Read bura-pabir 1 Kuthlyayeri 18 Bible Online

1 Kuthlyayeri 18 - bura-pabir bible

1 Kuthlyayeri 18

¹Aghəla saka laga akwa məva na makərkur antə MTHLAKU pəla aka Iliya, “Mwari kara ncantə kər nga aka Ahab, antə I ata sə thlentə ka yimərhyel hara.”

²Antə Iliya ku mwari ka ncantə kərni aka Ahab. Akwa saka ngəni mi ni ku hara mwavər akwa Samariya.

³Antə Ahab ku kəga Obadiya na ola ata kəra kəi kuthlikur. Tsuwa Obadiya ana nu MTHLAKU ka duna.

⁴Sakatə Yezebel akwa tsəgəi naɓiyayeri ar MTHLAKU, Obadiya ku fatə naɓiyayeri aru pal ka ndəkəi ɗa ntəfkumari ntəfkumari ka ɗuwar ɗa akwa kur pela, ka hamta ala ɗa buradi ka yimi.

⁵Antə Ahab pəla aka Obadiya, “Mwa mwari ka mwa dlarhə shanga vəi tə kucirkilayeri ka mularayeri na akwa tsəɗi ni ata. Nuhum mwa awutə kusar na ata mbantə mpika takwayeri ka kwaraləbandərayeri, kamnyar ta mwa asə hara asar ar bwadukwa ɗa.”

⁶Apani antə da ndəkəi tsəɗi ni tə Ahab ku nutə bwa pal antə Obadiya ku nutə bwa na dukwari.

⁷Sakatə Obadiya akwa mwa akwa laku antə da kəɓa ka Iliya. Təkəma təng Obadiya nggaɓəla abbər Iliya, antə tsa zuzuri ka dləri kəmari ata di, ka pəla, “Ngəni gə ya mthlakərna Iliya?”

⁸Antə tsa pəla alari, “I, Iya. Mwari kara pəla aka mdərkəyir nga abbər, ‘I azi.’ ”

⁹Amma Obadiya pəla, “Man tə I ɓzamtə ri, tə ga ata vu ra akwa tsiya Ahab, ka tsa tsi ra ni?

¹⁰Kamnyar I ata kahyel ala ga akwa thləma MTHLAKU na Hyelər nga na ka mpika abbər tsəɗi aɗi akwa duniya ni kula Kuthli Ahab ku thlentə ka mdə bara nga akwa wa. Antə kəlara tsəɗi na pəla, ‘Iliya aɗi azi wa,’ Ahab ata vu ka kuthlir tsəɗi ni kahyel abbər jiri da aɗi wutə ngə wa.

¹¹Antə kulini ga akwa bara kəi ra pəla alari abbər ga azi ya?

¹²Tsuwa ma I ku təra kazhar nga, təkəma mambələr MTHLAKU ata kətə nga ka mwantə nga akwa vəi tə I aɗi səndə wa. Antə ma I ku pəla aka Ahab abbər ga azi, amma tsa aɗi si ka wutə ngə wa, tsa ata tsi ra. Ai diya I ana vəngkər səli aka MTHLAKU təng tə I akwa ngkyarkurərna.

¹³Zanuwa, ga aɗi nggatə su ata kəra Yezebel sakatə tsa akwa bara tsəgəi naɓiyayeri ar MTHLAKU ni wa ya? I ku ɗuwar naɓiyayeri aru pal akwa nca ɗa akwa ku suɗa, watau mji ntəfkumari ntəfkumari, ka ndlantə ɗa ka buradi ka yimi.

¹⁴Apa madi tə ga ata pəla kəi ra pəla aka Ahab abbər ga azi ri? Ai tsa ata tsi ra!”

¹⁵Antə Iliya pəla, “Apatə MTHLAKU na ka Duna ta Shang aɗi, natə I an buɗarni, I ata ncantə kərna aka Ahab ashina.”

¹⁶Antə Obadiya ku təra mwari ra wutə Ahab, ka pəla alari. Antə Ahab ku təra mwari ka da kəɓa ka Iliya.

