Read bura-pabir 2 Kuthlyayeri 13 Bible Online

2 Kuthlyayeri 13 - bura-pabir bible

2 Kuthlyayeri 13

¹Yehowahaz na ɓzər Yehu baɗitə hara kuthlikur ata kəra Israila ahar Samariya akwa məva na sərkumari ka makərkur ar Yowash na ɓzər Ahaziya kuthlir Yahuda. Antə Yehowahaz ku hara kuthlikur ar məva kumnya murfa.

²Tsa hara su na ɗimi aka MTHLAKU, ka nu lakur bikayeri ar Yerobowam na ɓzər Nebat, na vu mjir Israila akwa hara biku. Tsa aɗi ndəka ka bikayeri ar Yerobowam wa.

³Antə ɗəffa MTHLAKU ku ɓzi ata kəra Israila, antə tsa ku zhari tə Hazayel na kuthlir Siriya ka ɓzərni Benhadad ku hara kuthlikur ata kəra Israila

⁴Yehowahaz ku kiɗə MTHLAKU, antə MTHLAKU ku nggatə ni, kamnyar tə tsa ku wutə mwavərkur bwani na ata kəra Israila, natə kuthlir Siriya akwa hara ala ɗa.

⁵Kamnyar ngəni MTHLAKU ku hamta mdər mbanta aka mjir Israila, na ku msərantə ɗa akwa tsiya mjir Siriya. Antə mjir Israila ku ndzəndzi akwa kutakəyir ɗa ka msərakur tsu apa na waci.

⁶Wala apani da aɗi ndəka ka bikayeri ar Kuthli Yerobowam wa, tsa na ku vu mjir Israila akwa hara biku. Amma da ku ləkəma ka harari, ka zhar Ashera na mwala haptu tsu akwa Samariya.

⁷Kamnyar su na mbila aka Yehowahaz an mjir taku ntəfkumari, ka wagənər taku kuma, ka mjir səl dəpu kuma. Kamnyar kuthlir Siriya ku hadləmta ɗa tə da ndzi apa bərbər akwa vəi dəka.

⁸Shanga suayeri natə Yehowahaz ku hara ka katsalakurərni, mdə ku rəbutə ɗa akwa Kakaɗər Labar ar Kuthlyayeri ar Israila.

⁹Yehowahaz ku mti, antə da ku harəmta ni akwa Samariya. Antə Yehowash na ɓzərni ku ləkwa kuthlikur ata vəyari.

¹⁰Akwa məva na makkumari ka murfəkur ar Yowash kuthlir Yahuda, antə Yehowash na ɓzər Yehowahaz ku baɗitə hara kuthlikur ata kəra Israila akwa Samariya. Antə tsa ku hara kuthlikur ar məva kumnya ngkwa.

¹¹Tsa ku hara biku aka MTHLAKU atar hara suayeri na ɗimi ɗimi tsu apa Yerobowam na ku vu mjir Israila akwa hara biku.

¹²Shanga suayeri natə Yehowash ku hara ka katsalakurərni, ka na ar Amaziya na kuthlir Yahuda, mdə ku rəbutə ɗa akwa Kakaɗər Labar na ar Kuthlyayeri ar Israila.

¹³Apani Yehowash ku mti, antə mdə ku harəmta ni akwa Samariya, ata vəi duku kəga kuthlyayeri ar Israila. Antə ɓzərni Yerobowam na Suɗkur ku ləkwa kuthlikur ata vəyari.

¹⁴Sakatə Elisha ku hara nggawa na ata ndzi sur mtərni, antə Yehowash na kuthlir Israila ku mwari adzə ni ka tuwa akəmari abbər, “Ai mdərkəyirna, Ai mdərkəyirna! Mdər mbul Israila.”

¹⁵Elisha pəla alari, “Kəta lali ka afayeri.” Antə tsa ku kətə lali ka afayeri.

¹⁶Antə tsa pəla aka kuthlir Israila, “Kətsə lali ni, antə tsa ku kətsə lali ni.” Antə Elisha ku vəngkər tsiyari ata kəra tsiya kuthli ni.

¹⁷Antə Elisha pəla, “Kəlar windau təbwar raghəi.” Antə tsa ku kəlari. Tə Elisha pəla, “Sha afə ni.” Antə tsa ku sha. Tə tsa pəla, “Afər nggyari su ar MTHLAKU, afa na ata nggyari Siriya! Kamnyar ga ata sə mpa mjir Siriya akwa Afek, tar ma ga ku kuri ɗa karkar.”

¹⁸Antə Elisha pəla, “Fatə afayeri ni.” Antə tsa fatə ɗa. Antə tsa pəla aka kuthlir Israila, “Tsa di ka da.” Antə tsa ku tsa di ka makər, ka thləthlata.

¹⁹Antə ɗəffa Elisha ku ɓzi, tə tsa pəla, “Kalkal kara tsa di ni ka ntəfu wala ka ngkwa, antə sakani ga ata nggyari mjir Siriya ka kuri ɗa. Amma kulini ga ata mzhi nggyari Siriya ka makər daci.”

²⁰Antə Elisha ku mti, tə da harəmta ni. Akwa saka ngəni sojayeri ar Mowab ana dlər tsəɗi nda akwa sakatə di ata mərta.

²¹Vir laga mji akwa ra har mshi, antə da wutə mjir dləra, antə da ku ndzəhəu mshiyir mdə ni akwa kulər Elisha, təkəma tə dza mdə ni ku tsəkwar ɗethlər Elisha, antə təkəma tsa ku mbəi ka thlata ata səlari.

²²Kuthli Hazayel ar Siriya ku nar bwani aka mjir Israila akwa zamanər Yehowahaz.

²³Amma MTHLAKU ku hara mdəkur ala ɗa antə tsa aɗi ata shamta ɗa wa. Tsa ku kətadzə ɗa kamnyar alkawal arni ka Ibrahim ka Ishaku ka Yakub. Antə tsa aɗi ɗar fwari mjirni wa.

²⁴Sakatə Hazayel na kuthlir Siriya ku mti, antə Benhadad na ɓzərni ku ndzi kuthli ata vəyari.

²⁵Yehowash na kuthlir Israila ku dlər sojayeri ar Siriya ka makər ka səm ɗa. Tsa ku mbultsa shanga bərniyayeri natə Benhadad ku ngkəi akəla baba'ni Yehowahaz.