Read bura-pabir 1 Kuthlyayeri 9 Bible Online

1 Kuthlyayeri 9 - bura-pabir bible

1 Kuthlyayeri 9

¹Sakatə Solaman ku kuri həntə mbwar vəngkər səli aka MTHLAKU, ka kəi kuthlikur, ka shanga suayeri tə tsa ku mwaɓtə ka tsa hara,

²antə MTHLAKU ncantə kərni alari na suɗkur apatə tsa ku ncantə kərni alari ahar Gibeyon.

³Antə MTHLAKU pəla alari, “I ku nggatə adduwar nga ka su tə gə kiɗa abbər kəi hara. I ku namtə mbwa ngəni tə gə latə ni ka tsa ndzi vəi vəngkər səli ali ba saka madi. I ata ɓəlatə ni ka wulwul ni tədəku.

⁴Ma ga ata nu ra ka jirkur ka ɗəffu duku apatə baba' nga Dauda ku hara, ka ɓəlatə shanga tsawayeri ka suayeri tə I thlamta abbər ka mdə hara,

⁵I ata nci dəkəl kuthlikurər nga ata kəra Israila har ba saka madi. Kamnyar I ku hara alkawal aka baba' nga Dauda abbər, ‘Ga aɗi ata ni ka mda akwa kutakəyir nga na ata ndzəndzi ata kəra dəkəl kuthlikur ar Israila wa.’

⁶“Amma ma ga wala kəkayeri ar nga ku shinamta kəma giri kazhar ra, ka nggəlar ta nu tsawayeri arna natə I vəi akəma giri, ka suayeri tə I thlamta abbər ka giri hara ni, ka ra vəngkər səli aka haptayeri, akwa hara mafakur ala ɗa,

⁷antə I ata kədləɓəla mjir Israila kazhar tsəɗi natə I ku hamta ala ɗa ni. Tsuwa I ata nggəlar mbwar vəngkər səli ngəni, mbwa tə I vəi kamnyar haptə thləmi ni, kəi namtə Israila ka tsa ndzi sur kumshi ka sur kyartəkur aka shanga mji.

⁸Antə wala tə mbwa ngəni ku ndzi sur wula, aghəlazi kəlara mdə na ata təramta adza ata sə ndatədzi, ka pəla, ‘Kamnyar mə tə MTHLAKU hara su apani aka tsəɗi ngəni ka mbwa ngəni ri?’

⁹Antə mji ata pəla ala ɗa abbər, ‘Ai, kamnyar tə da fwari ata kəra MTHLAKU, na Hyelər kəkayeri arɗa, Hyel na fwaɓəla ɗa akwa tsəɗi Masar, antə da fəfahə haptayeri akwa vəngkər səli ala ɗa, ka hara mafakur ala ɗa. An su na hara tə MTHLAKU səntə shanga asar ngəni ata kəra ɗa ni.’ ”

¹⁰Akwa kurər məva na sərkumari tə Solaman hara akwa hən mbwar MTHLAKU ka kəi kuthlikur ni,

¹¹antə Hiram na kuthlir Taya hamta aka Solaman shanga udzəm ar seda, ka udzəmayeri na ɓɗakɓɗaku, ka dinar apatə tsa ku bara. Antə Kuthli Solaman hamta alari diyayeri sərkumari akwa Galili.

¹²Amma sakatə Hiram ku thlata ahar Taya ka mwari ka wutə diyayeri natə Solaman hamta alari ni, diyayeri ni aɗi kəskərari wa.

¹³Antə tsa pəla aka Solaman abbər, “Nayeri ni an jili di tə ga ata ni ya, ɓzərmana!” Antə tsa kəga vəi nda Kabul, an thləm natə vəi ni kəgari har ba ashina.

¹⁴Antə Hiram ku thlenta aka kuthli dinar natə kəgəɓkurari kilogram dəpu nfwar.

¹⁵Ngəni an suayeri natə Solaman hara akwa kəthlər dwalikur: Tsa ku həntə mbwar vəngkər səli aka MTHLAKU ka kəi kuthlikurərni, ka shiktə kuayeri na təbwar raghəi ka bərni, ka jaktə hənɓəla katangga ar Urushalima. Tsuwa tsa ku jaktə hənɓəla diyayeri ar Hazor, ka Megiddo, ka Gezer.

¹⁶Akəmata ngəni kuthlir Masar ku dlər di Gezer ka səm ni, ka tsəgəi mjir Kanana na ka ndzi anda, ka mbamta di ni. Antə tsa hamta di ni aka ngkwarni na mwala' Solaman apa sur pwar ngkwarni.

¹⁷Antə Solaman ku jaktə hənɓəla Gezer, ka hənɓəla Beth Horon na akwa dəraku,

¹⁸ka Baalath, ka Tamar na akwa mtakər Yahuda,

¹⁹ka shanga bərniyayeri ar pwi su tə tsa kəgari, kəga bərniyayeri ar pwi wagənayeri ar taku, kəga na ar takwayeri. Solaman ku həntə shanga su tə tsa bara ka tsa hənta akwa Urushalima, ka Lebanon, ka akwa shanga tsəɗi na akira kuthlikurərni.

²⁰Tsuwa durayeri aɗi na ku mbili akwa tsəɗi ni na aɗi mjir Israila wa. Durayeri ngəni an mjir Hitti, ka mjir Amor, ka mjir Perizzi, ka mjir Hivi, ka mjir Yebusi.

²¹Mji nayeri ni an mjir nyarmbwar durayeri natə mjir Israila aɗi mzhi kurəmta cipu akwa mpa wa. Da an mji tə Solaman fata, ka pu ɗa akwa kəthlər dwalikur, apatə da aɗi har ba ashina.

²²Amma Solaman aɗi vu mdər Israila wala duku akwa kəthlər mafakur ni wa. Arɗa da ndzi sojayeri arni, kəga mji na ol'ola ata kəra sojayeri, kəga mji na ol'olər sojar wagənayeri ar taku, kəga mjir fəl taku.

²³Tsuwa tsa ku pwi mji ol'ola ar wul kəthlərayeri aru ntəfu ka ntəfkumari.

²⁴Aghəla tə mwalankiɗa na ngkwar kuthli ku zhar Bərniyir Dauda ka mwari akwa kəi kuthlikur natə Solaman hənta alari ni, antə Solaman shiktə kuayeri na təbwar raghəi ka bərni ni.

²⁵Ka makər akwa məva antə Solaman ana hamta saɗaka mbamba, ka saɗakar jakə mwardzi, ka mba tulari ɗuza aka MTHLAKU ata bagaɗi tə tsa həntə ni. Apani antə tsa ku kuri hən mbwa ni.

²⁶Antə Kuthli Solaman namtə sharayeri ahar Eziyon Geber, na kudzəhə ka Eloth, ata mnya yimər Akaba na akwa Edom.

²⁷Antə Hiram thlentə mjirni na asəndə nggur shar ɓɗaku, na səndə manda ni, ka da hara kəthlər kəga mjir Solaman.

²⁸Antə da mwari ahar Ofir ka səntə dinar natə kəgəɓkurari ku təramta kilogram dəpu kumnya nfwar ka hamta aka Kuthli Solaman.