Read bura-pabir 1 Kuthlyayeri 7 Bible Online

1 Kuthlyayeri 7 - bura-pabir bible

1 Kuthlyayeri 7

¹Solaman ku hara məva kumnya makər kambəla tsa kuri həntə kəi kuthlikur ni.

²Tsa həntə mbwa laga na ka thləmari Kuɓər Nfur Lebanon, saɓəlkurari dzartsi aru pal, baukurari dzartsi ntəfkumari, ka nalkurari dzartsi makkumari. Antə mdə həntə ni ata kəra layi nfwar ar udzəm seda natə mdə kadləngkər udzəm seda.

³Antə mdə hartə kərari ka seda ka kathtə ka udzəm seda nfwarkumari ka ntəfu, kumnya ntəfu akwa kəlara layi pal.

⁴Akwa kəlara banggwa layi windauwayeri aɗi makər akwa wuldzi ka nvwa ɗa.

⁵Shanga udzəm windauwayeri ni ka kuɗəma nfwar, kəlara layi ar windau makər ni akwa wuldzi ka nvwani.

⁶Tsa həntə mbwa na ka thləmari Mbwar Zhimbwal natə saɓəlkurari dzartsi ntəfkumari, baukurari dzartsi makkumari. Tsuwa səva aɗi akəmari tə mdə nam ka zhimbwalayeri ka hartə kərari.

⁷Solaman ku latə Mbwar Dəkəl Kuthlikur, natə mda ana kəga thləmari Mbwar Shariya, vəi tə tsa ana hara shariya akwa, antə tsa hartə dzari baɗita ata kutambwa har ka mzhitə ciɓər kərari ka udzəm seda.

⁸Antə tsa həntə mbwar kərari abwahila Mbwar Shariya tsu akwa dludzari. Antə Solaman namtə mbwa damwa tsu apani aka ngkwar kuthli tə tsa kəl ni.

⁹Mdə namtə shanga mbwayeri ni ka pela na ɓɗakta shang tə mdə marəmta ka fwavumta bwakəma ka bwahili, baɗita ata səla mbwa ni ka vədza aka ɓəli kərari.

¹⁰Mdə nci səla mbwayeri ni ka pela na ɓɗakɓɗaku, na ol'ola, laga dzartsi ncisu, ka laga dzartsi kuma.

¹¹Antə mdə jiktə pelayeri na ɓɗakɓɗaku, thlathlari kalkal ka nvwa ɗa na ata kər, ka paktə ɗa ka udzəm seda.

¹²Mdə kalaktə bəbal na ol ni ka katangga ar pela marmara və makər, ka və pal ar udzəm seda, tsu apa bəbal na akwa kutambwar MTHLAKU ka səvarni ni.

¹³Kuthli Solaman ku thlenta ahar Taya ka mdə səntə Huram.

¹⁴Mama'ni an mwala kughung laga na akwa nyarmbwar Naftali. Tsuwa baba'ni an mdər Taya. Huram an mdə na ka səndər su ka ɗəɗukur ka masəkukur ka duna akwa kəthlər ka əmza. Antə tsa si adzə Kuthli Solaman ka hara kəthlər ni.

¹⁵Huram ku fatəmta Zhimbwalayeri suɗa ka liyar əmza. Nalkur kəlara pal an dzartsi kumnya ncisu, tsuwa saɓəlkura gur na kalakta an dzartsi kumnya suɗa. Su aɗi akwa kutari wa, tsuwa kəkəskurərni an kuleng nfwar, na dukwari ni ma tsu apani.

¹⁶Tsuwa tsa ku fatəmta kuɓashir əmza suɗa ata kəra zhimbwalayeri ni. Kəlara pal saɓəlkurərni dzartsi ntəfu ntəfu.

¹⁷Antə tsa dəɓatə kuɓashir kəra zhimbwalayeri na suɗə ni ka layi murfə murfa ar ɗahər sarkayeri.

¹⁸Tsa namtə layi suɗa ar rumman ka əmza ka kawartə kuɓashir kəra zhimbwalayeri ni kəgari.

