Read bura-pabir 2 Kuthlyayeri 17 Bible Online

2 Kuthlyayeri 17 - bura-pabir bible

2 Kuthlyayeri 17

¹Hosheya na ɓzər Ela ku baɗitə ndzi kuthlir Israila akwa məva na kumnya suɗkur ar Kuthli Ahaz akwa Yahuda. Antə tsa hara kuthlikur ar məva əmdla akwa Samariya.

²Hosheya ku hara biku aka MTHLAKU, wala tə aɗi mzhitə su tə kuthlyayeri ar Israila na akəmata tsa ku hara wa.

³Shalmaneser na kuthlir Assiriya ku dlər Kuthli Hosheya ka səm ni. Antə Hosheya ku ndzi akirari ka ntə tsəma alari.

⁴Amma aghəla nda Hosheya nggəlar ta ntə tsəma ni ka kiɗə So na kuthlir Masar ka tsa dlar ni akwa ləɓəla akira Assiriya, ka msər ta nta alari tsəma ni. Sakatə Shalmaneser nggaɓəla abbər Hosheya aɗi ka jirkur wa, antə tsa ngkəi Hosheya ka hartə ni akwa pərsəna.

⁵Shalmaneser ku mwantə mpa aka shanga Israila ka kalaktə Samariya ka mpa mnyar məva makər.

⁶Akwa məva na əmdləkur ar Kuthli Hosheya antə kuthlir Assiriya ku səm Samariya ka fatə mjir Israila ka mwantə ɗa ahar Assiriya apa pərsənayeri. Tsa pwi bwadukwa ɗa ahar Hala, bwaduku ata mnya Thlyagha Habor na akwa lardər Gozan, ka bwadukwa ɗa akwa bərniyayeri ar mjir Mediya.

⁷Mdə ku mzhi ɓdləmta Samariya kamnyar tə mjir Israila ku hara biku aka MTHLAKU na Hyelər ɗa, na msərantə ɗa ka fwaɓəla ɗa akwa mafakur akwa tsiya kuthlir Masar. Da ku vəngkər səli aka haptayeri.

⁸Tsuwa da ku nu surharar mji natə MTHLAKU ku kədləmta kazhar Israila, ka suayeri natə kuthlyayeri ar Israila ku vəi.

⁹Mjir Israila ku hara suayeri damwa akwa ɗuwari na aɗi kalkal aka MTHLAKU na Hyelər ɗa wa. Da ku latə mashiɗayeri ar haptu akwa shanga kauyayeri arɗa, baɗita akwa kauyayeri ka mwanta aka bərniyayeri na akwa katangga.

¹⁰Da ku ncigəi shanggamayeri ka haptər Ashera ata kəra kəlara gar na nal ka akira kəlara nfwa na ola.

¹¹Da ku mba tulari ɗuza akwa shanga mashiɗayeri ar haptu apatə durayeri natə MTHLAKU ku kədləmta ɗa kazhar kəma ɗa ku hara. Antə da ku hara su na ɗimi ka ɓzamtə ɗəffa MTHLAKU.

¹²Da ku vəngkər səli aka haptayeri, su tə MTHLAKU ku pəla ala ɗa abbər da aɗiya hara wa.

¹³MTHLAKU ku thlentə naɓiyayeri ka kəlara mdər wulsu ka da tsaktə Israila ka Yahuda abbər, “Zhar giri hara su na ɗimi ka giri ɓəla tsawayeri arna ka surthlipərna natə I ku hamta aka kəkayeri ar giri, ka natə I hamta ala giri atar naɓiyayeri na buɗayeri arna.”

¹⁴Amma da aɗi psi thləm wa. Kəra ɗa ɓəɓal apa kəkayeri arɗa na ku nggəlar ta kələngkər aka MTHLAKU na Hyelər ɗa.

¹⁵Da ku nggəlar tsaktərni ka tsawurni, ka alkawal natə tsa ku hara ka kəkayeri arɗa. Da ku nu haptayeri na gapani ka ndzi mji hilhila. Da ku nggəlar ta kələngkər aka tsawur MTHLAKU, ka nu surharar mji na kalaktə ɗa, ka ndzi tsu apa da.

¹⁶Da ku ɓəli shanga tsawayeri ar MTHLAKU na Hyelər ɗa, ka namtə dludzər kəna suɗa. Da ku namtə haptu Ashera, ka vəngkər səli aka thliya ka pci ka sasəlkayeri, ka aka Baal.

¹⁷Da ku hamta maɗa' ɗa saɗaka akwa u'u aka haptu, ka hakdzi, ka tsadi. Da ku hamta kərɗa swakti akwa hara ɗimikur ka ɓzamtə ɗəffa MTHLAKU.

¹⁸Antə ɗəffa MTHLAKU ku ɓzi ka duna adza mjir Israila, tə tsa kədləmta ɗa kazhar kəmari. Tar mji na akwa Yahuda daci an mbila.

¹⁹Amma wala mjir Yahuda aɗi kələngkər aka tsawayeri ar MTHLAKU na Hyelər ɗa wa. Da ku nu suayeri na ɗimi tə mjir Israila ku vəi.

²⁰Apani antə MTHLAKU ku nggəlar shanga mjir Israila. Tsa ku ɗi ɗa ka hamta ɗa akwa tsiya dawayeri na ɗimi, tar tə tsa ku famta ɗa kazhar kəmari.

