Read bura-pabir 2 Kuthlyayeri 21 Bible Online

2 Kuthlyayeri 21 - bura-pabir bible

2 Kuthlyayeri 21

¹Manasse ka məvari kumnya suɗa ka yarni sakatə tsa baɗitə hara kuthlikur. Antə tsa ku hara kuthlikur ar məva ntəfkumari ka ntəfu akwa Urushalima. Thləma mama'ni an Hefziba.

²Manasse ku hara su na ɗimi ata nca MTHLAKU atar hara sur cika natə durayeri tə MTHLAKU kədləɓəla akəma mjir Israila ni ku hara.

³Kamnyar Manasse ku həntə vəi vəngkər səli aka haptayeri natə baba'ni Hezekiya ku pukthləmta. Tsuwa tsa ku həntə bagaɗiyayeri ar hamta saɗaka aka haptu Baal, ka namtə haptər Ashera tsu apatə Ahab na kuthlir Israila ku hara, ka vəngkər səli aka sasəlkayeri na amtazi, ka hara mafakur ala ɗa.

⁴Tsuwa tsa ku həntə bagaɗiyayeri ar hamta saɗaka aka haptu akwa mbwar MTHLAKU, vəi tə MTHLAKU pəla abbər anda akwa Urushalima antə mji ata vəngkər səli alari.

⁵Tsuwa tsa ku həntə bagaɗiyayeri akwa bəbalayeri suɗa ar mbwar vəngkər səli aka MTHLAKU kamnyar vəngkər səli aka dlamar sasəlkayeri na amtazi.

⁶Tsa ku mbamta ɓzərni apa saɗaka, ka hara hakdzi, ka ɗeaghakur, ka tsadi, ka paktə kər ka ɗeaghayeri ka tsuwa mjir hara mutukur. Tsa ku hara suayeri na ɗimi ɗimi hang, na vu har tə ɗəffa MTHLAKU ku ɓzi ka duna.

⁷Antə Manasse ku vəi haptu Ashera natə tsa namtə ni akwa mbwa natə MTHLAKU pəla aka Dauda ka aka ɓzərni Solaman abbər, “Akwa mbwa ngəni, ka tsuwa akwa Urushalima, natə I carɓəla akwa shanga nyarmbwayeri ar Israila ni, antə mda ata sə vəngkər səli ali ba saka madi.

⁸Tsuwa ma har mjir Israila ata vədzə hangkala ɗa ka ɓəlatə shanga tsawayeri tə I hamta ala ɗa, tsawayeri tə I hamta ala ɗa atar buɗarna Musa ni, to, I aɗi ata zhari ka mdə jaktə kədləɓəla ɗa kazhar tsəɗi tə I hamta aka kəkayeri arɗa wa.”

⁹Amma mjir Yahuda aɗi psi thləma ɗa wa. Antə Manasse ku ndəkərwa ɗa akwa hara ɗimikur, har tə da ku hara ɗimikur na təramta ar durayeri tə MTHLAKU kədləɓəla akəmata mjir Israila asəkwa tsəɗi ni.

¹⁰Antə MTHLAKU ku gari atar buɗayeri arni na naɓiyayeri abbər,

¹¹“Kamnyar Manasse na kuthlir Yahuda ku hara suayeri ar cika, suayeri na ɗimi ɗimi na ku təramta shanga su tə mjir Amor na ku ndzəndzi akəmata tsa ku hara. Tsa ku vu mjir Yahuda akwa hara biku atar haptayeri arni.

¹²Kamnyar ngəni, I na MTHLAKU na Hyelər Israila, I ata sənta asar na mwavər ata kəra Urushalima ka Yahuda, bwani natə kəlara mdə na ku nggatə su ata kər ata sə yakata.

¹³Antə I ata ɗi Urushalima tsu apa su tə I ku ɗi Samariya, ka ɗi kutakəyir Ahab. I ata tsarɓəla kuta Urushalima ka tsa ndzi cau apatə mda ana fufuləmta paranti kutari ka hilari, ka mbumbwi ni.

¹⁴I ata kədləmta mjirna na ku mbili, kəi hamta ɗa akwa tsiya dawayeri arɗa na ata sə dlərəmta ɗa ka famnya kariyayeri arɗa.

¹⁵I ata hara ngəni ala ɗa kamnyar tə da ku hara su na ɗimi ali ka ɓzamtə ɗəffi, baɗitə tsu akwa sakatə kəkayeri arɗa ku səɓəla kazhar Masar, har ka sənta aka vir na ashina.”

¹⁶Manasse ku hara biku atar vu mjir Yahuda tə da ku hara su na ɗimi aka MTHLAKU. Tsuwa Manasse ku kurəmta mji hang na kula biku natə mamshir ɗa ku nghyantə lakwayeri na akwa Urushalima.

¹⁷Tsuwa mdə ku rəbutə mambila kəthlərayeri tə Manasse ku hara, ka shanga suayeri tə tsa hara, kəga bikayeri tə tsa hara, akwa Kakaɗər Labar Kuthlyayeri ar Yahuda. Shanga suayeri natə Manasse ku hara kəga bikərni, mdə ku rəbutə ɗa akwa Kakaɗər Labar ar Kuthlyayeri ar Yahuda.

¹⁸Manasse ku mti, antə mdə ku harəmta ni akwa fakər səkwar na akwa kutakəyirni, akwa fakər səkwar ar Uzza. Antə Ammon na ɓzərni ku ləkwa kuthlikur ata vəyari.

¹⁹Ammon ka məvari sərkumari ka suɗa ka yarni sakatə tsa baɗitə hara kuthlikur. Antə tsa ku hara kuthlikur ar məva suɗa akwa Urushalima. Thləma mama'ni an Meshullemeth, ngkwar Haruz na ahar Yotba.

²⁰Tsa ku hara su na ɗimi aka MTHLAKU tsu apatə baba'ni Manasse ku hara.

²¹Tsa ku hara su tə baba'ni ku hara, ka vəngkər səli aka haptayeri natə baba'ni ku vəngkər səli ala ɗa.

²²Tsa ku nggəlar MTHLAKU na Hyelər kəkayeri arni, tə tsa aɗi kələngkər aka MTHLAKU wa.

²³Antə kwakunayeri ar Kuthli Ammon ku pəli mnya ata kərari ka tsi ni akwa kutakəyirni.

²⁴Amma mjir Yahuda ku tsəgəi shanga mji na pəli mnya ata kəra Ammon ni, ka vəi Yosiya na ɓzər kuthli ni ata vəyari.

²⁵Shanga suayeri natə Ammon ku hara, mdə ku rəbutə ɗa akwa Kakaɗər Labar ar Kuthlyayeri ar Yahuda.

²⁶Mdə ku harəmta Ammon akwa kulərni akwa fakər səkwar ar Uzza.Antə Yosiya na ɓzərni ku ləkwa kuthlikur ata vəyari.