Read bura-pabir 1 Kuthlyayeri 2 Bible Online

1 Kuthlyayeri 2 - bura-pabir bible

1 Kuthlyayeri 2

¹Sakatə sakar mtər Dauda ku hara kudzəha, antə tsa tsaktə Solaman na ɓzərni ka pəla,

²“Kulini sakar mtərna ku hara kudzəha, kamnyar ngəni kara ndzi ɓəɓal ka gə ncantə salkur.

³Antə kara hara su tə MTHLAKU na Hyelər nga tsawa ala ga. Ka gə nu ni, ka kələngkər aka shanga tsawayeri arni apatə ku rəbutədzi akwa tsawur Musa, kamnyar ka gə ləkəma akwa shanga su tə ga ata harari akwa kəlara vəi madi tə ga ata sə mwari akwa.

⁴Ma ga ku kələngkər aka MTHLAKU, tsa ata sə nghyaɓəla alkawal tə tsa hara ali abbər kəkayeri arna ata sə hara kuthlikur ata kəra Israila. Ma da ku vədzə hangkal ka kələngkər aka tsawayeri arni ka ndzi ka jirkur akwa ɗəffa ɗa, ka mpika ɗa, da aɗi ata ni ka mda ata dəkəl kuthlikur ar Israila wa.”

⁵“Tsuwa ga səndə su tə Yowab na ɓzər Zeruwiya hara ali, su tə tsa hara aka mji ol'olər mpa suɗa ar Israila, Abner na ɓzər Ner ka Amasa na ɓzər Yethler. Yowab ku pumta mamshir ɗa akwa sakar lapiyakur apa mda akwa sakar mpa. Tsuwa seɗar mamshi tə tsa pumta ni aɗi ata sur mbwadzərni na ata kusarari, ka tsuwa ata ɓaɓiyirni na akwa səlari.

⁶Ka gə hara alari su tə gə wuta abbər kalkal, amma ga aɗiya hir ka tsa fəi wa, wala ka tsa mtər sərpəi wa.

⁷Amma kara hara mdəkur aka maɗa' Barzillai na mdər Gileyad, ka da səma ata vəi səm susəmər nga kamnyar da ku hara ali ɓɗakkur akwa sakatə I akwa hwi ta Absalom na ɓzərma' nga.

⁸“Ka gə mbərsa ga ku hara su aka Shimeyi na ɓzər Gera akwa diyir Bahurim na ar Benjamin. Tsa ku nggəl ra ka nggəl na ɗimi ka duna sakatə I mwari ahar Mahanayim. Amma sakatə tsa si akwa thlakəmi akwa Jodan, I ku hara alkawal alari akwa thləma MTHLAKU abbər I aɗi ata tsi ni wa.

⁹Amma ar nga ga aɗiya zhar ta ɗi ni wa. Ga asəndə su tə ga ata hara alari, ka gə wuta abbər mdə ku tsi ni.”

¹⁰Dauda ku mti antə mdə ku harəmta ni akwa Bərniyir Dauda.

¹¹Tsa ku ndzi kuthlir Israila ar məva nfwarkumari. Tsa hara kuthlikur ar məva murfa akwa Hebron ka məvari makkumari ka makər akwa Urushalima.

¹²Apani antə Solaman ku lətə dəkəl kuthlikur ar baba'ni Dauda, antə kuthlikurərni ku ncidzi ka ndzi ka duna.

¹³Vir laga Adonija na ɓzər Haggith ku mwari adzə Bathsheba na mama' Solaman. Bathsheba ku yu ni abbər, “Gə səyir msərakur ya?” Antə tsa pəla, “I, msərakur.

¹⁴I ka su tə I ata bara kəi pəla ala ga.” Antə mwala ni pəla, “Pəla suari.”

¹⁵Antə tsa pəla abbər, “Ga asənda abbər kuthlikur ngəni an arna. Shanga mjir Israila ku hamta jiri abbər I an ata ndzi kuthlir ɗa. Amma suayeri ku si palidzi antə kuthlikur ni ku sə ndzi aka ɓzərda'na, kamnyar tə ku si alari akəla MTHLAKU.

