Read bura-pabir 2 Kuthlyayeri 18 Bible Online

2 Kuthlyayeri 18 - bura-pabir bible

2 Kuthlyayeri 18

¹Hezekiya na ɓzər Ahaz ku baɗitə ndzi kuthlir Yahuda akwa məva na makərkur ar Hosheya na ɓzər Ela kuthlir Israila.

²Tsa ka məvari sərkumari ka ntəfu ka yarni sakatə tsa ku baɗitə ndzi kuthli. Antə tsa hara kuthlikur ar məva sərkumari ka əmdla akwa Urushalima. Thləma mama'ni an Abi na ngkwar Zakariya.

³Antə tsa ku hara su na kalkal ata nca MTHLAKU, tsu apatə kəkarni Dauda ku hara.

⁴Tsa ku huzamta mashiɗayeri, ka ndlagamta shanggamayeri, ka pukthləmta dludzər Ashera. Tsuwa tsa ku ɓəgələmta pwapur əmza na ka thləmari Nehushtan tə Musa namtə ni. Kamnyar har ka vədza aka sakanda mjir Israila tsu ana mba tulari ɗuza aka haptu ni.

⁵Hezekiya ku mbərsa ka MTHLAKU na Hyelər Israila. Mda aɗi wala pal akwa nca kuthlyayeri ar Yahuda na ku hara su apa tsa wa, wala akəmata tsa, wala aghəlari wa.

⁶Kamnyar tsa ku kəsi MTHLAKU ka duna, ka ɓəlatə shanga tsawayeri natə MTHLAKU ku hamta aka Musa.

⁷Antə MTHLAKU ku dlar Hezekiya, antə tsa ku ləkəma akwa shanga su tə tsa ku hara. Tsa ku muli aka kuthlir Assiriya, ka nggəlar ta ntə tsəma alari.

⁸Hezekiya ku dlər mjir Filistiya ka səm ɗa. Tsa ɓdləmta shanga kauyayeri arɗa, kauyayeri kəga bərniyayeri na akwa katangga, har ka mwanta aka Gaza ka kauyayeri na kalaktə ni.

⁹Akwa məva na nfwarkur ar Kuthli Hezekiya, na an məva na murfəkur ar Hosheya kuthlir Israila, antə Shalmaneser na kuthlir Assiriya ku ra dlər Israila ka kalaktə Samariya ka mpa.

¹⁰Akwa tsikəra məva na makərkur antə tsa kalaktə di ni ka ngkəi Samariya. Tsa ngkəi Samariya ni akwa məva na ngkwakur ar kuthlikur Hezekiya, na an məva na əmdləkur ar kuthlikur Hosheya ata kəra Israila.

¹¹Kuthlir Assiriya ku fatə mjir Israila ka mwantə ɗa ahar Assiriya. Tsa ku pwi ɗa akwa Hala ka ata mnya Thlyagha Habor na akwa lardər Gozan, ka akwa kauyayeri ar mjir Mediya.

¹²Samariya ku ndla kamnyar mjir Israila aɗi kələngkər aka MTHLAKU na Hyelər ɗa wa. Da ku ɓəli alkawal ka shanga tsawayeri natə Musa na buɗar MTHLAKU ku hamta. Da aɗi ana psi thləm wala kələngkər aka su wa.

¹³Akwa məva na kumnya nfwarkur ar kuthli Hezekiya antə Sennakerib na kuthlir Assiriya ku dlər bərniyayeri na akwa katangga akwa Yahuda ka ngkəi ɗa.

¹⁴Antə Hezekiya na kuthlir Yahuda thlenta aka Sennakerib ahar Lakish abbər, “I ku ɓzi. Zhar ra bu usa. I ata ntə kəlara su tə gə thlangkər ali.” Antə Sennakerib pəla ka Hezekiya na kuthlir Yahuda ka tsa thlenta alari kilogram ar adzərfa dəpu kuma ka kilogram ar dinar dəpu pal.

¹⁵Antə Hezekiya ku hamta alari shanga adzərfa na akwa mbwar vəngkər səli aka MTHLAKU, ka na akwa vəi ɗuwar gəna na akwa kəi kuthlikur.

¹⁶Tsuwa Hezekiya ku mbwagali dinar na ata nyarmbwayeri ar mbwar vəngkər səli aka MTHLAKU, ka na ata udzəm nyarmbwayeri natə tsa ka kərni ku puta, ka hamta aka Sennakerib.

¹⁷Antə kuthlir Assiriya ku thlentə mji ol'olər mpa, ka capwalarni, ka soja na olta shang, kəga dlamar sojayeri tə da ku thlata ahar Lakish ka ra yu mnya Kuthli Hezekiya akwa Urushalima. Sakatə da ku si, ahar Urushalima antə da ku thləthlata adzə vəi puɓəladzər yimər kufa na ata mnya laku na ola na ata mwari akwa Bəbalər Mdər Kəca

¹⁸Sakatə da thlentə ka kuthli si antə kuthli ku thlentə mjirni na ol'ola makər: Da an Eliyakim na ɓzər Hilkiya, na ata kəra kəi kuthlikur, ka Shebna na sakatari, ka Yowa na ɓzər Asaf mdər rəbuta.

