Read bura-pabir 1 Kuthlyayeri 4 Bible Online

1 Kuthlyayeri 4 - bura-pabir bible

1 Kuthlyayeri 4

¹Solaman ku hara kuthlikur ata kəra shanga Israila.

²Nayeri ni an mjir kəthlər arni na ol'ola: Azariya na ɓzər Zadok an prist.

³Elihoref ka Ahijana maɗashilər Shisha an mjir rəbuta. Yehoshafat na ɓzər Ahilud an mdər kəsi kakaɗayeri.

⁴Benaiya na ɓzər Yehoyada an olər sojayeri. Zadok ka Abiyathlar an pristayeri.

⁵Azariya na ɓzər Nathlan an ata kəra kwakunayeri. Zabud na ɓzər Nathlan an prist ka mdər hamta sauri aka kuthli.

⁶Ahishar an mdə na akwa wul kutakəyir kuthli, Adoniram na ɓzər Abda an ata kəra mjir kəthlər.

⁷Tsuwa Solaman ka ajiyayeri kumnya suɗa ata kəra shanga Israila. Da ana səntə susəma aka kuthli ka mjir kutakəyirni. Kəlara pal akwa nca ɗa ana səntə susəma ar thliya pal akwa məva.

⁸Nayeri ni an thləma ajiyayeri na kumnya suɗə ni: Benhur, an ata kəra tsəɗi gar ar Ifrayim.

⁹Bendeker, an ata kəra diyayeri ar Makaz, Shaalbim, Bethshemesh, ka Elon Bethhanan.

¹⁰Benhesed, an ata kəra Arubboth ka Soko ka shanga tsəɗi ar Hefer.

¹¹Ben Abinadab na kəl Tafath ngkwar Solaman, an ata kəra Nafothdor.

¹²Baana na ɓzər Ahilud, an ata kəra Taanak ka Megiddo, ka shanga Beth Shan, kudzəhə ka Zarethlan aghəighəya Yezireyel, ma mda thlata ahar Beth Shan ata mwari ahar Abel Mehola na akwa wuldzi ka Yokmeyam.

¹³Ben Geber, an ata kəra Ramoth Gileyad akwa vəi tə Yayir na ɓzər Manasse ka ndzi akwa. Tsuwa tsa an ata kəra tsəɗi Argob na akwa Bashan na ka bərniyayeri arni ngkwakumari. Shanga ɗa akwa katanggayeri natə udzəm nyarfayeri arɗa an əmza.

¹⁴Ahinadab na ɓzər Iddo, an ata kəra Mahanayim.

¹⁵Ahimaaz na kəl Basemath na ngkwar Solaman, an ata kəra Naftali.

¹⁶Baana na ɓzər Hushai, an ata kəra Asher ka Beyaloth.

¹⁷Yehoshafat na ɓzər Paruwa, an ata kəra Issakar.

¹⁸Shimeyi na ɓzər Ela, an ata kəra Benjamin.

¹⁹Geber na ɓzər Uri, an ata kəra Gileyad, tsəɗi natə Sihon na kuthlir mjir Amor ka Og na kuthlir Bashan ku hara kuthlikur akwa. Tsuwa ajiya damwa aɗi pal na ata kəra tsəɗiyir Yahuda.

²⁰Mjir Yahuda ka Israila ku hara hang apa wuyakər mnya manda. Da ku səma ka sa ka ndzi ka kucali.

²¹Antə Solaman ku hara kuthlikur ata kəra shanga kuthlikurayeri ngəni, baɗita adzə Thlyagha Yufiretis təbwar raghəi, ka mwanta adzə tsəɗi mjir Filistiya na təbwar ramta, har ka mzhitə kəla ɗa ka Masar. Tsəɗiyayeri ngəni ku ntə tsəma ka ndzi akira Solaman har kurər mpikari.

²²Susəmər kutakəyir Solaman ar vir pal an balang makkumari ar mpu na liktikti, ka mpu na kula kətəra balang ngkwakumari,

²³ka thlar bina na təksətəksari kuma, ka thla na akwa ɓəla sərkumari, ka təmayeri aru pal, ka kajalayeri, ka kimarayeri, ka jikəlayeri, ka mtəkayeri na kəgəɓkəgəɓu.

²⁴Solaman ku hara kuthlikur ata kəra shanga tsəɗi na abwar ramta ka Thlyagha Yufiretis, baɗitə ka Tifsa har ka mwanta adzə Gaza. Tsa ku hara kuthlikur ata kəra shanga kuthlyayeri na abwar ramta ka Yufiretis, tə tsa ku ndzəndzi kəga da akwa lapiyakur.

²⁵Shanga mjir Israila ka Yahuda, baɗita akwa Dan ka mwanta akwa Beyersheba, ku ndzi akwa msərakur akwa sakar kuthlikurər Solaman. Kəlara mdə ku ndzi akira nfur anapərni ka kamndərni kula mtirmnya.

²⁶Tsuwa Solaman ka səvayeri dəpu nfwarkumari kamnyar takwayeri ar ndəkər wagən, ka mjir fəl taku dəpu kumnya suɗa.

²⁷Kəlara pal akwa nca ajiyayeri na kumnya suɗə ni ana səntə susəma aka kuthli kəga kutakəyirni ar thliya pal akwa məva. Da ana hamta shanga su tə mdə ku tura akwa kəi ni.

²⁸Tsuwa da ku səntə barli ka dwathlu aka takwayeri ar kəi kuthli akwa vəi pwiyir ɗa na kalkalari.

²⁹Hyel ku hamta aka Solaman ɗəɗukur ka nggaɓəla su na angkərɓəladzi wa ka səndərsu na təramta vəyari.

³⁰Ɗəɗukur ar Solaman ku təramta ɗəɗukurər shanga mji na abwar raghəi, ka təramta shanga ɗəɗukur ar mjir Masar.

³¹Kamnyar tsa ku ndzi ɗəɗu ta kəlara mdə madi akwa duniya. Ɗəɗukurərni ku ndur ar Ethlan na akwa nyarmbwar Ezra. Tsa ku ndzi ɗəɗu ta Heman, ka Kalkol, ka Darda na maɗa' Mahol. Antə thləmari ku tuwa akwa shanga tsəɗiyayeri na kalaktə ni.

³²Tsa ku tsa karapwayeri dəpu makər ka thla hayeri dəpu pal ka ntəfu,

³³Tsa ku gari ata kəra nfwayeri ka su ptsəptsa, baɗitə ka seda ar Lebanon ka mwanta aka wakzhal na ana ptsa ata kadaka. Tsuwa tsa ku thlipə su ata kəra mwaɓiyayeri, ka ɗikayeri, ka mwaɓiyayeri na ana mwa ka yimər kuta ɗa ata di, ka kəlfayeri.

³⁴Shanga kuthlyayeri na akwa duniya ku nggata ata kəra ɗəɗukurərni, ka thlentə mji adzə ni kamnyar ka da nggatə ni.