¹⁶Kulini I ka sur kiɗə pal, usa ga aɗiya nggəlar ali wa.” Antə Bathsheba pəla, “Pəla suari.”

¹⁷Antə tsa pəla, “Gari ali bu aka Kuthli Solaman, kamnyar I asənda abbər tsa ata hara shanga su tə gə pəla alari. Kiɗə ni ka tsa na ali Abishag, ngkwa na thlata ahar Shunem ni, ka tsa ndzi mwalangkəya bu.”

¹⁸Antə Bathsheba pəla, “Ɓɗaku, I ata gari aka kuthli ata vəya ga.”

¹⁹Antə Bathsheba ku təra ka mwari adzə Kuthli Solaman, ka tsa gari alari ata vəya Adonija. Kuthli ni ku thlatə ka nggyarghəidzi ka thlawar mama'ni. Aghəla nda antə tsa ndzəndzi ata dəkəl kuthlikurərni. Ka vu ka mdə səntə dəkəl damwa aka mama'ni, tə tsa ndzəndzi təbwa mazəma kuthli.

²⁰Antə tsa pəla, “I ata kiɗə mdəkur akəla ga, usa ga aɗiya nggəlar ali wa.” Antə kuthli pəla, “Ngkər suari mama I aɗi ata nggəlarari wa.”

²¹Antə mama'ni pəla, “Ndzi ka mdə hamta Abishag na ngkwar di Shunem aka Adonija na ɓzərda' nga ka tsa ndzi mwalankiɗa bu.”

²²Antə Kuthli Solaman shinau aka mama'ni abbər, “Kamnyar mə tə ga ata yu Abishag na ngkwar di Shunem aka Adonija ri? Atar ngəni ga akwa bara kiɗa alari kuthlikurərna tsuwa. Nggədza ma tsa an olta iya akwa ya. Antə mji nayeri ni akwa nu bwahilari, Abiyathlar na prist ka Yowab na ɓzər Zeruwiya.”

²³Antə Kuthli Solaman kətə alkawal akwa thləma MTHLAKU abbər, “Ka Hyel tsi ra, ma I aɗi vu ka Adonija ntə ndər ngəni ka mpikari wa.

²⁴MTHLAKU ku kurtə ka vəi ra gyang ata kəra kuthlikur baba'na Dauda, ka kəsi alkawal ar hamta kuthlikur na ata ndzi aka durərna. I ku kahyel akwa thləma MTHLAKU na ka mpika abbər tsu ashina antə Adonija ata mta!”

²⁵Apani antə Kuthli Solaman ku thlentə Benaiya na ɓzər Yehoyada tə tsa ku ləɓəla ka tsi Adonija.

²⁶Antə Kuthli Solaman pəla aka Abiyathlar na prist abbər, “Mwa kara təra ləkwa tsəɗiyir giri Anathloth. Kamnyar kalkal ka gə mta, amma I aɗi ata hir ka mdə tsi nga kulini wa, kamnyar tə ga ku kəl Akwati Alkawal ar MTHLAKU na Hyel sakatə giri ka baba'na Dauda, antə ga ku ɗar bwani ata kəma duku ka baba'na sakatə tsa akwa bwani.”

²⁷Apani antə Solaman ku kədləmta Abiyathlar kazhar kəthlər ar pristkur aka MTHLAKU, kamnyar ka ndərər MTHLAKU tə tsa ku pəla ahar Shilo ata kəra kutakəi Eli na prist ni nghyaɓəladzi.

²⁸Sakatə Yowab nggatə labar ni, antə tsa hwi ka mwari akwa Tentər MTHLAKU, ka tamtə təmbəla bagaɗi ni ka kəsi. Kamnyar tə tsa ku nu Adonija, wala tə sakanda tsa aɗi nu Absalom wa.

²⁹Sakatə labar ni ku mzhitə Kuthli Solaman abbər Yowab ku hwi ka mwari akwa tentər MTHLAKU ka tsuwa tsa adzə bagaɗi ar hamta saɗaka, antə Kuthli Solaman thlentə Benaiya na ɓzər Yehoyada ka tsa ra tsi ni.

