Read bura-pabir 1 Kuthlyayeri 20 Bible Online

1 Kuthlyayeri 20 - bura-pabir bible

1 Kuthlyayeri 20

¹Benhadad na kuthlir Siriya ku tsaptə sojayeri arni ata kəma duku. Antə kuthlyayeri makkumari ka suɗa ku paktədzi ka tsa kəga takwayeri ka wagənər takwayeri anda. Antə da mwari ka kalaktə Samariya, ka mpa ka tsa.

²Antə Benhadad thlentə mjirni akwa bərni adzə Ahab na kuthlir Israila, ka pəla alari,

³“Adzərfa ka dinar ar nga da arna, mwankir nga na ɓɗak ta shang ka maɗa' nga da arna.”

⁴Antə kuthli Ahab shinau alari abbər, “Kalkal, zanuwa, shanga su tə I kəgari an ar nga.”

⁵Antə mjir thlentə ni ngka ka pəla, “Benhadad pəla, ‘I ku thlenta ala gə ka gə hamta ali adzərfar nga ka dinarər nga, ka maɗa' nga.

⁶Tsuwa I ata thlentə buɗayeri arna ɗəpa saka apani, antə da ata ra dlarhə kəyir nga ka kəyir buɗayeri ar nga, ka da fatə shanga su na ɓɗakɓɗaku.’ ”

⁷Antə kuthlir Israila ku kəga shanga mji ol'ola na akwa tsəɗi nda, ka pəla, “Wulhə giri laku tə mdə ngəni akwa bara mpar mburu. Tsa thlenta ali abbər kəi hamta alari mwankirna ka maɗa'na, ka adzərfarna ka dinarna, antə I ku kələngkər.”

⁸Antə mji ol'ol ni ka shanga mji pəla alari, “Ga aɗiya nggar ni wa, tsuwa ga aɗiya hir wa.”

⁹Antə Ahab pəla aka mjir thlentər Benhadad ni, “Pəla giri aka Bundi abbər, ‘Shanga su tə ga ku bara ntangkəma I ata harari, amma su na aghəl ni I amzhi harari wa.’ ” Antə mjir thlentə nda ku təra ka səntə ndər alari ka damwa.

¹⁰Benhadad pəla abbər, “Ka haptayeri tsi ra ma I aɗi dlərəmta Samariya ka fatə bərbərari akwa tsi wa!”

¹¹Antə kuthlir Israila shinau abbər, “Mdə na ana hatə kari mparni aɗi an mdə na ata gaya wa, amma tar mdə na ana ntsumta.”

¹²Benhadad nggatə ndər ngəni, sakatə tsa kəga kuthlyayeri akwa sa akwa galahayeri arɗa. Antə tsa tsawa aka sojayeri arni abbər, “Ɗəmhə girdzi.” Antə da ku ɗəmhədzər mpa ka Samariya.

¹³Akwa saka ndaga, naɓi laga ku si adzə Kuthli Ahab ka pəla, “Nggədza su tə MTHLAKU pəla, ‘Ga ku wutə dlamar sojayeri ngəni ni ya? I ata hamta ɗa akwa tsiya ga ashina, antə ga ata sənda abbər I an MTHLAKU.’ ”

¹⁴Antə Ahab yuwa, “Atar wa ri?” Antə naɓi ni shinau abbər, “MTHLAKU pəla, ‘Atar sojayeri ar mji na ol'ola ata kəra lardayeri.’ ” Antə kuthli ni jaktə yuwa, “Wan ata baɗitə mpa nə ri?” Naɓi ni shinau abbər, “Ga.”

¹⁵Antə Kuthli Ahab tsaptə sojayeri ar mji na ol'ola ata lardayeri. Antə da ku hara mji aru suɗa ka makkumari ka suɗa. Aghəla nda tsa tsaptə shanga sojayeri ar Israila, na ku mwantə dəpu murfa.

¹⁶Antə da ləɓəla kamnyar mpa ni ata kərathlər pci, sakatə Benhadad kəga kuthlyayeri na makkumari ka suɗa na akwa dlar ni ni akwa sa su ka wika akwa səvayeri arɗa.

