Read bura-pabir 1 Kuthlyayeri 16 Bible Online

1 Kuthlyayeri 16 - bura-pabir bible

1 Kuthlyayeri 16

¹Antə MTHLAKU pəla aka Yehu na ɓzər Hanani ka tsa pəla aka Baasha abbər,

²“Shang ga aɗi su laga wa tar sakatə I carɓəla nga ka vəi nga ata kəra mjirna Israila. Amma ga ku nu surharar Yerobowam, ka vu mjirna Israila tə da hara biku. Antə bikayeri arɗa ku ɓzamtə ɗəffi.

³Antə apani I ata shamta nga kəga kutakəyir nga tsu apatə I hara aka kutakəyir Yerobowam na ɓzər Nebat.

⁴Kilayeri ata sə ɓɗə mjir kutakəyir nga na mta akwa bərni, antə ɗikayeri ata sə səm mji na mta akwa mtakəu.”

⁵Shanga suayeri tə Baasha hara, mdə ku rəbutə ɗa akwa Kakaɗər Labar ar Kuthlyayeri ar Israila.

⁶Antə Baasha ku mti, tə mdə ku harəmta ni ahar Tirza. Antə Ela na ɓzərni ku ləkwa kuthlikur ata vəyari.

⁷Ndərər MTHLAKU ni ku si aka Baasha ka kutakəyirni atar naɓi Yehu na ɓzər Hanani. Ndər ni si kamnyar shanga ɗimikur tə Baasha hara aka MTHLAKU. Tsa ɓzamtə ɗəffa MTHLAKU aɗi kamnyar ɗimikur tə tsa hara apatə kuthli Yerobowam ku hara daci wa, amma kamnyar tə tsa ku tsəgəi shanga mjir kutakəyir Yerobowam.

⁸Akwa məva na sərkumari ka ngkwakur ar Asa na kuthlir Yahuda, antə Ela na ɓzər Baasha baɗitə hara kuthlikur ata kəra Israila ahar Tirza. Tsa hara kuthlikur ar məva suɗa.

⁹Zimri na pal akwa nca kwakunayeri arni, na ola ata kəra retar wagənayeri ar takurni ku ɗəmhə ɗimikur ata kərari. Vir laga Ela mwari ahar Tirza ka ləkwa sa yimər anap ka wika akwa kəyir Arza, mdə na ola ata kəra kəyir kuthlikur na akwa Tirza.

¹⁰Antə Zimri ləmbwa ka tsi ni. Su ngəni hara akwa məva sərkumari ka murfəkur ar Asa na kuthlir Yahuda. Antə Zimri ndzi kuthli ata vəyari.

¹¹Təkəma sakatə tsa baɗitə kuthlikur ni, antə tsa tsəgəi shanga mjir kutakəyir Baasha. Tsa aɗi zhar alari mdə sal wala duku na yangkurari, wala na pazhirni wa.

¹²Apani antə Zimri kurəmta shanga mjir kutakəyir Baasha, apatə MTHLAKU ku pəla aka Baasha atar naɓi Yehu.

¹³Su ngəni ku hara kamnyar bikayeri ar Baasha, ka ar Ela na ɓzərni, ka kamnyar tə da vu Israila akwa hara biku atar vəngkər səli aka haptayeri, ka ɓzamtə ɗəffa MTHLAKU na Hyelər Israila.

¹⁴Shanga suayeri natə Ela ku hara, mdə ku rəbutə ɗa akwa Kakaɗər Labar ar Kuthlyayeri ar Israila.

¹⁵Akwa məva na sərkumari ka murfəkur ar Asa na kuthlir Yahuda, Zimri ku hara kuthlikur ar vir murfa ahar Tirza. Akwa sakari sojayeri arni ku ra dlər Gibbethlon na akwa Filistiya.

¹⁶Sakatə sojayeri na akwa Gibbethlon nda ku nggata abbər, Zimri ku ɗəmhə ɗimikur ka tsi Kuthli Ela, antə da vəi Omri na olər sojayeri ka tsa ndzi kuthlir Israila tsu anda vir nda.