¹⁷Sakatə Ahab ku wutə Iliya, antə Ahab pəla alari, “An ngə ni ya, mdər hara bwani aka Israila!”

¹⁸Antə Iliya shinau alari abbər, “I aɗi hara bwani aka Israila wa. Amma ga ka kutakəyir nga an akwa harari, kamnyar tə giri ku nggəlar ta kələngkər aka tsawur MTHLAKU ka nu Baal.

¹⁹Kulini tsaptə shanga mjir Israila ka da ra wutə ra ata Gar Karmel. Tsuwa ka giri si ka naɓiyayeri ar Baal aru nfwar ka ntəfkumari ka naɓiyayeri aru nfwar ar Ashera, na ana səma ata tebər ar Yezebel.”

²⁰Antə Ahab thlenta aka shanga mjir Israila kəga naɓiyayeri ni, tə da tsaptədzi ata Gar Karmel.

²¹Antə Iliya mwari ka thləthlata akəma ɗa, ka pəla, “Har saka madi tə giri ata ləkəma ka tətali akwa daɓwa dzam suɗə ri? Ma MTHLAKU an Hyel, nu giri ni. Amma ma Baal an Hyel, nu giri ni.” Amma mji aɗi shinau alari wa.

²²Antə Iliya pəla, “I shira an mbila na naɓiyir MTHLAKU. Amma naɓiyayeri ar Baal da aru nfwar ka ntəfkumari.

²³“Ka mdə səntə gyalayeri suɗa. Antə ka naɓiyayeri ar Baal carɓəla gyal pal, ka da thləthlauwa ka da puta ata udzəm, amma da aɗiya hatə u'u wa. Tsuwa I ata ɗəmhə gyal na palari ni ka putə ni ata udzəm, amma I aɗi ata hatə u'u wa.

²⁴Antə ka naɓiyayeri ar Baal ni hara adduwa aka hyelər ɗa, antə I tsuwa ata sə hara adduwa aka MTHLAKU. Antə Hyel na ku shinau ka u'u, tsa an Hyel na jirari ni.” Antə shanga mji pəla, “Kalkal.”

²⁵Iliya pəla aka naɓiyayeri ar Baal abbər, “Ka giri baɗita, kamnyar giri an hangari. Carɓəla giri gyal pal, ka giri ɗəmha amma giri aɗiya hatə u'u wa. Ka giri hara adduwa aka hyelər giri.”

²⁶Antə da carɓəla gyal pal ka namtə ni, ka baɗitə hara adduwa aka Baal ni təng ɗəɗəpa har kərathlər pci. Da akwa kiɗa abbər ka tsa jingkər u'u. Da kawartə bagaɗi ni akwa ɓathla akwa pəla, “Shinau ala yeru, Baal ragai!” Amma mda aɗi na shinau wa.

²⁷Ata kərathlər pci antə Iliya hara kyartəkur ala ɗa, akwa pəla, “Hara gir adduwa ni ka kuraku! Ai tsa hyel! Sakani hangkalari ata vəi damwa, wala nuhum tsa ra samta yimi, wala tsuwa tsa ləɓəla ka mwari akwa vəi laga. Ma apani wa nuhum tsa akwa heni, antə tar ka giri thlentə ni.”

²⁸Antə naɓiyayeri ni jaktə haptə kuraka ɗa ka duna, akwa thləthla dza ɗa ka ingdla ka katsakar tar tə mamshi səɓəla akwa hwi ata dza ɗa. Ngəni hwatu an surharar ɗa.

²⁹Da ləkəma ka hara kuraku ka nggungguni kaɗəfkaɗəffu har ka vədza aka sakar hamta saɗaka na ar duwar. Amma shang mda aɗi na shinau wa.

³⁰Antə Iliya pəla aka shanga mji, “Shahə girdzi azi”, antə da ku shahədzi adzə ni. Antə tsa jaktə namtə bagaɗi aka MTHLAKU na huzamtadzi ni.

