Read bura-pabir 2 Kuthlyayeri 2 Bible Online

2 Kuthlyayeri 2 - bura-pabir bible

2 Kuthlyayeri 2

¹Akwa sakatə MTHLAKU abaka kətə Iliya ka ləmtazi ka tsa akwa kəwal, Iliya ka Elisha ku thlata ahar Gilgal akwa lənggu.

²Antə Iliya pəla aka Elisha, “I akwa kiɗə nga kara ndzəndzi azi kamnyar MTHLAKU ku thlentə ra ahar Bethlel.” Amma Elisha pəla, “I kahyel akwa thləma MTHLAKU na ka mpika, ka apatə gə ka mpika abbər I aɗi ata zhar nu ngə wa.” Antə da ku təra ləghəi ahar Bethlel.

³Antə maɗa' makarantər naɓikur laga na akwa Bethlel ku mwari adzə Elisha ka pəla alari abbər, “Ga asənda abbər ashina MTHLAKU ata sə kətə mdərkəyir nga kazhar ngə ya?” Antə tsa shinau abbər, “I asənda, amma ndzi giri ɗiɗi ata kər.”

⁴Aghəla nda Iliya pəla aka Elisha abbər, “I ata kiɗə nga ka gə ɓəlta azi, kamnyar MTHLAKU ku thlentə ra ahar Yariko.” Amma Elisha pəla, “I kahyel akwa thləma MTHLAKU na ka mpika ka apatə gə ka mpika abbər, I aɗi ata zhar nu ngə wa.” Antə da ku təra mwari ahar Yariko.

⁵Antə maɗa' makarantər naɓikur laga na akwa Bethlel ku mwari adzə Elisha ka pəla alari abbər, “Ga asənda abbər ashina MTHLAKU ata sə kətə mdərkəyir nga kazhar ngə ya?” Antə tsa shinau abbər, “I asənda, amma ndzi giri ɗiɗi ata kər.”

⁶Antə Iliya pəla alari, “I akwa kiɗə nga Elisha ka gə ɓəlta azi kamnyar MTHLAKU ku thlentə ra akwa Jodan.” Amma Elisha pəla, “I ku kahyel akwa thləma MTHLAKU na ka mpika ka apatə gə ka mpika abbər, I aɗi ata zhar nu ngə wa.” Antə japwa ɗa ku təra.

⁷Naɓiyayeri laga ntəfkumari na akwa makarantər naɓikur akwa Yariko ku nu Iliya ka Elisha ka thləthlatə cijuwa akwa wul ɗa akwa mwari adzə Thlyagha Jodan.

⁸Antə Iliya ku fəi alkyabarni ka pərta ka tsa yimi kəgari antə yimi ni ku ndəkəudzi ka bwa suɗa. Antə japwa ɗa ku təramta ata vəi ul'ula.

⁹Sakatə da ku ləɓəla bwanda, antə Iliya ku pəla aka Elisha, “Man tə ga ata bara kəi hara ala ga akəmata mda akətə ra kazhar ngə ri?” Antə Elisha pəla, “Usa, dlar ra kəi wutə dunar mambələr nga kəi sə ndzi ata vəya ga.”

¹⁰Antə Iliya pəla, “Ga ku yu su na mwavər. Amma wala apani, ma ga ku wutə ra sakatə mda akwa kətə ra kazhar nga, ga ata wutə su tə gə kiɗə ni. Amma ma ga aɗi wutə ra wa, ga aɗi ata wutə ri wa.”

¹¹Antə sakatə da tsu akwa mwa ka gari, təkəma wagən ar u'u tə takwayeri ar u'u akwa ndəkərari ku si ka ndəkəmta daɓwa ɗa. Antə mdə ku kətə Iliya akwa shambar kəwal ka ləmtazi.

¹²Elisha ku wutə su ngəni ka kəga ka kuraku abbər, “Ai mdərkəyirna! Ai mdərkəyirna! Mdər mbul Israila, ga ku təra!” Aghəla tə Iliya ku təra antə Elisha ku thləhumta ləptərni ka bwa suɗa.

¹³Antə Elisha ku kəta alkyabar Iliya na ku pumtadzi ata di, ka ngka ata mnya Thlyagha Jodan.

¹⁴Antə tsa ku kəta alkyabar Iliya ka tsa yimi ni kəgari akwa pəla, “Ama MTHLAKU na Hyelər Iliya ri?” Sakatə tsa ku tsa yimi ni, antə yimi ni ku ndəkəudzi ka bwa suɗa, antə Elisha ku ləɓəla abwanda.

¹⁵Sakatə maɗa' makarantər naɓikur na ahar Yariko ni ku wuta abbər Elisha ku ləɓəla bwanda, antə da pəla, “Mambələr Iliya ku si ata kəra Elisha.” Antə da mwari adzə ni ka zuzuri ata di akəmari.

¹⁶Antə da pəla alari, “Kulini, nggədza yeru ɓəɓal ɓəɓal ntəfkumari azi, ndzi ka yeru mwari ra paka mdərkəyir nga. Nuhum Mambələr MTHLAKU ku kətə ni ka ləmta ka tsa ka ra psəmta ni ata kəra gar laga wala akwa mular laga.” Amma Elisha pəla, “Awa, giri aɗiya mwari wa.”

¹⁷Amma da ku ndzangkir alari tar tə tsa ku hir ala ɗa ka pəla, “To mwari giri.” Antə da ku mwari, da mji ntəfkumari, ka pakə ni ar vir makər, amma da aɗi wutə ni wa.

¹⁸Antə da ngka adzə ni ahar Yariko. Antə tsa pəla ala ɗa, “I aɗi pəla ala giri wa ya, abbər giri aɗiya mwari wa?”

¹⁹Mji laga akwa Yariko ku mwari adzə Elisha ka pəla alari, “Apatə ga asəndə zanuwa di ni tsa ɓɗaku ama yimərni aɗi ɓɗaku wa, tsa ana pumta hur.”

²⁰Antə tsa pəla, “Səntə giri ali kugwa bilən ka giri pu una akwa.” Antə da ku sənta alari.

²¹Antə tsa ku mwari akwa vəi kucirkila ka kuktuwa un' ni akwa, ka pəla, “Nggədza su tə MTHLAKU pəla, ‘I ku namtə yimi ngəni ni ndəlang. Antə tsa aɗi ata jaktə səntə mtə wala hara ka hur təri wa.’ ”

²²Antə yimi ni ku ndzi ndəlang har ba ashina apa su tə Elisha ku pəla.

²³Elisha ku zhar Yariko akwa mwari ahar Bethlel. Antə sakatə tsa ata laku, maɗashili laga ku səɓəla akwa kuta di akwa kumshi ni ka pəla, “Təra azi, tsuhu tsuhu kər ragai! Təra azi, tsuhu tsuhu kər ragai!”

²⁴Antə Elisha shinardzi ka zhwal ɗa ka shuwumta ɗa akwa thləma MTHLAKU. Antə mwankya mwaɓəlu suɗa ku səɓəla akwa kuɓər nfwa ka kukwahuwa mji nfwarkumari ka suɗa akwa nca ɗa.

²⁵Antə Elisha ku zhar vəi nda ka mwari ata Gar Karmel, ka sə ngka ahar Samariya.