Read bura-pabir 1 Kuthlyayeri 8 Bible Online

1 Kuthlyayeri 8 - bura-pabir bible

1 Kuthlyayeri 8

¹Antə Solaman ku kəgatə shanga mji ol'olər Israila, ka shanga mji ol'olər nyarmbwayeri, ka mji na ol'olər kutakəyayeri, ka da tsaptədzi akwa Urushalima, kamnyar ka da ra səntə Akwati Alkawal ar MTHLAKU na ahar Bərniyir Dauda, watau Sihiyona.

²Antə shanga mjir Israila ku tsaptədzi akəma Kuthli Solaman akwa sakar Kucali ar Səva, akwa thliyar Ethlanim, thliya na murfəkur.

³Sakatə shanga mji ol'olər Israila ku si, antə pristayeri kətə Akwati Alkawal ni.

⁴Antə pristayeri kəga mjir Lawi ni ku kətə Akwati Alkawal ar MTHLAKU ni, ka Tentər Kəɓa ni, ka shanga kariyayeri na ɓɗakkarkara akwa tent ni, ka sənta akwa mbwar vəngkər səli.

⁵Antə Kuthli Solaman ka shanga mjir Israila na tsaptədzi adzə ni akəma Akwati Alkawal ni, ku ləkəma ka hamta saɗaka ka təmayeri kəga thlayeri hang, tə mda aɗi mzhi jikatari wala hamta hangkurər ɗa wa.

⁶Antə pristayeri ku səntə Akwati Alkawal ar MTHLAKU ni akwa kuta kutambwa ni. Antə da vəi ni akwa vəi tə mdə ɗəmhə kamnyar ni, akwa Vəi na Ɓɗakkarkara ta Shang, akira ɓəɓəka kerubayeri ni.

⁷Antə ɓəɓəka kerubayeri ku pəbələngkərdzi ata kəra Akwati Alkawal ni kəga zwalayeri ar kəlari ni.

⁸Zwalayeri ngəni an saɓəl saɓəl natə mda ata mzhi wutə mnya ɗa ma mdə thləthlata akwa Vəi na Ɓɗakkarkara ni, amma ma aɓəla mda awutə wa. Antə da tsu anda har ba ashina.

⁹Su aɗi akwa Akwati Alkawal ni wa, tar pamplamər pela suɗa natə Musa pu akwa sakatə tsa ata Gar Horeb, vəi tə MTHLAKU hara alkawal aka mjir Israila, aghəla səɓəlar ɗa akwa tsəɗi Masar ni.

¹⁰Sakatə pristayeri ku ləɓəla kazhar Vəi na Ɓɗakkarkara ni, antə dlamba nghyantə kutambwar vəngkər səli aka MTHLAKU ni.

¹¹Antə pristayeri aɗi mzhi ləkəma ka kəthlərər ɗa wa kamnyar tə parakər səliyir MTHLAKU na akwa dlamba ni ku nghyantə kutambwa ni.

¹²Antə Solaman hara adduwa akwa pəla, “MTHLAKU, gə pəla abbər, ga ata ndzəndzi akwa dlamba na mənggəl.

¹³Nggədza, I ku hənta ala gə mbwa na ɓɗaku, vəi tə ga ata ndzəndzi akwa har ba saka madi.”

¹⁴Sakatə shanga mjir Israila na tsaptədzi ni tsu athləthlata, antə Kuthli Solaman shinar kəmari təbwar ɗa, ka vədza ala ɗa barka.

¹⁵Tsa pəla, “Hu gir MTHLAKU na Hyelər Israila! Tsa ku nghyaɓəla alkawal tə tsa hara aka baba'na Dauda. Kamnyar tsa pəla aka baba'na.

¹⁶Kamnyar Dauda pəla aka baba'na, ‘Təng vir tə I fwaɓəla mjirna akwa Masar, I aɗi ɗar carɓəla bərni ar nyarmbwa laga akwa Israila abbər ka mdə vəngkər səli ali akwa wa. Amma I ku carɓəla Dauda ka tsa hara kuthlikur ata kəra Israila.’ ”

¹⁷Solaman ləkəma ka pəla, “Baba'na Dauda ku vu akwa ɗəffari ka tsa həntə mbwar vəngkər səli aka MTHLAKU na Hyelər Israila.

¹⁸Amma MTHLAKU pəla alari, ‘Dzamər nga ar hən ali mbwar vəngkər səli ali ni ɓɗaku jiri,

¹⁹amma wala apani, aɗi ga an ata hən mbwa ni wa. Amma ɓzər nga, na ɓzər kuta ga, an ata hən mbwar vəngkər səli ali ni.’