³⁰Antə Benaiya mwari akwa tentər MTHLAKU ni ka pəla aka Yowab abbər, “Kuthli pəla ka gə səɓəla!” Amma Yowab shinau ka pəla, “Awa, I ata mta tsu azi.” Antə Benaiya mwantə labar aka kuthli abbər, “Nggədza su tə Yowab shinangkər ali.”

³¹Antə kuthli pəla alari, “Kara hara tsu apa su tə tsa pəla, tsi ni kara harəmta ni. Antə apani mamshir mji na kula biku tə Yowab tsəgəi ni aɗi ata sə ndzi ata kəri, wala duku akwa kutakəyir baba'na wa.

³²MTHLAKU ata sə nta alari ka ɗimikur kamnyar mamshir mji tə tsa ku pumta kula səndər baba'na Dauda. Tsa ku tsəgəi mji suɗa ka katsakar, da an Abner na ɓzər Ner olər sojayeri ar Israila ka Amasa na ɓzər Yethler olər sojayeri ar Yahuda, natə japwa ɗa ku təramta ni ka ɓɗakkur.

³³Ndzi ka bikər mamshir ɗa ndzi ata kəra Yowab ka durərni har ba saka madi. Amma ata kəra Dauda ka kutakəyirni ka dəkəl kuthlikurərni ka durərni, ka msərakurər MTHLAKU ndzi ata kəra ɗa ba saka madi.”

³⁴Apani antə Benaiya na ɓzər Yehoyada ku mwari ka tsi Yowab. Antə mdə harəmta ni akwa kəyirni akwa mtakəu.

³⁵Antə kuthli ku vəi Benaiya na ɓzər Yehoyada ka tsa ndzi olər sojayeri ata vəya Yowab, ka vətə Zadok ata pristkur ata vəya Abiyathlar.

³⁶Antə kuthli thlentə ka mdə kəga alari Shimeyi, ka pəla alari, “Kara həntə kəyir nga azi akwa Urushalima, kara ndzəndzi akwa, ga aɗiya zhar vəi ni ka mwari akwa vəi damwa wa.

³⁷Kamnyar kəlara vir tə ga ku ləɓəla ka fəlɓəla Zərkər Kidron, ka gə sənda abbər vir nda ga ata mta, antə bikari ata ndzi ata kəra ga.”

³⁸Antə Shimeyi pəla aka kuthli, “Su tə gə pəla ni ku ndzi kalkal zanuwa. I ata hara apatə gə pəla.” Antə Shimeyi ku ndzəndzi akwa Urushalima ka fəi.

³⁹Aghəla məva makər, antə suɗa akwa nca mafayeri ar Shimeyi ku hwi ka mwari adzə Akish na ɓzər Maaka, na kuthlir Gath. Sakatə Shimeyi ku nggata abbər da akwa Gath,

⁴⁰antə tsa putə libaru ata hila kwararni ka təra mwari ahar Gath adzə Kuthli Akish, kamnyar pakə mafayeri arni. Sakatə tsa ku wutə ɗa antə tsa ku ngka ka da akwa Urushalima.

⁴¹Sakatə Solaman nggata abbər Shimeyi ku zhar Urushalima ka mwari ahar Gath ka ngka,

⁴²antə tsa ku kəga ni ka pəla alari, “I ku vu nga ka gə kətə alkawal akwa thləma MTHLAKU abbər ga aɗi ata zhar Urushalima wa. Tsuwa I ku tsaktə nga ka duna abbər ma ga ku hara su ngəni kula nuhum, ga ata mta. Ga aɗi kələngkər abbər ga ata ɓəlatari wa ya?

⁴³Kamnyar mə tə gə ɓəli alkawal tə gə kətə ni ka ndzi kula kələngkər aka tsawurna ri?

⁴⁴Ga asənda ata bəbal ɗimikurayeri tə gə hara aka baba'na Dauda. Kulini MTHLAKU ata ɗi nga ata kər.

⁴⁵Amma MTHLAKU ata vədza ali barka ka tsa namtə ka dəkəl kuthlikur Dauda ncidzi gyang har ba saka madi.”

⁴⁶Aghəla ngəni antə kuthli tsawa aka Benaiya na ɓzər Yehoyada, antə tsa mwari ka tsi ni. Akwa saka ngəni antə kuthlikur ncidzi gyang akwa tsiya Solaman.