¹⁹Kuɓashayeri na ata kəra zhimbwalayeri na akwa səva ni tsa namtə ɗa akwa dludzər kudlayeri. Nalkurər ɗa apa dzartsi nfwar.

²⁰Kəlara kuɓashir kəra zhimbwalayeri na suɗə ni ka rummanayeri aru suɗa akwa layi suɗa na kalaktə ɗa. Da aghəighəya sarkayeri ni.

²¹Antə Huram ncigəmta zhimbwalayeri ni akwa nyarmbwa na ola ar mbwar vəngkər səli ni. Tsa vətə thləm aka zhimbwal na təbwar anəm ni abbər Yakin, ka na təbwar yala ni Bowaz.

²²Mdə ku dəɓatə kuɓashir kəra zhimbwalayeri ni ka dludzər kudlayeri. Apani antə kəthlər na ata kəra zhimbwalayeri ni ku kuri.

²³Hiram ku fatəɓəla gəlam əmza na ola tə mda ana kəga Manda. Baukurər mnya gəlam ni dzartsi kuma, Zurangkurari dzartsi ntəfu, su na kalaktə mnyari dzartsi makkumari.

²⁴Tsuwa mdə kwartə mnya gəlam ni ka layi suɗa ar mpəlayeri tə mdə fatəɓəla ka əmza. Kəlara dzartsi pal ka mpəla kuma. Mda fatəɓəla ɗa ata kəma duku ka gəlam ni.

²⁵Antə mdə vətə gəlam ni ata kəra gyalayeri ar əmza kumnya suɗa, makərari akwa wul bwar yala, makərari akwa wul ramta, makərari akwa wul anəm, ka makərari akwa wul bwar raghəi. Antə gəlam ni ku ndzəndzi ata kusara ɗa.

²⁶Kəkəskur gəlam ni an baukur kuta tsi pal. Mdə ɓəli mnyari aɓəlaɓəla apa ɓələr mnya kwapu, dludzə ka pukdlər kudla. Kutari ata kətə lita dəpu nfwarkumari.

²⁷Tsuwa tsa ku namta amalangke kuma ka əmza, kəlara pal saɓəlkurari apa dzartsi nfwar, baukurari apa dzartsi nfwar, ka nalkurari apa dzartsi makər.

²⁸Nggədza laku natə mdə ku namta amalangkeyayeri ni akwa. Mdə thləthlau katako na baubau akwa daɓwa udzəmayeri ni,

²⁹ka ɗahətə dza katakowayeri ni ka dludzər tsəngiyayeri, ka gyalayeri, ka kerubayeri, ka pukdlayeri.

³⁰Kəlara amalangke pal ka tayar əmza nfwar ka zwalər tayayeri ar əmza. Akwa kəlara kuɗəmar amalangkeyayeri ni, zwalayeri aɗi tə mdə nam ka əmza kamnyar rwati balangayeri ni. Mdə dəɓatə shanga zwalayeri ni ka ɗahər pukdlayeri.

³¹Kəlara amalangke ni ka liya laga tawarwar ka gula akwa kamnyar kəsi balang ni. Saɓəlkurər dzari na mbila aɓəla amalangke ni an dzartsi pal. Mbilari na ləghəi dzartsi pal ka reta, tsuwa mdə ku kalaktə mnyari ka ɗahər pukdlayeri.

³²Səlari na nfwar ni da akira katako na akwa daɓwa udzəmayeri ni. Nalkur taya ni dzartsi pal ka reta.

³³Mdə namtə garegare ni apa garegare ar wagənər taku. Tsuwa zwalayeri, ka wayayeri arɗa, ka vəi kəɓar wayayeri ni shang mdə fatəɓəla ɗa ka əmza.

³⁴Kəlara pal akwa nca amalangkeyayeri ni ka sur rwatari nfwar, pal pal akwa kəlara kuɗəma, dləɓdləɓari ata zwal ni.