²⁰Antə kulini MTHLAKU ku nghyaɓəla alkawal tə tsa hara ni. Kamnyar kulini I ku dlu tsiya baba'na Dauda, ka lətə dəkəl kuthlikur ar Israila, tsu apatə MTHLAKU ku hara alkawalari. Tsuwa I ku həntə mbwar vəngkər səli aka MTHLAKU na Hyelər Israila.

²¹I ku namtə vəi vəi Akwati Alkawal akwa mbwa ni, Akwati na ka alkawal natə MTHLAKU hara aka kəkayeri ar mburu sakatə tsa fwaɓəla ɗa akwa Masar ni.”

²²Antə Solaman ku thləthlata akəma bagaɗi ar MTHLAKU, akəma shanga mjir Israila na tsaptədzi, ka haptə tsiyari amta.

²³Antə tsa hara adduwa ka pəla, “MTHLAKU na Hyelər Israila, Hyel aɗi damwa na apa gə wa, wala amtazi wala azi akwa duniya! Gə na ana kəsi alkawalər nga, ka ncantə hirkur na ana palidzi wa aka shanga mji na ana nu nga ka ɗəffa ɗa shang.

²⁴Ga ku nghyaɓəla alkawal tə ga ku hara aka mafar nga Dauda, na baba'na. Ga ku pəla ka mnya ga ka nghyaɓəla ka tsiya ga ashina.

²⁵Antə kulini, MTHLAKU na Hyelər Israila, nghyaɓəla alkawal natə gə hara aka baba'na Dauda, tə gə pəla alari, ‘Ma maɗashilər nga ku nu shanga su ka hangkal akwa shanga su tə da ata harari, ka nu tsawayeri arna apatə ga ku hara, to, saka aɗi tə ga ata ni ka mda akwa kutakəyir nga na ata ndzi ata dəkəl kuthlikur ar Israila wa.’

²⁶Antə usa, Hyelər Israila, zhar ka alkawal tə gə pəla aka mafar nga baba'na Dauda ni ndzi jiri bu.

²⁷“Amma Hyel, ga ata mzhi ndzəndzi akwa duniya jiri ya? Wala vəi na amta ta shang ma aɗi mzhi kəsi ngə wa, zhar ka mbwa ngəni raka tə I həntə ni ya!

²⁸Amma wala apani, MTHLAKU na Hyelərna, ka gə psi thləma ga aka adduwa tə I na mafar nga akwa hara ala ga, ka gə nggatə tuwarna.

²⁹Ka gə wul kəra mbwa ngəni pci ka viri, vəi ngəni tə gə pəla, ‘Thləmi ata sə ndzi anda ni.’ Ka gə nggatə adduwarna akwa kəlara sakatə I ku thlentə kəmi təbwar vəi ngəni akwa hara adduwa.”

³⁰“Ka gə nggatə adduwarna, I na mafar nga, ka na ar mjir nga Israila, akwa kəlara sakatə da ku thlentə kəma ɗa təbwar vəi ngəni akwa hara adduwa. I, nggatə adduwar yeru akwa kəyir nga na amtazi ni. Tsuwa kəlara sakatə ga ku nggatə adduwar yeru, ka gə yafitə yeru.

³¹“Ma mdə laga akwa wula apa mdə laga ku hara alari ɗimikur. Antə har mdə ku səntə mdə tə tsa akwa dzama abbər tsa an hara ɗimikur ni akəma bagaɗiyir hamta saɗaka akwa mbwa ngəni kamnyar ka tsa kamtahyel. Antə ma tsa ku kamtahyel abbər tsa aɗi hara ɗimikur wa,

³²ka gə nggata amtazi, ka gə hara su ata kər. Ka ga an hara ala ɗa shariya. Ka gə pungkər biku aka mdə na ka biku ni ka gə ɗi ni. Tsuwa ka pəlaɓəla mdə na ka jiri ni, ka gə msərantə ni.

³³“Ma dawayeri ar mjir nga Israila ku səm mjir nga akwa mpa kamnyar tə mjir nga ku hara biku ala ga. Antə ma mjir ngə ni ku ngka adzə nga, ka hara adduwar tubi akwa thləma ga, ka kiɗə su akəla ga akwa mbwa ngəni,

³⁴ka gə nggata amtazi. Ka gə tifəmta bikər mjir ngə ni, ka gə jaktə ngka ka da akwa tsəɗi tə gə hamta aka kəkayeri arɗa.

