Read bura-pabir 2 Kuthlyayeri 14 Bible Online

2 Kuthlyayeri 14 - bura-pabir bible

2 Kuthlyayeri 14

¹Akwa məva na suɗkur ar Yehowash na ɓzər Yehowahaz kuthlir Israila, antə Amaziya na ɓzər Yowash kuthlir Yahuda ku baɗitə kuthlikur.

²Amaziya ka məvari sərkumari ka ntəfu ka yarni, sakatə tsa baɗitə ndzi kuthli. Antə tsa ku hara kuthlikur akwa Urushalima, ar məva sərkumari ka əmdla. Tsuwa thləma mama'ni an Yehowaddin na ngkwar di Urushalima.

³Tsa ku hara su kalkal aka MTHLAKU, amma aɗi mzhitə su tə kəkarni Dauda ku hara wa. Akwa shanga su tə tsa ku hara, tsa ku nu suayeri ar baba'ni Yowash.

⁴Tsa aɗi huzamta mashiɗayeri ar haptu wa. Mji tsu akwa ləkəma ka hamta saɗaka ka mba tulari ɗuza akwa mashiɗayeri ni.

⁵Antə təkəma tə tsa wuta abbər kuthlikur ku ndzəndzi ɓəɓal akwa tsiyari, təng tsa tsəgəi shanga mji na tsi baba'ni Kuthli Yowash.

⁶Amma tsa aɗi tsəgəi maɗa' mjir tsi mdə ni wa. Tsa hara kalkal apatə mdə rəbuta akwa Kakaɗər Musa, akwa vəi tə MTHLAKU pəla abbər, “Mda aɗi ata tsi mjir ya kamnyar bikər maɗa' ɗa wa, wala tsi maɗankyar kamnyar bikər mjir yar ɗa wa. Kəlara mdə na ku hara biku, tsa antə mda ata tsiyari.”

⁷Amaziya ku tsəgəi mjir Edom dəpu kuma akwa mular Una. Tsuwa tsa ku ngkəi bərni Sela akwa mpa, ka kəga thləma vəi ni Yokthleyel, na ku ndzi thləmari har ba ashina.

⁸Amaziya ku thlentə mji aka Yehowash na ɓzər Yehowahaz, na ɓzər Yehu, na kuthlir Israila abbər, “Asəra ka mwa pa kərathlu, ma ga amzha!”

⁹Antə Yehowash na kuthlir Israila thlenta amsa aka Amaziya na kuthlir Yahuda abbər, “Waci mtəhəra laga aɗi akwa Lebanon na ku thlentə ndər aka nfur seda laga ola akwa Lebanon abbər, ‘Hamta ngkwar nga aka ɓzərna ka tsa kəla.’ Amma təkəma təng mwaɓi mtaku laga akwa Lebanon ni si akwa təramta ka ntsəntsarəmta nfur mtəhəra ni!

¹⁰Amaziya, jiri ga ku səm mjir Edom, antə ga ku haptə kəra ga. Ga ata ata mzhi mbikantədzi kamnyar səm tə gə hara ni, amma arna I akwa pəla ala ga abbər kuji kara ndzəndzi tsu avi. Kamnyar mi tə ga ata bara ti bwari na ata ndəkərəngkər asar ata kəra ga ka mjir Yahuda ri?”

¹¹Amma Amaziya aɗi psi thləm wa. Apani antə Yehowash na kuthlir Israila ka sojayeri arni ku ləɓəla akwa mpa ni. Antə tsa ka Amaziya na kuthlir Yahuda ku giratə kəma ɗa akwa mpa ahar Beth Shemesh, na akwa Yahuda.

¹²Antə mjir Israila ku səm mjir Yahuda, tə waskəi ku hwi ləhar ngkiɗa.

¹³Antə Yehowash na kuthlir Israila ku ngkəi Amaziya na kuthlir Yahuda na ɓzər Yehowash, na ɓzər Ahaziya ahar Beth Shemesh, ka si ahar Urushalima. Antə Yowash vu tə mdə huzamta katangga Urushalima, baɗita adzə Nyarfur Ifrayim har ka mwanta adzə Nyarfur Kuɗəma, natə saɓəlkurari ku hara dzarsəl aru ngkwa ni.

