Read bura-pabir 1 Kuthlyayeri 5 Bible Online

1 Kuthlyayeri 5 - bura-pabir bible

1 Kuthlyayeri 5

¹Sakatə Hiram na kuthlir Taya ku nggata abbər mdə ku bartə kəra Solaman tə tsa ndzi kuthli ata vəya baba'ni Dauda, antə tsa thlentə wakilayeri arni adzə Solaman. Kamnyar tə Hiram ku hara pazhikur ka Dauda.

²Antə Solaman ku thlentə ndər aka Hiram abbər,

³“Ga asənda abbər baba'na Dauda aɗi mzhi həntə mbwar vəngkər səli aka MTHLAKU na Hyelərni wa, kamnyar tə tsa akwa mpa kəga dawayeri na kalaktə ni. Antə tsa aɗi mzhi harari wa.

⁴Amma kulini MTHLAKU na Hyelərna ku hamta ali msərakur akwa kəlara bwa, antə dawakur wala thlivər mpa aɗi wa.

⁵Antə kulini I akwa bara abbər kəi həntə mbwar vəngkər səli aka MTHLAKU na Hyelərna, apatə MTHLAKU ku pəla aka baba'na abbər, ‘Ɓzər nga na ata sə ndzi kuthli aghəla ga, an ata sə həntə mbwar vəngkər səli ali.’

⁶Kamnyar ngəni antə kara vu ka mdə tadərtsa ali nfur sedayeri na akwa Lebanon. Antə mjirna ata sə hara kəthlər kəga mjir nga, antə I ata sə ntəmta ala gə watsəɓər kəthlər ar mjir nga ata kəra su tə gə ɗəmha. Kamnyar tə ga asənda abbər yeru aɗi ka mdə wala duku na ka ɗəɗukur ar nta udzəm apa mjir Sidon wa.”

⁷Sakatə Hiram nggatə ndərər Solaman, antə ɗəffari ku ndzi msəra alari ka duna, tə tsa pəla, “Ka mburu usar MTHLAKU, kamnyar tə tsa ku hamta ɓzər na ɗəɗu aka Dauda, na ata mzhi hara kuthlikur ata kəra dlamar mji apani.”

⁸Apani antə Hiram ku thlentə ndər aka Solaman abbər, “I ku nggatə ndər tə gə thlenta ali antə I ata hara shanga su tə ga akwa barari. I ata hamta ala gə udzəmər seda ka udzəmayeri na ɓɗakɓɗaku.

⁹Mjirna ata fatari ahar Lebanon ka da mwanta ata kəra Manda Meditereniya, anda mda ata mbwahə ɗa ka da təra ata kəra yimi ka mwari akwa vəi tə gə carɓəla. Anda tsuwa antə mda ata mpəmpələmta ɗa, antə mjir nga ata fatə ɗa. I hir ka gə ntəmta ali atar hamta susəma aka mjir kutakəyirna.”

¹⁰Antə Hiram ku hamta katako ar seda ka udzəmayeri na ɓɗakɓɗaku aka Solaman apatə tsa akwa turari.

¹¹Antə Solaman ku hamta aka mjir Hiram susəma ar alkama tasa dəpu sərkumari, ka mal zaitun na ɓɗaku kwalɓa dəpu sərkumari. Solaman ku ləkəma ka hara ngəni aka Hiram məva ata məva.

¹²Antə MTHLAKU ku hamta ɗəɗukur aka Solaman apatə tsa ku kətə alkawal alari. Tsuwa mwardzi na pwa ku wutədzi akwa daɓwa Hiram ka Solaman, antə japwa ɗa ku kələngkər ka mbwi alkawal akwa daɓwa ɗa.

¹³Kuthli Solaman ku fatə mji dəpu makkumari akwa Israila kamnyar hara kəthlər dwali.

¹⁴Tsa ku ndəkəi mjir kəthlər ar dwali ni ka bwa makər dəpu kumkuma, ka thlentə ɗa ahar Lebanon ka da hara kəthlər thliya pal pal ka da ngka avəi ka ghərəmtaghəra ar thliya suɗsuɗa. Antə Adoniram an mdə na ku pwar ɗa akwa hara kəthlər dwali ngəni.

¹⁵Solaman ka mji dəpu murfəkumari kamnyar fa kəla, ka mji dəpu nciskumari kamnyar mar pela akwa garayeri.

¹⁶Tsuwa mji damwa aɗi dəpu makər ka aru makər na ata kəra mji na akwa hara kəthlər ni.

¹⁷Kuthli Solaman ku tsawa ka da laɓəla pelayeri na ol'ola, ka marəmta ɗa ɓɗakɓɗaku kamnyar nci səla mbwar vəngkər səli.

¹⁸Antə mjir kəthlər ar Solaman ka Hiram ka mjir Gebal ku ɗəmhə udzəmayeri ka pelayeri kamnyar hən mbwa ni.