¹⁷Antə Omri ka sojayeri ar Israila ku thlatə kazhar Gibbethlon, ka ra kalaktə Tirza.

¹⁸Sakatə Zimri wuta abbər mdə ku dlutsə bərni ni, antə tsa ləkwa mbwa laga na akwa kəi kuthlikur ka hangkər u'u, ka mbamta kərni, antə tsa ku mti.

¹⁹Su ngəni hara kamnyar bikayeri tə tsa hara aka MTHLAKU, atar nu surharar Yerobowam, ka kamnyar tə tsa vu mjir Israila akwa hara biku.

²⁰Shanga suayeri natə Zimri ku hara ka ɗimikurərni, mdə ku rəbutə ɗa akwa Kakaɗər Labar ar Kuthlyayeri ar Israila.

²¹Aghəla mtər Zimri antə mjir Israila ndəkəidzi ka bwa suɗa, tə retar mji nu Tibni na ɓzər Ginath, ka vəi ni kuthli, antə retar mji nu Omri.

²²Amma mji na nu Omri ku nggyari mji na nu Tibni na ɓzər Ginath ni. Apani Tibni ku mti, antə Omri ku ndzi kuthli.

²³Akwa məva na makkumari ka ntangkur ar Asa na kuthlir Yahuda antə Omri baɗitə hara kuthlikur ata kəra Israila. Antə tsa hara kuthlikur ar məva kumnya suɗa, na ngkwari akwa Tirza.

²⁴Antə Omri mastə gar ar Samariya akəla Shemer ata kəra liyar adzərfa dəpu ngkwa. Antə tsa vətə thləma bərni tə tsa nthləi ata gar ni, Samariya, kamnyar nar olkur aka thləma Shemer na mthlakər gar ni.

²⁵Omri ku hara su na ɗimi aka MTHLAKU, ka təramta shanga kuthlyayeri na akəmata tsa.

²⁶Kamnyar tsa ku nu surharar Yerobowam na ɓzər Nebat, ka vu mjir Israila akwa hara biku atar vəngkər səli aka haptayeri. Antə ɗəffa MTHLAKU na Hyelər Israila ku ɓzi.

²⁷Shanga suayeri natə Omri hara, ka katsalakurərni, mdə ku rəbutə ɗa akwa Kakaɗər Labar ar Kuthlyayeri ar Israila.

²⁸Omri ku mti, antə mdə harəmta ni akwa Samariya. Antə Ahab na ɓzərni ku ləkwa kuthlikur ata vəyari.

²⁹Akwa məva na makkumari ka nciskur ar Asa na kuthlir Yahuda, antə Ahab na ɓzər Omri baɗitə hara kuthlikur ata kəra Israila. Tsa hara kuthlikur ata kəra Israila ahar Samariya ar məva sərkumari ka suɗa.

³⁰Antə Ahab na ɓzər Omri hara su na ɗimi aka MTHLAKU ka təramta shanga kuthlyayeri na akəmata tsa.

³¹Nu surharar Yerobowam ma aɗi mzhi ni shang wa, tar tə tsa kəl Yezebel na ngkwar Ethbaal na kuthlir Sidon, ka vəngkər səli aka Baal.

³²Ahab ku həntə mbwa aka haptu Baal akwa Samariya, ka həntə bagaɗiyir hamta saɗaka akwa, ka vu ni akwa.

³³Aghəla nda antə tsa namtə mwala haptu Ashera. Ahab ku hara suayeri damwa na ɗimi ka mbwantə ɗəffa MTHLAKU na Hyelər Israila. Ɗimikur tə tsa hara ku təramta shanga su tə kuthlyayeri ar Israila na akəmata tsa ku hara.

³⁴Akwa sakar kuthlikurərni antə Hiyel na ahar Bethlel jaktə namtə Yariko. Abiram na yarakəmar Hiyel ku mti akwa sakatə tsa akwa vəi səla Yariko, antə Segub na gajirni ku mti sakatə tsa akwa nam nyarfayeri, tsu apatə MTHLAKU ku pəla atar Joshuwa na ɓzər Nun.