Read bura-pabir 1 Kuthlyayeri 19 Bible Online

1 Kuthlyayeri 19 - bura-pabir bible

1 Kuthlyayeri 19

¹Antə Kuthli Ahab pəla aka mwalankiɗa Yezebel shanga su tə Iliya ku hara, ka apatə tsa ku tsəgəi shanga naɓiyayeri ni ka katsakar.

²Antə Yezebel thlentə kuraku aka Iliya abbər, “Ɗəpə saka apani ka hyelayeri ni tsi ra ma I aɗi tsi nga apatə ga ku tsi naɓiyayeri arna wa.”

³Antə Iliya ku thlivər, ka hwi kamnyar mpikari, ka si akwa Beyersheba, na akwa Yahuda, ka zhar buɗarni anda.

⁴Amma Iliya ku təra. Sakatə tsa ku mwa ar vir pal akwa mtakəu, antə tsa si ka ndzəndzi akira nfur shimtu laga ka kiɗa abbər kuji ka tsa mta. Tsa hara adduwa ka pəla, “MTHLAKU, I amzhi kəra wa, dlu mpikəi ni, kamnyar I aɗi təramta kəkayeri arna wa.”

⁵Antə tsa ku pəpəi ka heni akira nfur shimtu ni, təkəma təng mdərthlentərhyel si ka tsəkwar ni ka pəla alari, “Thlatə kara səm susəma.”

⁶Tə tsa ha ncari, təng nggədza waina gərgər abwa kərari ata pela ka mpəla laga ka yimi. Antə tsa ku səma ka sa ka jaktə pəpəi ka damwa.

⁷Antə mdərthlentərhyel ni jaktə si na suɗkur, ka tsəkwar ni, ka pəla, “Thlatə kara səma, ma apani wa mwa ni ata ndzi mwavər ala ga.”

⁸Antə tsa thlatə ka səma ka sa. Antə tsa ku təra ka dunar susəm ni adzə ni, ka mwar pci ka viri vir nfwarkumari, ka mzhitə Sinai na gar ar Hyel.

⁹Antə tsa ləkwa ku laga ka pi anda. Təkəma MTHLAKU ku si ka ndəra alari abbər, “Iliya, man tə ga akwa harari ri?”

¹⁰Antə tsa pəla, “I ku hara su tə I amzha tədəku kəi kələngkər ala gə MTHLAKU Hyel na ka Duna ta Shang. Amma mjir nga Israila ku ɓəli alkawalər nga, ka pukthləmta bagaɗiyayeri ar hamta saɗaka, ka tsəgəi naɓiyayeri ar nga ka katsakar. I shira daci an mbila, antə ba kulini da akwa bara tsi ra.”

¹¹Antə MTHLAKU pəla, “Ləɓəla kara thləthlata ata kəra gar akəmi.” Antə MTHLAKU ku təramta ka thlentə shambar na ol ka duna ka huzamta garayeri ka pukthləmta pelayeri, amma MTHLAKU aɗi akwa shambar ni wa. Aghəla shambar ni, kənggərantədzər di, amma MTHLAKU aɗi akwa kənggərantədzər di ni wa.

¹²Aghəla kənggərantədzər di ni, u'u. Amma MTHLAKU aɗi akwa u'u ni wa. Aghəla u'u ni, kuraku na raka.

¹³Sakatə Iliya ku nggatə kurakə ni, antə tsa hartə kəmari akwa alkyabarni ka ləɓəla, ka thləthlata ata mnya ku ni. Antə kuraku si alari akwa pəla, “Iliya, man su tə ga akwa harari azi ri?”

¹⁴Antə tsa pəla, “I akwa kəɗar hara kəthlər ala gə MTHLAKU Hyel na ka Duna ta Shang. Amma mjir nga Israila ku ɓəli alkawalər nga, ka pukthləmta bagaɗiyayeri ar hamta saɗaka, ka tsəgəi naɓiyayeri ar nga ka katsakar. I shira daci an mbila, antə ba kulini da akwa bara tsi ra.”

¹⁵Antə MTHLAKU pəla alari, “Ngka akwa lakur nga na akwa mtakər Damaska. Ma sakatə ga ku mzhitə di ni, ka gə bartə kəra Hazayel ka tsa ndzi kuthlir Siriya.

¹⁶Ka gə bartə kəra Yehu na ɓzər Nimshi ka tsa ndzi kuthlir Israila. Ka gə pungkər mal ar barkər ata kəra Elisha na ɓzər Shafat na ahar Abel Mehola, ka tsa ndzi naɓi ata vəya ga.

¹⁷Antə mdə na ku msər ta katsakarər Hazayel, Yehu ata sə tsi ni. Tsuwa mdə na ku msər ta katsakarər Yehu, Elisha ata tsi ni.

¹⁸Wala apani I ata sə mbilar mji dəpu murfa akwa Israila, na aɗi zuzuri aka Baal wa, tsuwa na aɗi vədzə mnyari alari wa.”

¹⁹Iliya ku thlatə kazhar vəi nda, kara wutə Elisha na ɓzər Shafat akwa tsuhwa ka thlar tsuhwa ar garma kumnya suɗa akəmari. Tsa akwa kəthlər ka na kumnya suɗkurari ni. Iliya ku təramta kudzəhə ka tsa, antə Iliya ku fəi alkyabarni ka pudza aka Elisha.

²⁰Antə Elisha zhar thlayeri ar tsuhwa nda, ka ləkwa nu Iliya ka hwi akwa pəla, “Ndzi kəi ra salamtə baba'na ka mama'na, kambəla I si, kəi nu nga.” Antə Iliya shinau alari, “Mwari, amma ka gə ɗangtə su tə I hara ala ga.”

²¹Antə tsa ku ngka ka zhar nu ni, tə tsa fatə thlayeri ar tsuhwa ni ka thlamta wulya ɗa, ka ti kumari ka udzəm wulya thla ni. Antə tsa hamta aka mji, tə da səma. Aghəla ngəni antə tsa thlatə ka nu Iliya ka ndzi mdər dlar ni.