²¹Aghəla tə MTHLAKU ku ndəkəmta Israila ka Yahuda, antə mjir Israila ku vəi Yerobowam na ɓzər Nebat kuthlir ɗa. Antə Yerobowam ku ndəkərəmta hangkala mjir Israila kazhar nu MTHLAKU, ka vu ɗa akwa hara biku na ola.

²²Antə mjir Israila ku ləkəma akwa hara ɗimikur natə Yerobowam ku hara,

²³tar tə MTHLAKU famta ɗa akəmari, apatə tsa ku pəla ala ɗa atar naɓiyayeri na buɗayeri arni. Apani mdə ku fatə mjir Israila ka mwantə ɗa ahar Assiriya apa mafayeri, antə da ku ndzi anda har ba ashina.

²⁴Antə kuthlir Assiriya fatə mji na ahar Babila, ka Kuthlu, ka Avva, ka Hamath, ka Sefarvayim, ka mwantə ɗa akwa bərniyayeri ar Israila. Tsa pwi ɗa akwa kauyayeri ar Samariya ata vəya mjir Israila. Antə da ku ndzi mthlakər Samariya ka kauyayeri na kalaktə ni, ka ndzi akwa da.

²⁵Akwa baɗitər ndzəndziyir mji na thlata ahar Babila ni, da aɗi vəngkər səli aka MTHLAKU wa, antə MTHLAKU ku thlentə tsəngiyayeri akwa nca ɗa na ku tsəgəi mjir ɗa laga.

²⁶Antə mdə laga ku thlentə kuraku aka kuthlir Assiriya abbər, “Mji natə gə mwanta akwa kauyayeri ar Samariya ni, da asəndə lakur vəngkər səli aka haptər tsəɗi nda wa, antə haptu ni ku thlentə tsəngiyayeri akwa nca ɗa akwa tsəgəi ɗa.”

²⁷Antə kuthlir Assiriya ku tsawa abbər, “Ka mda thlentə pal akwa nca pristayeri natə mdə ku fata anda ni, ka tsa mwari ra ndzi anda, ka thlipa ala ɗa su ata kəra haptər tsəɗi nda.”

²⁸Antə pal akwa nca pristayeri natə da fata ahar Samariya ni ku ngka ka ndzəndzi akwa Bethlel. Antə tsa ku thlipa ala ɗa lakur vəngkər səli aka MTHLAKU.

²⁹Amma bwadukwa mji na akwa ndzi akwa bwayeri zumzum ar Israila ku namtə dludzər haptayeri ar diyir ɗa ka pwi ɗa akwa mashiɗayeri natə mjir Israila ku lata.

³⁰Mjir Babila ku namtə dludzər haptər ɗa Sukkoth Benoth. Mjir Kuth ku namtə dludzər haptər ɗa Nergal. Antə mjir Hamath namtə Ashima.

³¹Mjir Avva ku namtə Nibhaz ka Tartak. Tsuwa mjir Sefarvayim ku mbagamta maɗankyar arɗa akwa u'u aka haptayeri arɗa Adrammelek ka Anam'melek.

³²Antə mji bilən ni ku vəngkər səli aka MTHLAKU, amma tsuwa da ku carɓəla mji ndzang akwa nca ɗa ka pwi ɗa pristayeri akwa mashiɗayeri kamnyar hamta saɗakayeri arɗa.

³³Apani da ku vəngkər səli aka MTHLAKU, amma tsuwa da ku vəngkər səli aka haptayeri arɗa kalkal ka surharar tsəɗiyir ɗa natə da thlata akwa.

³⁴Ba ashina da ana hara su apatə da ana hara sakanda. Da aɗi ana vəngkər səli aka MTHLAKU wa, wala kələngkər aka tsawayeri natə MTHLAKU ku hamta aka maɗa' Yakub natə tsa vəta alari thləm Israila wa.

³⁵MTHLAKU ku hara alkawal ka mjir Israila ka tsawa ala ɗa abbər, “Giri aɗiya vəngkər səli aka haptayeri, wala zuzuri ala ɗa, wala hara mafakur ala ɗa, wala hamta saɗaka ala ɗa wa.

³⁶Amma ka giri vəngkər səli ali, I na MTHLAKU, na fwaɓəla giri akwa Masar atar duna na ola. Antə ka giri zuzuri ka hamta saɗaka ali.

³⁷Ka giri kələngkər ka ɓəlatə shanga suayeri tə mdə thlamta abbər ka mdə hara ka tsawayeri natə I ku rəbutə kamnyar giri. Giri aɗiya thlivər haptayeri wa,

³⁸Wala fwari alkawal natə I ku hara kəga giri wa. Giri aɗiya thlivər haptayeri wa,

³⁹amma ka giri thlivər MTHLAKU na Hyelər giri, antə tsa ata msərantə giri akwa tsiya shanga dawayeri ar giri.”

⁴⁰Amma da aɗi psi thləm wa, kamnyar da ku ləkəma ka hara su tsu apatə da tsəli ka harari sakanda.

⁴¹Antə wala tə mji bilən ni ku thlivər MTHLAKU, da ku vəngkər səli aka haptayeri arɗa. Antə ba ashina maɗa' ɗa kəga kəkayeri arɗa akwa nu su tə kəkayeri arɗa ku hara waci.