³¹Antə Iliya fatə pelayeri kumnya suɗa kalkal ka nyarmbwayeri ar maɗashilər Yakub, mdə natə MTHLAKU ku vəta alari thləm Israila.

³²Antə ka pelayeri nda tsa namtə bagaɗi kamnyar hu thləma MTHLAKU. Antə tsa lamta ku na kalaktə bagaɗi ni, olkurərni ata mzhi kəsi yimi lita kumnya nfwar.

³³Antə tsa patə udzəm ni ata bagaɗi ni, ka thləthlau gyal ni ka puta ata udzəm ni. Antə tsa pəla, “Nghyantə giri tughum nfwar ka yimi ka giri pungkər ata kəra kum na ata kəra udzəm ni.”

³⁴Antə tsa pəla, “Jaktə giri ka damwa.” Antə da pungkər ka damwa. Tsa jaktə pəla, “Jaktə pungkər giri ka damwa.” Antə da jaktə pungkər na makərkurari.

³⁵Antə yimi ni ku hwi ka kalaktə bagaɗi ni, tə ku ni ku nghyantədzi ka yimi.

³⁶Sakatə sakar hamta saɗaka na tahaku ku hara, antə naɓi Iliya si kudzəhə ka pəla, “MTHLAKU na Hyelər Ibrahim, ka Ishaku, ka Israila. Kulini ka gə ncaɓəla ata bəbal abbər gə Hyelər Israila, ka abbər I an buɗar nga, antə I hara su ngəni atar tsawur nga.

³⁷Shinau ali, MTHLAKU, shinau ali, kamnyar ka mji ngəni sənda abbər, ga an MTHLAKU na Hyel, ka gə jaktə ngka ka hangkala ɗa adzə nga.”

³⁸Apani antə u'u ar MTHLAKU ku səghəi ka mbamta saɗaka ni, ka udzəm ni, ka pelayeri ni, ka bərbər ka shiwumnya yimi na akwa ku ni.

³⁹Sakatə shanga mji ku wutə su ngəni, antə da ndla ka dləri kəma ɗa ata di, ka pəla, “MTHLAKU an Hyel! MTHLAKU an Hyel.”

⁴⁰Antə Iliya pəla ala ɗa, “Ngkəgəi giri naɓiyayeri ar Baal ni. Giri aɗiya zhari wala duku ka tsa msər wa!” Antə da ku ngkəgəi ɗa, antə Iliya ku mwantə ɗa akwa Zərkər Kishon ka tsəgəi ɗa anda.

⁴¹Antə Iliya pəla aka Kuthli Ahab, “Mwari kara səm susəma kamnyar ndaga kuraka shambar yimi akwa si.”

⁴²Sakatə Ahab ku təra ra səm susəma, antə Iliya ku ləmta ata kəra Gar Karmel, ka zuzuri ata di, ka mbu kəmari akwa daɓwa ɓunjari.

⁴³Antə tsa pəla aka buɗarni, “Mwari, kara wul təbwar manda.” Antə tsa ku mwari ka ngka ka pəla, “I aɗi wutə su wa.” Antə tsa pəla, “Mwari ka damwa har ka murfa.”

⁴⁴Amma akwa mwarərni na murfəkur antə tsa pəla, “I ku wutə ɓzər dlamba laga raka apa mandaɓar tsiya mda akwa haptədzi ata kəra manda.” Antə Iliya pəla, “Mwari, kara pəla aka Kuthli Ahab, ‘Ɗəmhədzi ka wagən ar takur nga kara ləha, ta yimərhyel asə ngkatə nga.’ ”

⁴⁵Akwa saka laga raka təkəma təng kutahyel ndlətədzi ka dlamba mənggəl thlərətu ka shambar. Antə yimi na hang ka duna ku hara. Antə Ahab ləkwa wagənər takurni ka hwi mwari ahar Yezireyel.

⁴⁶Dunar MTHLAKU ku si ata kəra Iliya, antə tsa ku mbwahə kusarari, ka hwihwi ka dlu kəma akəla Ahab ka mzhitə nyarfur Yezireyel.