Read bura-pabir 1 Kuthlyayeri 17 Bible Online

1 Kuthlyayeri 17 - bura-pabir bible

1 Kuthlyayeri 17

¹Naɓi laga aɗi na mdər Tishbe akwa tsəɗi Gileyad. Vir laga tsa thlatə ka mwari adzə Kuthli Ahab ka pəla alari abbər, “Apatə MTHLAKU na Hyelər Israila aɗi, natə I an buɗarni, kəlangkə wala yimi aɗi ata hara akwa məva nayeri ni wa, tar ma I ku pəla.”

²Antə MTHLAKU pəla alari abbər,

³“Təra kazhar vəi ni kara nu təbwar raghəi, kara ɗuwardzi akwa Zərkər Kerith na akwa bwar raghəi ka Jodan.

⁴Ga ata sə sa yimi akwa zərkə ni, antə I ku tsawa aka zəlakayeri ka da mwanta ala gə susəma anda.”

⁵Antə Iliya ku təra apatə MTHLAKU ku pəla, ka ra ndzəndzi ata mnya Zərkər Kerith, akwa bwar raghəi ka Jodan.

⁶Antə zəlakayeri ana sənta alari buradi ka kum, ɗəɗəpa ka tahaku. Antə tsa ku sa yimi akwa zərkə ni.

⁷Amma aghəla saka laga raka antə yimər zərkə ni shuwi kamnyar tə yimi aɗi təra akwa tsəɗi nda wa.

⁸Antə MTHLAKU pəla aka Iliya abbər,

⁹“Thlatə kara mwari ahar Zarefath na akwa bwar Sidon, kara ndzəndzi anda. I ku tsawa aka mwala kughung laga anda ka tsa na ala gə susəma.”

¹⁰Antə tsa ku təra ka mwari ahar Sidon. Sakatə tsa ku mzhitə nyarfur bərni ni, təng tsa wutə mwala kughung laga akwa tsaɓ udzəm. Antə Iliya kəga ni ka pəla, “Ga adlar ra ka yimi raka akwa tasar ngə ya kəi sa?”

¹¹Sakatə mwala ni akwa mwari kamnyar səntari, antə Iliya jaktə pəla, “Ka gə sənta ali buradi raka akwa tsiya gə usa,”

¹²Amma mwala ni pəla, “I akwa kahyel ala ga akwa thləma MTHLAKU na ka mpika, I aɗi ka susəma avəi azi wa. Su na mbila an təng mpwa kuta tsi pal akwa tughum, ka mal laga raka akwa kutəku. Antə kulini I akwa tsaɓ udzəm ni kamnyar kəi ra namtə susəma ala yeru ka ɓzərna. Aghəla nda, ka yeru mta.”

¹³Amma Iliya pəla alari, “Ga aɗiya thlivər wa, mwari kara hara apatə ga ku pəla. Amma na ntangkəma kara namta ali masa raka ka gə sənta ali, aghəla nda kara namta ala giri ka ɓzər nga.

¹⁴Kamnyar MTHLAKU na Hyelər Israila an pəla, ‘Mpwa na akwa tughumər nga nda aɗi ata kur wa. Tsuwa mal na akwa kutəkər nga aɗi ata kur wa tar vir tə MTHLAKU ku thlentə yimərhyel ata di.’ ”

¹⁵Antə mwala ni mwari ka hara tsu apatə Iliya ku pəla. Antə mwala ni ka ɓzərni ka Iliya ku ləkəma ka səm susəm ni ar vir hang.

¹⁶Tsuwa tsu apatə MTHLAKU ku pəla atar Iliya, mpu na akwa tughum ni aɗi kur wa, tsuwa mal na akwa kutəku nda aɗi kur wa.

¹⁷Aghəla ngəni ɓzər mwala na mthlakər kəi ni ku hara nggawa, antə nggawakur ni ku hara mwavər har tə mpikari ku kuri.

¹⁸Antə mwala ni pəla aka Iliya, “Man su tə I hara ala gə ri? I ana wuta apa gə mdər Hyel! Ga ku si adzə ra kamnyar ka gə tsi ɓzərna, ka ɗangtə ali bikərna ya?”

¹⁹Antə Iliya pəla, “Səntə ali ɓzər ni.” Antə tsa dlu ni akəla mwala ni, ka mwantə ni akwa kutambwa na amta akwa vəi fəliyirni ka peri ni ata dəkəl.

²⁰Antə tsa ku hara adduwa ka kuraku aka MTHLAKU abbər, “MTHLAKU na Hyelərna, kamnyar mə tə gə səntə asar aka mwala kughung nə ri? Tsa ku dlu ra ka kucali amma ga ku tsi ɓzərni.”

²¹Antə Iliya ndərardzi ata kəra ɓzəngkyar ni ka makər ka hara adduwa abbər, “MTHLAKU na Hyelərna ndzi ka mpika ɓzərni səghəli!”

²²Antə MTHLAKU ku nggatə adduwar Iliya, antə mpika ɓzəngkyar ni ku səghəli.

²³Antə Iliya kətə ɓzəngkyar ni ka səghəi ka tsa ka hamta ni aka mama'ni, ka pəla, “Wula, ɓzər nga ku mbəi!”

²⁴Antə mwala ni pəla aka Iliya abbər, “Kulini I ku nggaɓəla abbər ga an mdər Hyel, ka tsuwa su tə ga akwa pəlari ata kəra MTHLAKU ni an jiri.”