Read bura-pabir 2 Kuthlyayeri 10 Bible Online

2 Kuthlyayeri 10 - bura-pabir bible

2 Kuthlyayeri 10

¹Ahab ka kəkayeri murfəkumari akwa Samariya. Antə Yehu ku rəbutə kakaɗayeri ka thlenta ahar Samariya, aka kwakunayeri ar Yezireyel, mji ol'ola ka aka mji na mthlakər kəkayeri ar Ahab abbər,

²“Kulini tə giri kəga kəkayeri ar kuthli Ahab, ka wagənayeri, ka takwayeri, ka kari mpa, ka kauyayeri na ka duna, antə təkəma ma giri ku wutə kakaɗə ngəni,

³ka giri carɓəla mdə na ɓɗakta shang, akwa nca kəkayeri arni, ka giri vəi ni kuthli ka mpa kamnyar ni.”

⁴Amma da ku thlivər ka duna ka pəla, “Ma kuthlyayeri suɗa aɗi ata mzhi mpa ka Yehu wa, apa madi tə mburu ata mzhari ri?”

⁵Apani antə kwakunayeri na ata kəra kəi kuthlikur, ka wakilər di, ka mambila mji ol'ola, ka mji na akwa wul kəkayeri ar Ahab ku thlenta aka Yehu abbər, “Yeru an buɗayeri ar nga antə yeru ata hara shanga su tə gə pəla. Amma yeru aɗi ata vəi mda ka tsa ndzi kuthli wa. Ka gə hara su tə gə wutə kalkal ala ga.”

⁶Antə Yehu rəbuta ala ɗa kakaɗu na suɗkur abbər, “Ma giri an təbwarna, ka ma giri ata kələngkər ali, ka giri sənta ali kəra maɗa' kuthli Ahab ahar Yezireyel ɗəpa saka apani.” Kulini kəkayeri na murfəkumari ar kuthli ni akwa tsiya mji ol'ola ar di ni, da an akwa kəlantə ɗa.

⁷Sakatə kakaɗə ni ku mzhitə ɗa, antə da fatə kəkayeri na murfəkumari ar kuthli ni ka nthləthləmta kəra ɗa ka puwa akwa thlambəl ka thlenta aka Yehu ahar Yezireyel.

⁸Sakatə mdər thlentə ku si ka pəla aka Yehu abbər da ku səntə kəra maɗa' kuthli ni. Antə tsa pəla ala ɗa, “Pwi giri ɗa ka bwa suɗa anyarfur di ni tar ɗəɗəpa.”

⁹Ɗəɗəpa antə Yehu ku ləɓəla anyarfu ka pəla aka shanga mji, “Giri aɗi ka biku wa, I an ɗəmhə ɗimikur ata kəra kuthli ka tsi ni. Amma kəga wa an kurəmta shanga mji nayeri nə ri?

¹⁰Ka giri sənda abbər su tə MTHLAKU ku pəla ata kəra kutakəyir Ahab aɗi ata təri wa, kamnyar MTHLAKU ku hara su tə tsa ku pəla atar buɗarni Iliya.”

¹¹Antə Yehu tsəgəi shanga mambila yangkura Ahab na akwa Yezireyel, shanga kwakunayeri ka pazhayeri arni na kudzəha, kəga pristayeri arni, tə mda aɗi na mbili ka mpika akwa nca ɗa wala duku wa.

¹²Yehu ku zhar Yezireyel akwa mwari ahar Samariya. Antə ata lakur Beth Eked ar mjir ɓəla,

¹³tsa ku kəɓa ka mji na yangkura msha Ahaziya na kuthlir Yahuda, ka yu ɗa abbər, “Giri an wa ri?” Antə da shinau abbər, “Yeru an yangkura Ahaziya, yeru akwa mwari ahar Yezireyel kamnyar thlawar mainayeri ka maɗa' Yezebel mwalar kuthli Ahab.”

¹⁴Antə Yehu tsawa aka mjirni, “Fatə giri ɗa!” Antə da fatə ɗa ka tsəgəi ɗa akwa ku ahar Beth Eked, da mji nfwarkumari ka suɗa, tə wala duku aɗi mbila ka mpikə wa.

¹⁵Sakatə Yehu ku zhar vəi nda, antə tsa kəɓa ka Yehonadab na ɓzər Rekab na akwa si kamnyar ka da kəɓa. Yehu ku thlawar ni, ka pəla alari, “Ga ku mbərsa ka iya apatə I ku mbərsa ka gə ya?” Antə Yehonadab shinau abbər, “I ku mbərsa.” Antə Yehu pəla, “Ma apani, səntə tsiya ga.” Antə tsa ku ha tsiyari. Antə Yehu ku dlara ka ndəkərwa ni akwa wagən adzə ni.

¹⁶Yehu pəla, “Asəra ka mwa təra, kara wutə ufti natə I kəgari kamnyar MTHLAKU.” Antə da ku təra ata kəma duku akwa wagənərni.

