Read bura-pabir 2 Kuthlyayeri 19 Bible Online

2 Kuthlyayeri 19 - bura-pabir bible

2 Kuthlyayeri 19

¹Sakatə Kuthli Hezekiya ku nggatə ndər ni, antə tsa kukwahəmta ləptərni, ka hata dasa, ka mwari akwa mbwar vəngkər səli aka MTHLAKU.

²Antə tsa thlentə Eliyakim na ata kəra kəi kuthlikur, ka Shebna na sakatari, ka pristayeri na ol'ola akwa kari dasa ka da mwari adzə naɓi Ishaya na ɓzər Amoz.

³Sakatə da mzhita antə da pəla alari, “Nggədza su tə Hezekiya pəla, ‘Ashina an vir bwani, ka mpa, ka sur səli. Yeru ndzi apa maɗankyar na ku mzhitə sakar yaɓəladzər ɗa, amma mama' ɗa aɗi ka dunar yaɓəla ɗa wa.

⁴Ata mzhi ndzi abbər MTHLAKU na Hyelər nga ku nggatə shanga su tə kuthlir Assiriya ku pəla atar sojarni na olta shang tə tsa thlentə ni. Mdə ni ku nggəl Hyel na ka mpika. Antə ndzi ka MTHLAKU na Hyelər nga ɗi ni kamnyar su tə tsa pəla ni. Antə usa kara hara adduwa kamnyar yeru na ku mbili ka mpika.’ ”

⁵Sakatə kwakunayeri ar kuthli Hezekiya ku hamta ndər ar kuthli ni aka Ishaya,

⁶antə Ishaya shinau ala ɗa abbər, “Pəla giri aka mdərkəi giri abbər, ‘MTHLAKU ku pəla, Ga aɗiya damitədzi ata kəra mnyar rutə tə mjirthlentər kuthlir Assiriya ku hara ali ni wa.

⁷I ata vu mambəl laga akwa dzari, antə tsa ata nggatə labar na ata vu ni ka tsa ngka akwa tsəɗiyirni. Antə I ata sə vu ka mdə tsi ni ka katsakar akwa tsəɗiyirni.’ ”

⁸Ata saka ngəni soja na olta shang ar Assiriya ni ku nggata abbər kuthlir Assiriya ku zhar Lakish, ka ləkwa mpa ka Libna. Antə tsa zhar vəi ni ka mwari ka da kəɓa ka kuthli ni.

⁹Tsu akwa saka ngəni antə labar ku mzhitə Kuthli Sennakerib abbər Kuthli Tirhaka na ahar Ithliyopiya akwa səɓəla ka sojayeri arni ka da sə dlər ni. Antə Kuthli Sennakerib jaktə thlentə mji adzə Hezekiya na kuthlir Yahuda abbər,

¹⁰“Ga aɗiya vəkər ka Hyelər ngə ni wa diya, ta tsa asə pwaktə nga abbər kuthlir Assiriya aɗi ata ngkəi Urushalima wa.

¹¹Ga ku nggatə su tə kuthlyayeri ar Assiriya ku hara aka shanga tsəɗiyayeri na ku bara mpar ɗa, abbər da ana ɓdləmta ɗa karkar. Antə ar nga, ga ata wuta apa ga ata msər ya?

¹²Nənga haptayeri ar tsəɗiyayeri apa Gozan, Haran, Rezef ka mjir Eden na akwa Telassar, natə kəkayeri arna na waci ku shamta ɗa ni, ku mzhi msərantə mjir ɗa ri?

¹³Man hara aka kuthlyayeri ar Hamoth, Arpad, Sefarvayim, Hena ka ar Ivva ri?”

¹⁴Aghəla tə Hezekiya ku dlu wasikar kuthlir Assiriya ni ka karata, antə tsa mwari akwa mbwar vəngkər səli aka MTHLAKU ka pəbəlari akəma MTHLAKU.

¹⁵Antə Hezekiya ku hara adduwa aka MTHLAKU abbər, “MTHLAKU na Hyelər Israila, na andzəndzi ata kəra kerubayeri. Gə shinga an Hyel na ola ata kəra kuthlikurayeri ar duniya. Gə shinga an namtə vəi na amtazi ka duniya.

¹⁶MTHLAKU, wul laku tə Sennakerib akwa rutə nga akwa, gə na Hyel na ka mpika!

¹⁷Jiri MTHLAKU, yeru ku nggata abbər, kuthlyayeri ar Assiriya ku shamta mji ka ɓzamtə tsəɗiyayeri arɗa.

¹⁸Da ku mbamta haptayeri arɗa akwa u'u, amma ai haptu aɗi hyel wa. Kamnyar da an dludzər suayeri tə mdə nam ka udzəm ka pela.

¹⁹Kulini MTHLAKU na Hyelər yeru, I ata kiɗə nga kara msərantə yeru akwa tsiya mjir Assiriya, ka shanga kuthlikurayeri ar duniya sənda abbər gə shinga MTHLAKU an Hyel duku.”