¹⁷Sojayeri na kusta ar ajiyayeri na ata kəra lardu an baɗitə ləɓəla ntangkəma. Antə mjir wul ashira dawayeri natə Benhadad thlentə ni ku səntə kuraku abbər, “Sojayeri akwa səɓəla akwa Samariya.”

¹⁸Antə Benhadad pəla, “Ngkəi giri ɗa ka mpika, wala da si kamnyar mpa wala da si kamnyar msərakur!”

¹⁹Amma sojayeri na kusta ni ku kurtə səɓəla akwa bərni ni, ka mambila sojayeri arɗa aghəli akwa nu ɗa.

²⁰Antə kəlara soja ar Israila ku tsi dawarni. Mambila sojayeri ar Siriya ku thlivər ka hwi. Antə mjir Israila ku kədlə ɗa, amma Benhadad ka mjirni laga ku fəltə taku ka msəra.

²¹Amma Ahab ku ləɓəla ka ngkəgəi mambila takwayeri, ka wagən takwayeri, ka kurəmta mjir Siriya.

²²Aghəla nda antə naɓi ni si adzə kuthlir Israila, ka pəla alari, “Mwari kara dunautə sojayeri ar nga, kara ɗəmhədzi ɓɗaku, kamnyar kuthlir Siriya ata sə mpa nga akwa sakatə di ata mərta.”

²³Aghəla tə sojayeri ar Israila ku səm sojayeri ar Siriya, antə kwakunayeri ar kuthlir Siriya, watau Benhadad pəla alari, “Haptayeri ar Israila an haptər garayeri. An su na hara tə da nggyari mburu ni. Amma mburu ata nggyari ɗa ma mburu mpa ka da akwa bəbal.

²⁴Antə kulini ka gə famta kuthlyayeri na makkumari ka suɗə ni kazhar vəi ndzəndziyir ɗa, kara pu mji na ol'ola ar mpa ata vəya da.

²⁵Kara tsaptə sojayeri tsu apa sojayeri natə ga ku hara asarari ni. Ka gə hamta ala yeru hangkur taku ka wagənər taku tsu apa na ntangkəma ni. Antə mburu ata ra dlər ɗa akwa bəbal. Antə kula nuhum mburu ata səm ɗa.” Antə tsa kələngkər aka kurakər ɗa, ka hara tsu apa nda.

²⁶Sakatə di ata mərta, antə Benhadad tsaptə sojayeri arni, ka mwari ka da ahar Afek kamnyar ka da mpa ka Israila.

²⁷Antə mjir Israila tsaptədzi, ka ɗəmhədzi ka kari mpa, ka ləɓəla kamnyar mpa ɗa. Sojayeri ar Israila ku ndzi awul sojayeri ar Siriya apa ciɓər kwiyayeri suɗa raka raka, amma mjir Siriya ku nghyantə tsəɗi nda.

²⁸Antə mdər Hyel laga si ka pəla aka kuthlir Israila abbər, “MTHLAKU pəla abbər, ‘Mjir Siriya ku pəla abbər MTHLAKU an hyelər garayeri, amma tsa aɗi hyelər bəbal wa, antə I ata hamta shanga dlamar mji ngəni akwa tsiya ga. Antə ga ata sə sənda abbər I an MTHLAKU.’ ”

²⁹Antə mjir Israila ka mjir Siriya ku ntəhəmtadzi akwa wuldzi ka nvwa ɗa vir murfa. Akwa vir na murfəkur antə da baɗitə mpa. Antə mjir Israila ku tsəgəi mjir Siriya dəpu aru pal akwa pci pal.

³⁰Antə mji na ku mbili ku hwi mwari akwa bərni ar Afek, antə katanggar di nda ku ndla ata kəra ɗa ka tsi mji dəpu sərkumari ka murfa. Benhadad tsuwa ku msəri ka hwi mwari ahar Afek ka ɗuwardzi akwa mbwa laga.