³⁵“Ma mdə ku hartə vəi na amtazi tə yimi aɗi wutədzi wa, kamnyar tə mjir nga ku hara biku ala ga. Antə ma da ku hara adduwa ka kəma ɗa awul mbwa ngəni, ka kələngkər abbər da ku hara biku, ka tubi akwa thləma ga, ka zhar hara biku, kamnyar tə ga ku ɗi ɗa,

³⁶ka gə nggata amtazi. Ka gə tifəmta bikər mafayeri ar nga na mjir nga Israila. Ka gə thlipa ala ɗa laku na kalkal ar ndzəndzi, ka gə thlenta ala ɗa yimi akwa tsəɗi tə gə hamta ni kifa aka mjir ngə ni.

³⁷“Ma mi wala shilku ku təri akwa tsəɗi ni, wala ma dəmən, wala mpururu, wala ntsəkwa wala hawayeri ku hartə fakayeri arɗa, wala ma dawayeri ku kalaktə mjir nga akwa bərniyayeri arɗa, wala kəlara asar madi, wala shilku madi an ku si ata kəra ɗa,

³⁸antə ma kəlara mda akwa nca mjir nga Israila, wala ma shanga ɗa ku hara adduwa ka kiɗa, tə waskəi ku səndə bwaniyirni ka damitədzərni, har tə da ku haptə tsiya ɗa amta ka kəma ɗa awul mbwar vəngkər səli ngəni,

³⁹to, ka gə nggata amtazi akwa vəi ndzəndziyir nga, ka gə yafitə ɗa. Ka gə hara ka waskəi kalkal apatə tsa ku hara, kamnyar tə gə shinga an asəndə shanga ɗəffa mji.

⁴⁰Atar apani antə mjir nga ata thlivər nga, ka nu shanga su tə gə pəla akwa shanga ndzəndziyir mpika ɗa akwa tsəɗi tə ga ku hamta aka kəkayeri ar yeru ni.

⁴¹“Tsuwa ma mətəpi na aɗi akwa nca mjir nga Israila wa, ku thlata akwa tsəɗi na ciju ka si kamnyar olkur thləma ga,

⁴²kamnyar da ata sə nggatə su ata kəra thləma gə ni, ka dunar nga, ka surndatayeri na ol'ola tə gə hara. Ma tsa ku si ka hara adduwa ka kəmari awul mbwa ngəni,

⁴³ka gə nggata amtazi, akwa vəi ndzəndziyir nga, ka gə hamta alari shanga su tə tsa ku yuwa akəla ga. Atar apani antə shanga mjir duniya ata səndə nga, ka thlivər nga tsu apatə mjir nga Israila ana hara, tsuwa ka da sənda abbər mbwa ngəni tə I həntə ni an kamnyar nga.

⁴⁴“Ma sakatə mjir nga ku ləɓəla kamnyar mpa dawar ɗa, kəlara vəi tə ga ku mwanta akwa, ma da ku hara adduwa ka kəma ɗa awul bərni ngəni tə gə carɓəla ni, ka mbwa tə I həntə kamnyar ngə ni,

⁴⁵ka gə nggatə adduwar ɗa ka kiɗər ɗa akwa vəi na amtazi. Ka gə dlar ɗa ka msərantə ɗa.

⁴⁶“Ma mjir nga ku hara biku ala ga, kamnyar mda aɗi na kula ana hara biku wa, tə ɗəffa ga ku ɓzi, har tə ga ku hamta ɗa aka dawayeri arɗa na fatə ɗa apa mafa ka mwantə ɗa akwa tsəɗi na ciju wala kudzəha,

⁴⁷ma da ku ngka akwa hangkala ɗa akwa tsəɗi tə mdə mwantə ɗa apa mafa ni, ka tubi, ka kiɗa akəla ga abbər, ‘Yeru ku hara biku, yeru ku sha, ka hara su na ɗimi.’

⁴⁸Tsuwa ma da ku tubi akwa ɗəffa ɗa ka jirkur akwa tsəɗi mafakur tə mdə mwantə ɗa akwa ni, ka hara adduwa ka kəma ɗa awul tsəɗi tə gə hamta aka kəkayeri arɗa ni, ka kəma ɗa awul bərni tə gə carɓəla ni, ka awul mbwa tə I həntə kamnyar ngə ni,

⁴⁹ka gə nggatə adduwar ɗa ka kiɗər ɗa akwa vəi ndzəndziyir nga na amtazi ni, ka gə dlar ɗa. Ka ra yafitə mjir nga na ku hara ala gə biku ni.