²⁰Antə Ishaya ku thlenta aka Hezekiya abbər, “MTHLAKU na Hyelər Israila pəla, ‘I ku nggatə adduwar nga ata kəra Sennakerib na kuthlir Assiriya.’

²¹Antə ngəni an su tə I na MTHLAKU pəla ata Sennakerib, “ ‘Mjir Urushalima ku rutə nga ka kumshi nga, gə na Sennakerib. Mjir Urushalima akwa kumshi asar ka hara kuya ala ga, tə gə ngka akwa təra.

²²Sennakerib, I antə ga akwa rutari ka pthla alari ni ya, tə ga akwa ntsəh kuraka ga ka fa nca ga alari ni? Ka iya na Hyelər Israila!

²³Gə thlentə mjir nga ka da pthla ali I na MTHLAKU, ka da pəla ali abbər, ka wagənayeri ar nga na hang antə ga ku lətə garayeri na nal ta shang ka mzhitə jikwara garayeri ar Lebanon. I, ga ku mzhitə ɗəffa ɗəffa kuɓər nfurni ka nthlətsa udzəm ar seda na ɓɗakta shang ka udzəm mənta na ɓɗakta shang

²⁴Ga ku la jiɓayeri akwa tsəɗiyayeri na aɓəla, ka sa yimər ɗa. Tsuwa ka mandaɓar səla ga, ga ku shuwumta shanga zərkayeri ar Masar!’ ”

²⁵“ ‘To ngga ja Sennakerib, I na MTHLAKU an ɗəmhə suayeri ni tsu waci. I an na gə duna tə kulini ga akwa namtə kauyayeri na akwa katangga ka da ndzi apa kumba

²⁶An su na hara tə mjir ɗa ku ndzi ɓuɓushu ka yakata ka ndəndatədzi. Da ndzi apa su ptsəptsa akwa mtaku, kula duna apa kusar miraku, apa kusar na ptsa ka kəla ata kəra mbwa na ana ula akəmata tsa akəla.

²⁷Amma I asəndə shanga su na ata kəra ga, ləɓəlar nga ka səvəyir nga ka shanga su tə ga ana hara. I asəndə laku tə ɗəffa ga ku mbwi ata kəri.

²⁸Kamnyar tə ɗəffa ga ku mbwi ata kəri, ka kamnyar kər olkur tə ga kəgari, I ata hau anggilkərna akwa kucira ga, ka lanjamərna akwa mnya ga Antə I ata ngka ka ga ata laku tə ga ku si akwa.’ ”

²⁹Antə Ishaya pəla aka kuthli Hezekiya abbər, “Ngəni an seɗar su na ata sə hara. Məva ngəni, ga ata sə səm su na ptsə kula mda an thləka. Akwa məva na suɗkur ga ata səm dlawalər sur məva na təramta. Akwa məva na makərkur antə ga ata sə thləka ka thli, ka nci nfur anap, ka səm yar ɗa.

³⁰Antə mji na ku mbili akwa kutakəyir Yahuda ata sə ləkəma apa nfur anap natə nggilangari ku ləghəi saɓəl akwa di, tə nfu ni akwa ya munya.

³¹Kamnyar mji ata sə mbila akwa Urushalima ka akwa Gar Sihiyona, kamnyar MTHLAKU na ka duna an ata harari.”

³²“Antə nggədza su tə MTHLAKU pəla ata kəra kuthlir Assiriya, “ ‘Tsa aɗi ata si akwa Urushalima wa, wala shu afərni akwa bərni ni wa. Sojayeri arni na ka partau aɗi na ata si kudzəhə ka di ni, wala kalaktə ni ka kanggər ar ndlə katangga wa.

³³Laku tə tsa nuwa ka si, antə tsa ata ngka ata. Səlari aɗi ata ntsari bərni ni wa, I na MTHLAKU an pəla ngəni.

³⁴I ata mpamta kəra bərni ngəni kəi msərantə ni kamnyar səliyirna, ka kamnyar buɗarna Dauda.’ ”

³⁵Tsu vir nda aviri antə mdərthlentərhyel ar MTHLAKU ku mwari akwa vəi fəliyir mjir Assiriya ka tsəgəi sojayeri dəpu aru ka nciskumari ka ntəfu. Sakatə mambila mjir Assiriya ku thlatə səɓəla ɗəpari ɗəɗəpa təng da wutə mshiyir mji leɓleɓu.

³⁶Antə Sennakerib na kuthlir Assiriya ku tərɓəla ka hwi, ka ngka ahar Nineva.

³⁷Vir laga sakatə tsa akwa vəngkər səli akwa mbwar hyelərni Nisrok, antə maɗashilərni suɗa, Adrammelek ka Sharezer ku tsi ni ka katsakar, ka hwi mwari akwa tsəɗi Ararat. Antə Esarhaddon na ɓzərni ku ləkwa kuthlikur ata vəyari.