¹⁹Antə olər sojayeri ni pəla ala ɗa ka da pəla aka Hezekiya abbər, “Kuthli na Ola ar Assiriya akwa pəla, ‘Man tə gə ntsari tə ga aɗi akwa thlivər wa nə ri?

²⁰Gə tamata abbər, ndərayeri daci an ɗəɗukur ka dunar mpa ya? Nənga ga mbərsa ka wa ri, tə ga ata bara mparna ni?

²¹Nggədza kulini ga akwa vəkər ka Masar na apa zwal tədəkəi ar duwathlu, na ata ntsəvəmta tsiya kəlara mdə na rwatədzi ata. Apani antə kuthlir Masar ndzi aka shanga mji na ku vəkər ka tsa.

²²Ta ga asə pəla ga akwa mbərsa ka MTHLAKU na Hyelər giri! Kamnyar I na wuta apa tsu Hyel ndaga antə Hezekiya huzamta mashiɗərni ka bagaɗi alari ni! Hezekiya an psəmnya abbər ka shanga mjir Yahuda vəngkər səli ata bagaɗi saɗaka na akwa Urushalima daci.

²³Kuthlir Assiriya pəla ma har giri ata wutə mjir fəl taku tsa ata hamta ala giri taku dəpu suɗa cauta.

²⁴Ga aɗi mzhi ka gə mpa ka mdə na raka ta shang akwa nca sojayeri ar mdərkəyirna wa, wala tə ga akwa vəkər ka wagənayeri kəga mjir fəl takur Masar.

²⁵Gə tamata abbər I dlər tsəɗiyir nga ka səm ni ni kula tsiya MTHLAKU akwa ya? MTHLAKU surni an pəla ali kəi mpa tsəɗi ngəni kəi shamta ni.’ ”

²⁶Antə Eliyakim na ɓzər Hilkiya, ka Shebna, ka Yowa pəla aka soja na olta shang ar Assiriya ni abbər, “Yeru ata kiɗə nga kara gari ala yeru akwa mnya Aramiya, kamnyar yeru asəndə mnya ni. Ga aɗiya gari ala yeru akwa mnya Ibrani wa, ta mji na ata kəra katangga ni asə nggata.”

²⁷Amma soja na olta shang ni shinau ala ɗa abbər, “Apa mdərkəyirna ku thlentə ra kəi gari ala giri ka kuthlir giri daci ya. Awa, kəi gari aka mji na ata kəra katangga na ata sə kwasə civər ɗa ka sa kinər ɗa tsu apa giri.”

²⁸Antə soja na olta shang ni haptə kuraku ka pəla akwa mnya Ibrani, “Psi gir thləma giri aka ndərər kuthli na ola, kuthlir Assiriya!

²⁹Kuthli ni pəla, ‘Giri aɗiya hir ka Hezekiya pwaktə giri wa, kamnyar tsa aɗi ata sə mzhi msərantə giri akwa tsi wa.

³⁰Giri aɗiya hir ka Hezekiya vu giri ka giri vəkər ka MTHLAKU abbər, tsa ata sə msərantə giri wa. Wala pəla abbər bərni ngəni aɗi ata sə ləkwa tsiya kuthlir Assiriya wa' wa.’ ”

³¹“Kuthlir Assiriya pəla, ‘Giri aɗiya psi thləm aka Hezekiya wa. Ka giri kələngkər ali. Apani antə kəlara mda ata sə səm anap, ka kamnda, ka sa yimər jiɓərni.

³²Giri ata ləkəma ka harari apani, har tar ma I ku si ka fatə giri ka mwantə giri akwa tsəɗi damwa tsu apa ngəni, tsəɗi na ka mthli ka yimər anap, tsəɗi na ka susəma ka fakayeri ar anap, tsəɗi na ka nfwayeri ar zaitun ka cirməma. Antə carɓəla giri mpika ata vəya mta. Giri aɗiya psi thləm aka Hezekiya wa, apatə tsa akwa pwaktə giri ka pəla, “Ai MTHLAKU ata msərantə yeru” ni wa.

³³Nənga giri ku ɗar nggata abbər haptər tsəɗi laga aɗi na ku ɗar mbuli tsəɗiyirni akwa tsiya kuthlir Assiriya ri?

³⁴Nənga ama haptayeri ar Hamath ka Arpad ri? Ama haptayeri ar Sefarvayim, ka Hena, ka Ivva ri? Da ku mzhi mbultsa Samariya akwa tsi ya?

³⁵Hyelər mjir tsəɗi madi akwa nca tsəɗiyayeri ni an mzhi mbuli tsəɗiyirni akwa tsi ri? Kaha, tə aɗi wala duku wa, man hara tə giri ata mbərsa abbər MTHLAKU ata mbuli Urushalima akwa tsi nə ri?’ ”

³⁶Amma mji nayeri ni ku dləɓ səri, tə da aɗi shinau alari wala ndər pal wa, kamnyar tə Kuthli Hezekiya ku tsawa ala ɗa abbər, “Giri aɗiya shinau alari wa.”

³⁷Antə Eliyakim na ɓzər Hilkiya, na ata kəra kəi kuthlikur, ka Shebna na sakatari, ka Yowa na ɓzər Asaf na sakatari, ku ngka adzə Hezekiya ka kari hatər ɗa kukwahə kukwahari, ka pəla alari su tə soja na olta shang ar Assiriya ni ku pəla.