Read bura-pabir 2 Kuthlyayeri 16 Bible Online

2 Kuthlyayeri 16 - bura-pabir bible

2 Kuthlyayeri 16

¹Ahaz na ɓzər Yothlam, ku baɗitə hara kuthlikur ata kəra Yahuda akwa məva na kumnya murfəkur ar kuthli Peka na ata kəra Israila.

²Ahaz ka məvari sərkumari ka yarni sakatə tsa baɗitə hara kuthlikur. Antə tsa hara kuthlikur ar məva kumnya ngkwa akwa Urushalima. Tsa aɗi hara su na kalkal ata nca MTHLAKU na Hyelərni apatə kəkarni Dauda ku hara wa.

³Tsa ku nu surharar kuthlyayeri ar Israila har ka hamta ɓzər kutari saɗaka mbamba aka haptayeri. Tsa ku nu sur hara na ɗimi ar mji natə MTHLAKU ku kədləɓəla ɗa kazhar tsəɗi aka mjir Israila.

⁴Ahaz ku hamta saɗakayeri, kəga saɗaka mbamba akwa vəi vəngkər səli aka haptu, ka ata kəra garayeri, kəga akira kəlara nfwa na ka shanggur ola.

⁵Aghəla nda Rezin na kuthlir Siriya ka Peka na kuthlir Israila, ku si ka da mpa Urushalima. Antə da ku kalaktə Ahaz ka mpa, amma da aɗi mzhi nggyari ni wa.

⁶Akwa saka ndaga kuthlir Edom ku jaktə dlutsə Elath aka mjir Edom, ka kədləmta mjir Yahuda kazhar Elath, antə mjir Edom ku si ka ndzəndzi akwa Elath har ka sənta aka vir na ashina.

⁷Antə Ahaz ku thlentə mji adzə Tiglath Pileser na kuthlir Assiriya, akwa pəla, “I an buɗar nga ka ɓzər nga. Asəra kara mbultsə ra akwa tsiya kuthlir Siriya ka kuthlir Israila na akwa mpa ra.”

⁸Tsuwa Ahaz ku fwaɓəla adzərfa ka dinar natə mdə ku wuta akwa mbwar vəngkər səli aka MTHLAKU ka akwa vəi ɗuwar kwaba na akwa kəi kuthlikur ka thlentə ɗa cauta aka kuthlir Assiriya.

⁹Kuthlir Assiriya ku nggatə kiɗərni, antə tsa ku mwari ka mpa Damaska, ka səm ni ka famnya mjir bərni nda ka səntə ɗa ahar Kir, ka tsi Kuthli Rezin.

¹⁰Sakatə Kuthli Ahaz ku mwari ahar Damaska ka da kəɓa ka Tiglath Pileser na kuthlir Assiriya, antə tsa ku wutə bagaɗi na ahar Damaska. Antə Kuthli Ahaz ku thlenta aka Uriya na prist jili bagaɗi ni ka laku tə mdə ku namtə ni, ka shanga suayeri na adzə ni.

¹¹Antə Uriya na prist ku həntə bagaɗi ni tsu apatə Kuthli Ahaz ku thlenta alari sakatə tsa ahar Damaska. Antə Uriya na prist ku namtə bagaɗi ni akəmata Kuthli Ahaz angka.

¹²Sakatə kuthli ni ku thlatə kazhar Damaska ka ngka, antə tsa wulha bagaɗi ni. Antə tsa shahədzi kudzəhə ka bagaɗi ni ka hamta saɗaka ata.

¹³Antə tsa hamta saɗaka mbamba, ka saɗakar mpwa, ka saɗakar sur sa ka pshingkər mamshir saɗakar jakə mwardzi ata kəra bagaɗi ni.

¹⁴Antə Ahaz ku kələmta bagaɗi ar əmza natə mdə ku vəi akəma mbwar vəngkər səli aka MTHLAKU kazhar vəi tə tsa akwa, ka vəi ni təbwar yala ar bagaɗi ni.

¹⁵Antə Kuthli Ahaz tsawa aka Uriya na prist abbər, “Ata kəra bagaɗi na ol ni ka gə hamta saɗaka mbamba ar ɗəɗəpa, ka saɗakar mpu na tahaku, ka saɗaka mbamba, ka saɗakar mpwa ar kuthli, ka saɗaka mbamba ar shanga mjir tsəɗi ni, ka saɗakar mpwa arɗa ka saɗakar sur sa arɗa. Kara pshingkər mamshir shanga mwaɓiyayeri natə mdə ku hara saɗaka kəgari. Amma kara zhar ali bagaɗi əmza ni kamnyar yu su akəla Hyel.”

¹⁶Antə Uriya na prist ku hara shanga su tə kuthli ni ku tsawa alari.

¹⁷Kuthli Ahaz ku ɓəgələmta nggilanga amalangkeyayeri ar əmza ni, ka ɗəmi tasa na ol'ola na akwa amalangkeyayeri ni. Tsuwa tsa ku kəli gəlam əmza na ola na ata hila gyalayeri ar əmza na kumnya suɗə ni ka vəi ata kəra vəi natə mdə ku nci səlari ka pela.

¹⁸Kamnyar ka tsa namtə ɗəffa kuthlir Assiriya, Ahaz ku kələmta tent tə mdə latə kamnyar vəngkər səli akwa Vir Ghərəmtaghəra, ka hartə nyarmbwar ləkwa ar kuthli akwa mbwar vəngkər səli.

¹⁹Shanga suayeri natə Ahaz hara mdə ku rəbutə ɗa akwa Kakaɗər Labar ar Kuthlyayeri ar Yahuda.

²⁰Ahaz ku mti, antə mdə ku harəmta ni ata vəi duku kəga kəkayeri arni akwa Bərniyir Dauda. Antə Hezekiya na ɓzərni ku ləkwa kuthlikur ata vəyari.