəni an adzərfa, ka dinar, ka kari kəthlərayeri damwa.

¹⁶Antə Asa na kuthlir Yahuda ka Baasha na kuthlir Israila ku ndzi akwa mpa tədəku akwa ndzəndziyir ɗa.

¹⁷Baasha na kuthlir Israila ku mwantə dləra aka Yahuda, ka pwi sojayeri arni akwa Rama kamnyar ngkatə ta mda asəɓəla wala ləvəi adzə Asa na kuthlir Yahuda.

¹⁸Antə Asa fatə mambila adzərfa ka dinar na akwa kəi kuthlikur, ka na akwa mbwar vəngkər səli, ka hamta ɗa aka buɗayeri arni. Antə tsa thlentə ɗa aka Benhadad na ɓzər Tabrimmon na ɓzər Heziyon, kuthlir Siriya na ka ndzi ahar Damaska, ka pəla,

¹⁹“Ndzi ka mwa mbwi alkawal akwa daɓwa mwa, tsu apatə baba'na ka baba' nga ku hara waci. Nggədza tsuwa, I ata thlenta ala gə cautər adzərfa ka dinar. Antə mwari ka ra sharəmta alkawalər giri ka Baasha na kuthlir Israila, kamnyar ka tsa fwaɓəla sojayeri arni kazhar tsəɗiyirna.”

²⁰Antə Benhadad ku kələngkər aka Kuthli Asa, ka thlentə sojayeri arni kəga mji na ol'ola ata kəra ɗa, ka da ra dlər bərniyayeri ar Israila. Antə da ku səm Ijon, ka Dan, ka Abel Beth Maaka, ka Kinnereth ka shanga tsəɗiyir Naftali.

²¹Sakatə Baasha ku nggatə su na akwa hara, antə tsa thlatə kazhar Rama, kara ndzəndzi akwa Tirza.

²²Antə Kuthli Asa ku psəmnya aka shanga mjir Yahuda, abbər ka da famta pela na akwa Rama, kəga udzəmayeri natə Baasha ku kəthlər kəgari. Ka suayeri ngəni antə Kuthli Asa kəthlər kəgari akwa hənɓəla katanggar Geba na akwa Benjamin, ka tsuwa Mizpa.

²³Shanga suayeri tə Asa ku hara, ka katsalakurərni, ka bərniyayeri tə tsa lata, mdə ku rəbutə ɗa akwa Kakaɗər Labar ar Kuthlyayeri ar Yahuda. Amma sakatə tsa ku hali antə shilku ku wutə ni akwa səlari.

²⁴Antə Asa ku mti, antə mdə ku harəmta ni akwa vəi kulər kuthlyayeri, ata vəi duku kəga kəkayeri arni akwa Bərniyir Dauda. Antə Yehoshafat na ɓzərni ku ləkwa kuthlikur ata vəyari.

²⁵Antə Nadab na ɓzər Yerobowam baɗitə kuthlikur ata kəra Israila akwa məva na suɗkur ar Asa na kuthlir Yahuda. Antə tsa hara kuthlikur ata kəra Israila ar məva suɗa.

²⁶Tsa nu surharar baba'ni ka hara su na ɗimi aka MTHLAKU, ka vu Israila akwa hara biku.

²⁷Baasha na ɓzər Ahija na akwa nyarmbwar Issakar, ku ɗəmhə ɗimikur ata kəra Nadab. Antə Baasha ku tsi ni ahar Gibbethlon na akwa Filistiya, kamnyar Nadab ka shanga Israila ku kalaktə Gibbethlon ka mpa.

²⁸Apani antə Baasha ku tsi Nadab akwa məva na makərkur ar Asa na kuthlir Yahuda. Antə tsa ku hara kuthlikur ata vəyari.

²⁹Tsuwa təkəma tə tsa ndzi kuthli, antə tsa tsəgəi shanga mjir kutakəyir Yerobowam, mda aɗi na mbili wala pal ka mpikə wa. Tsa shamta ɗa karkar tsu apatə MTHLAKU ku pəla atar buɗarni Ahija na mdər Shilo.

³⁰Su ngəni hara apani ni kamnyar tə Yerobowam ku ɓzamtə ɗəffa MTHLAKU na Hyelər Israila atar hara biku, ka atar vu mjir Israila akwa hara biku.

³¹Shanga suayeri tə Nadab ku hara, mdə ku rəbutə ɗa akwa Kakaɗər Labar ar Kuthlyayeri ar Israila.

³²Antə mpa ku ndzi akwa daɓwa Asa na kuthlir Yahuda ka Baasha na kuthlir Israila akwa shanga ndzəndziyir mpika ɗa.

³³Akwa məva na makərkur ar Asa na kuthlir Yahuda, antə Baasha na ɓzər Ahija baɗitə kuthlikur ata kəra Israila ahar Tirza. Antə tsa hara kuthlikur ar məva sərkumari ka nfwar.

³⁴Amma tsa ku hara su na ɗimi aka MTHLAKU, ka nu surharar Yerobowam, ka vu mjir Israila akwa hara biku.