³¹Antə kwakunayeri arni pəla alari, “Yeru ku nggata abbər kuthlyayeri ar Israila ana kətadzə mda. Ndzi ka yeru hatə dasa ata kusara yeru ka mbwi kəra yeru ka səwa, ka yeru mwari adzə kuthlir Israila. Nuhum tsa asə zhar nga ka mpika ga.”

³²Apani antə da ku mbwatə dasayeri ata kusara ɗa, ka mbwi kəra ɗa ka səwa, ka mwari adzə kuthlir Israila ka pəla, “Buɗar nga Benhadad pəla abbər, ‘Usa, zhar ra ka mpika.’ ” Antə tsa yuwa abbər, “Tsa tsu ka mpikə ya? Ai tsa ɓzərma'na.”

³³Kwakunayeri ar Benhadad akwa bara ka da wutə seɗa na ɓɗaku akəla Ahab. Antə sakatə Ahab pəla abbər, “Ɓzərma'na”, təkəma da ku dluɓəla akəlari, ka pəla, “Jiri giri ka Benhadad ndzi apa mji ka ɓzərma.” “Səntə gir ni ali”, ndə Ahab. Sakatə Benhadad ku si, antə Ahab kəga ni, ka tsa ra wutə ni akwa wagən.

³⁴Antə Benhadad pəla aka Ahab, “Bərniyayeri natə baba'na ku dlutsa akəla baba' nga, I ata hamta ɗa ala ga, ka gə sə namtə vəi hara kasəkur nga ahar Damaska, apa natə baba'na ku hara ahar Samariya.” Antə Ahab shinau abbər, “Ka alkawal ngəni I ata zhar nga kara təra.” Antə da mbwi alkawal, tə Ahab ku zhar ni tə tsa təra.

³⁵Akwa saka ngəni antə MTHLAKU tsawa aka ɓzər makarantər naɓi laga ka tsa pəla aka nvwani abbər, “Tsa ra.” Amma mdə ni nggəlar ta tsa ni.

³⁶Antə tsa pəla alari, “Təng tə ga aɗi kələngkər aka kurakər MTHLAKU wa, təkəma ma ga ku zhar vəi ni ka təra, tsəngi ata tsi nga.” Antə təkəma tə tsa təra kazhar vəi ni, tsəngi ku kəɓa ka tsa ka tsi ni.

³⁷Antə naɓi ni ra wutə mdə damwa ka pəla, “Tsa ra.” Antə mdə ni ku tsa ni ka duna ka dəkəi ni.

³⁸Antə naɓi ni bartə kərari ka gaɓaka na ku shamta dludzər kəmari, ka təra, ka ra səka kuthli ni ata mnya laku.

³⁹Sakatə kuthli ni akwa təramta, antə tsa kəga kuthli ni ka kuraku abbər, “I ku mwari akwa ɗəffa ɗəffa mpa, antə soja laga ngkəi mdə laga ka sənta ali, ka pəla, ‘Kəsi mdə ngəni. Ma tsa ku msəri, mpika ga an ata ndzi ata vəya mpikari, ma apani wa ga ata sə ntari ka liyar adzərfa dəpu makər.’

⁴⁰Antə apatə suayeri hang ku kətə hangkali, antə mdə ni ku hwi ka təra.” Antə kuthli ni pəla alari, “Ai ga ku pəla bikər nga ka mnya ga. Antə shariya ni ata ngkəi nga.”

⁴¹Antə naɓi ni pəparəmta gaɓaka na ata kəmari ni, təng təkəma Ahab nggaɓəla abbər mdə ni an pal akwa nca naɓiyayeri ni.

⁴²Antə Naɓi ni pəla aka kuthli ni abbər, “Nggədza su tə MTHLAKU pəla, ‘Kamnyar tə ga ku zhari tə mdə ni ku msəra akwa tsiya ga, mdə tə I pəla tar ma mdə tsi ni, kulini tar ka gə mta ata vəyari. Tsuwa mjir nga tsuwa ata mta ata vəya mjirni.’ ”

⁴³Antə kuthlir Israila ku ngka ahar Samariya ka ɗəffə ɓzəɓza ka kəmari hərhərari.