¹⁴Antə tsa famnya shanga dinar ka adzərfa ka shanga kari tə tsa wuta akwa mbwar MTHLAKU, ka na akwa vəi ɗuwar kwaba na akwa kəi kuthlikur, ka fatə mji apa mafayeri, ka ngka ahar Samariya.

¹⁵Shanga suayeri natə Yehowash ku hara, ka dunarni ka apatə tsa ku mpa ka Amaziya na kuthlir Yahuda, mdə ku rəbutə ɗa akwa Kakaɗər Labar ar Kuthlyayeri ar Israila.

¹⁶Yehowash ku mti, antə mdə ku harəmta ni akwa Samariya ata vəi duku kəga kuthlyayeri ar Israila, antə ɓzərni Yerobowam na Suɗkur ku lətə dəkəl kuthlikur arni.

¹⁷Amaziya na ɓzər Yowash, na kuthlir Yahuda, ku jaktə hara məva kumnya ntəfu aghəla mtər Yehowash na ɓzər Yehowahaz na kuthlir Israila.

¹⁸Mdə ku rəbutə mambila kəthlərayeri tə Amaziya hara akwa Kakaɗər Labarər Kuthlyayeri ar Yahuda.

¹⁹Antə mji laga akwa Urushalima pəli abbər da ata tsi ni. Antə tsa hwi ka mwari ahar Lakish, amma wala apani mdə ku thlentə mji ahar Lakish na ku mwari ka tsi ni anda.

²⁰Antə da səntə mshiyirni ata hila taku, ka harəmta ni akwa Urushalima, akwa vəi tə mda ana har kuthlyayeri akwa Bərniyir Dauda akwa Yahuda.

²¹Antə shanga mjir Yahuda ku kətə Azariya na ka məvari kumnya ngkwa ka yarni, ka vəi ni kuthli ata vəya baba'ni Amaziya.

²²Azariya an mdə na ku mbultsa bərni Elath, ka jaktə latə bərni ni aghəla mtər baba'ni.

²³Yerobowam na Suɗkur na ɓzər Yehowash baɗitə ndzi kuthlir Israila akwa məva na kumnya ntəfkur ar Amaziya na kuthlir Yahuda. Yerobowam ku hara kuthlikur ar məva nfwarkumari ka ntang akwa Samariya.

²⁴Tsa ku hara biku aka MTHLAKU atar nu suayeri na ɗimi ɗimi natə Yerobowam na ɓzər Nebat ku hara, na vu mjir Israila akwa hara biku.

²⁵Yerobowam na Suɗkur ku mbultsa ka ngka ka kəlayeri ar Israila baɗita adzə vəi pəra ka ləkwa Hamath har ka mwanta adzə Manda Araba. Ngəni an su tə MTHLAKU na Hyelər Israila ku pəla atar buɗarni naɓi Jona na ɓzər Amittai, na ahar Gath Hefer.

²⁶Kamnyar MTHLAKU ku wutə jili mwavərkur bwani natə mjir Israila ola ka ntsaha akwa ɗarari amma mdər dlar ɗa aɗi wa.

²⁷Antə təng tə MTHLAKU ku pəla abbər tsa aɗi ata shamta Israila karkar akwa duniya wa, antə tsa kəthlər ka Yerobowam na Suɗkur ka tsa mbantə ɗa.

²⁸Shanga suayeri natə Yerobowam na Suɗkur ku hara, ka katsalakurərni akwa mpa, ka laku tə tsa ku mbultsə Damaska ka Hamath aka Israila na akwa Yahuda, mdə ku rəbutə ɗa akwa Kakaɗər labar Kuthlyayeri ar Israila.

²⁹Yerobowam ku mti, antə mdə ku harəmta ni ata vəi duku ka kuthlyayeri ar Israila. Antə Zakariya na ɓzərni ku hara kuthlikur ata vəyari.