⁵⁰Ka gə tifəmta ala ɗa bikər ɗa ka shanga ɗimikur tə da ku hara ala ga. Ka gə hara ka dawayeri na nggyari ɗa ni ncanta ala ɗa mdəkur.

⁵¹Kamnyar da an mjir nga natə gə fwaɓəla akwa Masar, akwa bwani na mwavər.

⁵²“Ka gə wul tuwarna ka tuwar mjir nga Israila ka ncar kətadza. Ka gə nggatə ɗa kəlara sakatə da ku kiɗa akəla ga.

⁵³Kamnyar ga an carɓəla ɗa akwa nca shanga mjir duniya ka da ndzi mjir nga, apatə ga ku pəla, atar buɗar nga Musa, sakatə gə fwaɓəla kəkayeri ar yeru akwa Masar ni.”

⁵⁴Aghəla tə Solaman ku kuri hara adduwa aka MTHLAKU, antə tsa thlata akəma bagaɗi ni, vəi tə tsa zuzuri ka tsiyari haptəhaptari təbwar vəi na amtazi ni.

⁵⁵Antə tsa thlatəmta ka kiɗə barka aka shanga mjir Israila ka kuraku na ola, ka pəla,

⁵⁶“Ka mburu hu MTHLAKU, na hamta msərakur aka mjir Israila apatə tsa ku kətə alkawalari. Tsa ku nghyaɓəla shanga alkawalayeri na ɓɗakɓɗaku tə tsa hamta atar buɗarni Musa.

⁵⁷Ka MTHLAKU na Hyelər mburu ndzi ata vəi duku ka mburu apatə tsa ku ndzi ata vəi duku ka kəkayeri ar mburu, tsa aɗiya zhar mburu wala nggəlar mburu wa.

⁵⁸Ka tsa tsəkwar ɗəffa mburu ka mburu kələngkər alari ka ɓəlatə tsawayeri ka surthlipərni tə tsa hamta aka kəkayeri ar mburu.

⁵⁹Ka MTHLAKU ɗangtə adduwa ngəni ka kiɗayeri natə I hamta alari ni pci ka viri. Ka MTHLAKU dlar mjir Israila kəga kuthlir ɗa ka tsa hamta ala ɗa shanga turər ɗa pci ka viri,

⁶⁰kamnyar ka shanga mjir duniya sənda abbər MTHLAKU an Hyel, antə damwa aɗi wa.

⁶¹Antə ka giri kələngkər aka MTHLAKU na Hyelər mburu ka ɗəffu duku, ka ɓəlatə shanga tsawayeri arni, tsu apatə giri akwa harari ashina.”

⁶²Antə Kuthli Solaman ka shanga mjir Israila na adzə ni ku hamta saɗakayeri aka MTHLAKU.

⁶³Solaman ku hamta saɗakar jakə mwardzi aka MTHLAKU ka thla dəpu sərkumari ka suɗa, ka təma dəpu aru ka sərkumari. Apani antə kuthli ka shanga mjir Israila hamta mbwar vəngkər səli ni aka MTHLAKU.

⁶⁴Tsu vir nda antə kuthli ni hamta ɗəffa bəbal na abwakəma mbwar vəngkər səli ni aka MTHLAKU, kamnyar tə anda tsa ku hamta saɗaka mbamba, saɗakar mthli ka malkum ar saɗakar jakə mwardzi. Tsa hara apani kamnyar tə bagaɗiyir hamta saɗaka ar əmza na ambwa ni ku hara raka, tə tsa amzhi kəsi saɗaka mbamba, ka saɗakar mthli, ka malkum ar saɗakar jakə mwardzi ni wa.

⁶⁵Antə Solaman kəga mjir Israila ku hara kucali ka ɓathla ar vir murfa aka MTHLAKU na Hyelər mburu. Tsuwa mji ku tsaptədzi dlama dlama, kamnyar mji ku thlatə ciju ka si, baɗita akwa Lebo Hamath na abwar yala har ka pudza aka zərkə na akwa kəla Masar tə bwar anəm.Antə da hara vir murfa akwa kucali ni, ka jaktə hara vir murfa ata kəra ngənda.

⁶⁶Akwa vir na nciskur antə tsa salamtə mji ka da təra ləha. Antə da ku usar kuthli ni kambəla da təra ləha ka kucali ka msərakur akwa ɗəffa ɗa kamnyar ɓɗakkur natə MTHLAKU ku hara aka buɗarni Dauda ka aka mjirni Israila.