Read bura-pabir 2 Kuthlyayeri 1 Bible Online

2 Kuthlyayeri 1 - bura-pabir bible

2 Kuthlyayeri 1

¹Aghəla mtər Ahab, antə mjir Mowab ku nggəlar ta ndzi akira mjir Israila.

²Vir laga Kuthli Ahaziya ar Israila ku msəra akwa windauwur galahər kəi kuthlikur arni na ahar Samariya ka təri ata di ka dəkəidzi ka duna. Antə tsa thlentə mji adzə Baalzebub na haptər mjir Ekron ka da ra nggaɓəla alari wala tsa ata thlata akwa nggawakurərni ni ya.

³Abaka tsu ata saka nda tə mdərthlentər MTHLAKU ku pəla aka Iliya na mdər Tishbe abbər, “Mwari kara kəɓa ka mjirthlentər Kuthli Ahaziya kara yu ɗa abbər kamnyar tsa wuta apa Hyel aɗi akwa Israila wa ya, tə tsa thlentə giri ka giri ra yu Baalzabub na haptər Ekron abbər wala tsa ata mbə ni?

⁴Pəla giri alari abbər kamnyar ngəni tsa aɗi ata mbə wa, amma tsa ata mta.” Antə Iliya ku mwari ka hamta labar ni.

⁵Sakatə mjir thlentə ni ku ngka adzə kuthli, antə tsa yu ɗa, “Man labar tə giri ngka kəgari ri?”

⁶Antə da pəla alari, “Yeru ku kəɓa ka mdə laga na pəla ala yeru abbər, ‘Ngka giri adzə kuthli ka giri pəla alari, “Nggədza su tə MTHLAKU pəla alari, Hyel aɗi akwa Israila wa ya tə tsa thlentə giri ka giri ra yu Baalzabub na haptər Ekron ni? Kamnyar ngəni tsa aɗi ata mbə wa. Dwali tsa ata mta.” ’ ”

⁷Antə kuthli ni yu ɗa abbər, “Mda ri məmə ri na kəɓa ka giri ni?”

⁸Da shinau alari, “Tsa hatə ləptu natə mdə nam ka shishir mwaɓi, ka mbwi kusarari ka sur mbwi kusar tə mdə nam ka kəsəm.” Antə Ahaziya pəla, “Ai ngəni Iliya mdər Tishbe.”

⁹Aghəla nda antə kuthli ni ku thlenta alari olər sojayeri ka sojayeri ntəfkumari. Tə olər sojayeri ni ndləɓəla adzə Iliya na ndzəndzi ata kəra gar ka pəla alari, “Mdər Hyel, kuthli ku pəla, ‘Ka gə səghəi ka mburu mwari.’ ”

¹⁰Amma Iliya shinau aka olər sojayeri ni abbər, “Ma I an mdər Hyel, ndzi ka u'u səghəi amtazi ka tsa mbamta nga ka mjir nga na ntəfkumari ni.” Təkəma u'u ku səghəi ka mbamta olər sojayeri ni kəga mji na ntəfkumari ni.

¹¹Antə kuthli ni ku jaktə thlentə olər sojayeri damwa ka mji ntəfkumari. Antə olər sojayeri ni pəla alari, “Mdər Hyel, kuthli pəla, ‘Ka gə səghəi taktar.’ ”

¹²Amma Iliya shinau ala ɗa abbər, “Ma I an mdər Hyel, ndzi ka u'u səghəi amtazi ka tsa mbamta nga ka mjir nga na ntəfkumari ni.” Təkəma u'u ku səghəi amtazi ka mbamta olər sojayeri ni kəga mji na ntəfkumari ni.

¹³Antə kuthli ni ku jaktə thlentə olər sojayeri na makərkur ka mjirni ntəfkumari. Antə olər sojayeri na makərkur ni ku si ka zuzuri ata ɓunjari akəma Iliya ka kiɗə ni abbər, “Mdər Hyel, I ata kiɗə nga ka gə kətadzə ra kəga mjirna na ntəfkumari ni.

¹⁴Akwa saka na təramta u'u ku səghəi amtazi ka mbamta mji ol'olər mpa na suɗə ni kəga mjir ɗa, amma usa kara kətadzə ra!”

¹⁵Antə mdərthlentər MTHLAKU ni pəla aka Iliya, “Ləghəi giri ka tsa. Ga aɗiya thlivər ni wa.” Apani antə Iliya ka olər sojayeri ni ku mwari adzə kuthli.

¹⁶Antə Iliya pəla aka kuthli, “Nggədza su tə MTHLAKU pəla, ‘Hyel aɗi akwa Israila wa ya tə ga ata thlentə mji ka da ra nggaɓəla su ata kəra nggawakur ar nga akəla Baalzabub na haptər Ekron ni? Kamnyar ngəni, ga aɗi ata mbə wa. Jiri ga ata mta.’ ”

¹⁷Apani antə tsa ku mti apa tə MTHLAKU ku pəla atar Iliya. Ahaziya aɗi ka ɓzər wa, antə Yoram na ɓzərma'ni ku ndzi kuthli ata vəyari. Tsa ku ndzi kuthli akwa məva na suɗkur ar Yehoram na ɓzər Yehoshafat na kuthlir Yahuda.

¹⁸Shanga suayeri natə Ahaziya ku hara, mdə ku rəbutə ɗa akwa Kakaɗər Labar ar Kuthlyayeri ar Israila.