Read bura-pabir 1 Kuthlyayeri 21 Bible Online

1 Kuthlyayeri 21 - bura-pabir bible

1 Kuthlyayeri 21

¹Mdər Yezireyel laga aɗi ka thləmari Naboth na ka fakərni kudzəhə ka kəi kuthlikur ar Ahab na kuthlir Samariya.

²Vir laga Ahab pəla aka Naboth abbər, “Na ali fakər anapər ngə ni ka tsa ndzi fakər kari səkwar arna, təng tə tsa kudzəhə ka kəyirna ni. I ata na ala gə fakə na ɓɗaku ata vəyari, wala ma ga an ata bara kwabari kəi ntəmta ala ga.”

³Amma Naboth pəla aka Ahab, “Ka MTHLAKU ngkatə kəi hamta ala gə kifər baba'na!”

⁴Antə Ahab təra ləha ka ɗəffə ɓzəɓza ka kəmari hərhərari kamnyar su tə Naboth pəla alari ni. Antə tsa pəpəi ata dəkələrni ka kəmari awul banggwa, ka nggəlar ta səm susəma.

⁵Amma Yezebel na mwalankiɗa si adzə ni, ka yu ni abbər, “Man ɓzamtə ɗəffa ga apani ri tə wala susəma ga asəm wa ni?”

⁶Antə Ahab pəla abbər, “I pəla aka Naboth ka tsa ɗələmta ali fakər anapərni ni, wala ka yeru paltə ka fakə damwa, amma tsa pəla I aɗar wa.”

⁷Antə Yezebel na mwalankiɗa pəla alari, “Aɗi gan ka kuthlikur ata kəra Israila pwa ya? Thlatə kara səm susəma kara peri hangkala ga, I ata dlu ala gə fakər anapər Naboth na mdər Yezireyel ni.”

⁸Apani antə Yezebel rəbutə wasikayeri akwa thləma Ahab ka hartə ɗa ka tsatə lambar Ahab, ka thlentə ɗa aka mji ol'ola kəga kwakunayeri na akwa Yezireyel.

⁹Tsa rəbuta akwa wasikayeri ni abbər, “Ka giri psəmnya kəl asham, ka tsaptə shanga mjir tsəɗi ni ata vəi duku, ka vəi Naboth akwa vəi ndzəndziyir olkur akəma mji.

¹⁰Ka mdə pwi maɗa' shambar suɗa awul kəmari na ata thlandər ata kərari abbər Naboth ku nggəl Hyel ka kuthli. Antə ka mdə kəɓəla ni aɓəla ka ndzəndzəh ni ka pela har ka tsa mta.”

¹¹Antə mji ol'ola kəga kwakunayeri ni ku hara tsu apatə Yezebel tsawa ala ɗa.

¹²Da psəmnya kəl asham, ka tsaptə mji, ka vəi Naboth akwa vəi ndzəndziyir olkur akəma mji.

¹³Antə maɗa' shambar na suɗə ni ku səmbwa ka ndzəndzi awul kəmari ka thlandər ata kərari abbər tsa ku nggəl Hyel ka kuthli. Antə da ku kəɓəla ni ata hildi ka ndzəndzəh ni ka pəla ka tsi ni.

¹⁴Antə da thlenta aka Yezebel abbər, “Mdə ku ndzəndzəh Naboth ka tsi ni.”

¹⁵Təkəma tə Yezebel nggatə labar ni, antə tsa pəla aka Ahab, “Ai Naboth ku mti! Antə kulini ga ata mzhi ndzi mthlakər fakər anap tə tsa nggəlar ta ɗələmtari ala gə ni.”

¹⁶Təkəma antə Ahab thlatə ka ləghəi akwa fakər Naboth ka ndzi mthlakari.

¹⁷Antə MTHLAKU pəla aka Iliya na mdər Tishbe abbər,

¹⁸“Mwari adzə Ahab na kuthlir Samariya. Ga ata wutə ni akwa fakər Naboth kamnyar tsa akwa bara ndzi mthlakari.

¹⁹Pəla alari abbər, I na MTHLAKU pəla, ‘Aghəla tə ga ku tsi Naboth, antə ga ata jaktə kətə surni ya? To, tsu akwa vəi tə kilayeri ku nyar mamshir Naboth antə da ata nyar mamshir nga!’ ”

²⁰Sakatə Ahab wutə Iliya, antə Ahab pəla, “Ga ku paktə ra ya, dawarna!” Antə Iliya pəla abbər, “I, ku paktə nga! Kamnyar ga ku hamta kər nga akwa hara sur ɗimikur aka MTHLAKU.

²¹Antə MTHLAKU pəla abbər, ‘I ata səntə asar na ɗimi ata kəra ga. I ata cajimta nga ka kuri ka kəlara mdə sal, ola ka ntsaha na akwa nyarmbwar nga akwa Israila.

²²I ata namtə kəyir nga apa kəyir Yerobowam na ɓzər Nebat, ka apa kəyir Baasha na ɓzər Ahija, kamnyar tə ga ku ɓzamtə ɗəffi atar vu mjir Israila akwa hara biku.’

²³Ata kəra Yezebel tsuwa, MTHLAKU pəla abbər kilayeri ata sə ɓɗəmnya Yezebel akwa mtakər Yezireyel.

²⁴Tsuwa kəlara mdər Ahab na mta akwa kutadi, kilayeri ata sə ɓɗəmnyari, tsuwa kəlara mdərni na mta akwa mtakəu ɗikayeri ata səməmnyari.”

²⁵Mdə damwa aɗi na ɗar hamta kərni swakti akwa hara ɗimikur aka MTHLAKU apa Ahab wa, kamnyar Yezebel na mwalankiɗa an vu ni.

²⁶Tsa ku hara sur cika na ɗimi atar nu haptayeri apatə mjir Amor ku hara, mji natə MTHLAKU kədləmta akəma mjir Israila.

²⁷Sakatə Ahab nggatə ndərayeri ni antə tsa kukwahəmta ləptayeri arni, ka hatə dasa, ka nggəlar susəma, ka pəpəi akwa dasa, ka thlata akwa mwa ka ɗəffə ɓzəɓza apa sur kətadza.

²⁸Antə MTHLAKU pəla aka Iliya na mdər Tishbe abbər,

²⁹“Ga ku wuta apatə Ahab ku tərghəi kərari akəmi ya? Kamnyar tə tsa ku tərghəi kərari akəmi, I aɗi ata sənta asar ni akwa zamanərni wa, amma tar akwa zamanər ɓzərni antə I ata sə sənta asar ata kəra kutakəyirni.”