³⁵Ata kəra kəlara amalangke ni su laga aɗi apa garegare ka zurangkurari inci əmdla. Mdə dləɓha səlayerari ni ka thlimbəlayerari ni ata kəma duku ka amalangke ni.

³⁶Antə tsa dəɓatə səlayerari ka thlimbəlayerari ka dludzər kerubayeri, ka tsəngiyayeri, ka nfwayeri ar dipənau, ka pukdlayeri, ka kalaktə ni kəgari.

³⁷Apani antə tsa fatəɓəla amalangkeyayeri na kum ni akwa laku duku, dludludzi akwa olkur ka akwa dza.

³⁸Aghəla nda antə tsa namtə balangayeri kuma, kəlara pal ata kətə lita aru ncisu, baukur mnyari apa dzar tsi nfwar. Kəlara amalangke ka balang pal.

³⁹Tsa pwi amalangke ntəfu təbwar anəmər mbwa ni, ka ntəfu təbwar yalar mbwa ni, ka vəi gəlam ni akwa kuɗəmar anəmər raghəi ar mbwa ni.

⁴⁰Tsuwa Huram ku namtə tughumayeri, ka tebərayeri ar fa su, ka balangayeri ar pungkər yimi aka su. Apani antə Huram ku kuri shanga kəthlərayeri tə tsa hara aka Kuthli Solaman akwa mbwar MTHLAKU.

⁴¹Ngəni an suayeri tə Huram namtə ni: zhimbwalayeri suɗa, ka kuɓashir kəra zhimbwal suɗa, ka layir sarkayeri suɗa na ata kuɓashir kəra zhimbwalayeri ni,

⁴²ka rumman ar əmza aru nfwar kamnyar dəɓatə layiyayeri suɗa ar sarkayeri na ata kuɓashir zhimbwalayeri ni,

⁴³ka amalangkeyayeri kuma, ka balangayeri kuma,

⁴⁴ka gəlam, ka gyalayeri kumnya suɗa na akirari,

⁴⁵ka tughumayeri, ka tebərayeri ar fa su, ka balangayeri ar pungkər yimi. Shanga suayeri ngəni natə Huram namtə kamnyar Solaman akwa mbwar MTHLAKU ni, tsa namtə ɗa ka əmza na ata mbəlmbəla.

⁴⁶Tsuwa Solaman vu tə mdə fatəɓəla shanga suayeri na akwa həi həna na akwa bəbalər Jodan, akwa daɓwa Sukkoth ka Zarethlan.

⁴⁷Solaman aɗi ngkərtə kəgəɓkur əmza tə mdə hara kəthlər ni kəgari wa, kamnyar mda amzhi səndəɓəla hangkurər kəgəɓkurari wa.

⁴⁸Tsuwa Solaman ku nagamta shanga sur kəthlərayeri na akwa mbwar vəngkər səli aka MTHLAKU. Tsa namtə bagaɗi ar dinar, tebər dinar ar vəi buradi na ɓɗakkarkara,

⁴⁹kulahayeri ar dinar na ar pwi pitəla tə mdə pwi ntəfu abwa mazəm, ka ntəfu abwa matsəkar abwakəma Vəi na Ɓɗakkarkara Ta Shang, ka pukdlayeri, ka pitəlayeri, ka məksayeri ar dinar. Shanga suayeri ngəni mdə nam ɗa ka dinar.

⁵⁰shanga kapayeri, ka məksayeri, ka tasayeri na ol'ola, ka tasayeri ar mba tulari ɗuza, ka tasayeri ar mba u'u, ka hincisu ar nyarmbwar Vəi na Ɓɗakkarkara Ta Shang, ni Huram ku nam ɗa ka dinar.

⁵¹Apani Kuthli Solaman ku kuri shanga kəthlər ar mbwar vəngkər səli aka MTHLAKU. Antə tsa səntə shanga suayeri natə baba'ni Dauda hamta aka Hyel ni, apa adzərfa, ka dinar, ka mambila kariyayeri, ka pwi ɗa akwa kutambwar pwi su na akwa mbwar vəngkər səli aka MTHLAKU ni.