Read bura-pabir 2 Kuthlyayeri 20 Bible Online

2 Kuthlyayeri 20 - bura-pabir bible

2 Kuthlyayeri 20

¹Akwa saka ndaga antə Hezekiya ku hara nggawa na mwavər tə tsa abaka mta. Antə naɓi Ishaya na ɓzər Amoz ku mwari adzə ni ka pəla alari, “MTHLAKU akwa pəla kara ɗəmhə kutakəyir nga kalkal kamnyar ga ata mta, ga aɗi ata thlata akwa nggawakur ngəni wa.”

²Antə Hezekiya ku shinar kəmari təbwar dza mbwa, ka hara adduwa aka MTHLAKU abbər,

³“I akwa kiɗə nga, MTHLAKU, kara ɗangta abbər I ku nu nga ka jirkur ka ɗəffi duku, ka hara su na kalkal kamnyar thləma ga.” Antə Hezekiya ku pthli tuwa ka duna.

⁴Amma akwabə Ishaya aləɓəla kazhar bəbalər kutakəi ni, MTHLAKU ku gari alari,

⁵ka tsa ra pəla aka Hezekiya na akwa pwar mjir MTHLAKU abbər, “I na MTHLAKU na Hyelər Dauda na baba' nga, I ku nggatə adduwar nga ka wutə shimwiyir nga. Antə I ata mbantə nga. Antə azi ka vir makər ga ata sə mwari akwa mbwar vəngkər səli aka MTHLAKU.

⁶Antə I ata jaka ala gə məva kumnya ntəfu. I ata mbuli nga, ka bərni Urushalima ngəni akwa tsiya kuthlir Assiriya. I ata mpamta kəra bərni ngəni kamnyar səliyirna ka kamnyar alkawal tə I hara aka buɗarna Dauda.”

⁷Antə Ishaya pəla aka buɗayeri ar Hezekiya abbər ka da dliri yar kamnda, ka da fadza aka mbəlkari ni, antə mbəlku ni ata kura.

⁸Antə Hezekiya yu Ishaya abbər, “Seɗa madi an ata ncanta abbər MTHLAKU ata mbantə ra, har kəi mzhi mwari akwa mbwar vəngkər səli aka MTHLAKU akwa vir na makərkur ri?”

⁹Antə Ishaya pəla, “Ngəni an seɗa natə MTHLAKU ata ncanta ala ga abbər tsa ata nghyantə alkawal arni: Ga ata bara ka shanggur ləbwakəma dzarsəl kuma, nənga ka tsa ngka ka bwahili dzarsəl kuma ri?”

¹⁰Antə Hezekiya shinau abbər, “Ai tsa su na kasəla ka shanggur ləkəma dzarsəl kuma, ta ka tsa ngka ka bwahili dzarsəl kuma.”

¹¹Apani naɓi Ishaya ku hara adduwa aka MTHLAKU, antə MTHLAKU ku ngka ka shanggur ni abwahili ndərar səl kuma, ka səghəi ata lakur ləmta ar Ahaz.

¹²Akwa saka ngəni Merodak Baladan na ɓzər Baladan na kuthlir Babila ku thlentə wakilayeri ka kakaɗu ka cauta aka Hezekiya, kamnyar tsa ku nggata abbər kuthli Hezekiya ku ɗar nggawakur.

¹³Hezekiya ku dlu wakilayeri ni ka ncanta ala ɗa shanga su na akwa mbwar gənarni: adzərfa, ka dinar, ka yaji, ka mal na ɓɗaku, ka kari mparni. Su aɗi na mbili akwa kəi kuthlikur wala akwa kuthlikur arni kula tsa ncanta ala ɗa wa.

¹⁴Antə naɓi Ishaya ku mwari adzə Kuthli Hezekiya ka yu ni abbər, “Mji ngəni thlata ama ri? Tsuwa man tə da sə barari ri?” Antə Hezekiya shinau, “Da thlatə ciju akwa tsəɗi Babila.”

¹⁵Ishaya jaktə yuwa abbər, “Man su tə da wuta akwa kəi kuthlikur ar ngə ri?” Hezekiya shinau abbər, “Da ku wutə shanga su. Su aɗi ama kula I ncanta ala ɗa akwa kuthlikur arna wa.”

¹⁶Antə Ishaya pəla aka Hezekiya, “MTHLAKU akwa pəla,

¹⁷Saka ata sə si natə shanga suayeri na akwa kəi kuthlikur ar nga ka shanga suayeri natə kəkayeri ar nga ku ɗuwari har ka sənta aka vir na ashina, mda ata sə famnyari ka mwanta ahar Babila. Su aɗi na ata mbili wa.

¹⁸Bwadukwa kəkayeri ar nga mda ata sə fatə ɗa ka təra ka da. Da ata sə ndzi kulaɓayeri na ata hara kəthlər akwa kəi kuthlikur ar Babila.”

¹⁹Hezekiya pəla aka Ishaya abbər, “Su tə MTHLAKU pəla ni ɓɗaku.” Kamnyar Hezekiya ku dzama abbər, “Ma ku ndzi abbər mda ata wutə ndzəndziyir lapiyakur ka msərakur akwa sakarna, ai suma aɗi wa.”

²⁰Shanga kəthlərayeri tə Hezekiya ku hara, suayeri tə tsa hara ka duna, ka laku tə tsa latə vəi kəsi yimi, ka ntuli lakur səntə yimi akwa bərni ni, mdə ku rəbutə ɗa akwa Kakaɗər Labar ar Kuthlyayeri ar Yahuda.

²¹Hezekiya ku mti, antə Manasse na ɓzərni ku ləkwa kuthlikur ata vəyari.