¹⁷Sakatə da ku mzhita ahar Samariya, antə tsa ku tsəgəi shanga yangkura Ahab na ku mbili akwa Samariya, tə tsa kurəmta ɗa purəm, apa su tə MTHLAKU ku pəla atar Iliya.

¹⁸Antə Yehu ku tsaptə shanga mji ka pəla ala ɗa, “Ahab ku vəngkər səli raka aka Baal, amma I ata vəngkər səli alari ka duna.”

¹⁹Antə kulini kəga giri ali shanga naɓiyayeri ar Baal, ka shanga mjir vəngkər səli alari, ka shanga pristayeri arni. Mda aɗiya fwari mda wala duku wa, kamnyar I ka saɗaka na ola tə I ata hamtari aka Baal. Antə kəlara mdə na aɗi si wa mda ata tsi ni. Amma ngəni an ɗəɗukur natə Yehu ku ɗəmhə kamnyar ka tsa kurəmta mjir vəngkər səli aka Baal.

²⁰Antə Yehu pəla, “Ka mda kəga tsaptədzi kamnyar vəngkər səli aka Baal.” Antə da ku kəga tsaptədzi ni.

²¹Antə Yehu ku thlentə ka mdə kəga shanga mjir Israila. Antə shanga mjir vəngkər səli aka Baal ku si, tə wala mdə duku aɗi na mbili kula si wa. Antə shanga ɗa ku ləkwa mbwar vəngkər səli aka Baal, antə mbwa ni ku nghyi kacar.

²²Yehu pəla aka mdər wul mbwar kari hata ni abbər, “Səɓəla ka ləptayeri aka shanga mjir vəngkər səli aka Baal.” Antə tsa ku səɓəla ka ləptayeri ni ala ɗa.

²³Aghəla nda antə Yehu ka Yehonadab na ɓzər Rekab ku ləmbwa akwa mbwar Baal ni. Antə Yehu pəla aka dlama ni, “Ka giri wulha nvwa giri ka wuta abbər buɗar MTHLAKU aɗi akwa nca giri wa, amma tar mjir vəngkər səli aka Baal daci.”

²⁴Antə Yehu ka Yonadab ku ləmbwa kamnyar hamta saɗaka ka saɗaka mbamba aka Baal. Akəma ta ni Yehu ku pwi mji nciskumari aɓəla, ka tsawa ala ɗa abbər, “Kəlara mdə na ku zhar tə mdə pal ku msəri akwa tsiyari, ata ndzi ata kəra mpikari.”

²⁵Təkəma tə Yehu kuri hamta saɗaka mbamba, antə tsa pəla aka mjir gadi ka kwakunayeri abbər, “Ləmbwa giri ka giri tsəgəi ɗa, giri aɗiya zhar ka wala mdə duku msərəmta wa.” Antə da ku tsəgəi ɗa ka katsakar. Antə mjir gadi ka kwakunayeri ni ku fwaɓəla mshiyir ɗa. Aghəla nda antə da ləkwa mbwar vəngkər səli aka Baal ni,

²⁶ka kəɓəla haptər Baal ka mbamta.

²⁷Antə da ku pukthləmta haptər Baal ka ndlamta mbwar Baal ka namtə mbwa ni tə tsa ndzi timbəli har ba ashina.

²⁸Apani antə Yehu ku tsi vəngkər səli aka Baal akwa Israila.

²⁹Amma wala apani Yehu aɗi ndəka ka bikayeri ar Kuthli Yerobowam na ku vu mjir Israila akwa vəngkər səli aka kənar dinar na akwa Bethlel ka Dan wa.

³⁰Antə MTHLAKU pəla aka Yehu, “Ga ku hara su na ɓɗaku ka shamta kutakəyir Ahab tsu apatə I ku ɗəmha akwa ɗəffi. Antə maɗa' nga ata sə hara kuthlikur ata kəra Israila har ka vədza aka zaman na nfwarkur.”

³¹Amma Yehu aɗi kələngkər aka tsawur MTHLAKU na Hyelər Israila ka ɗəffari duku wa. Tsa ku nu surharar Yerobowam na ku vu mjir Israila akwa hara biku.

³²Akwa saka na ndaga antə MTHLAKU ku baɗitə kəmta olkurər tsəɗi Israila. Kuthli Hazayel ar Siriya ku səməmnya shanga tsəɗi Israila.

³³Hazayel ku səməmnya tsəɗi ni baɗita akwa Jodan təbwar raghəi, ka shanga tsəɗiyir Gileyad ka ar Gad, ka ar Ruben ka ar Manasse, baɗita adzə Arower na akwa dərakər Arnon ka paktə ka Gileyad ka Bashan.

³⁴Shanga su tə Yehu ku hara ka katsalakurərni, mdə ku rəbutə ɗa akwa Kakaɗər Labar ar Kuthlyayeri ar Israila.

³⁵Yehu ku mti, antə mdə ku harəmta ni akwa Samariya. Antə Yehowahaz na ɓzərni ku ləkwa kuthlikur ata vəyari.

³⁶Yehu ku hara kuthlikur ata kəra Israila ahar Samariya ar məva sərkumari ka ncisu.