Read bura-pabir 2 Kuthlyayeri 22 Bible Online

2 Kuthlyayeri 22 - bura-pabir bible

2 Kuthlyayeri 22

¹Yosiya ka məvari ncisu ka yarni sakatə tsa ləkwa kuthlikur. Antə tsa hara kuthlikur ar məva makkumari ka ntang akwa Urushalima. Thləma mama'ni an Yedida, ngkwar Adaiya na mdər Bozkath.

²Yosiya ku hara su na kalkal ata nca MTHLAKU, ka nu shanga surharar Dauda na kəkarni. Tsa aɗi pəramta abwa mazəm wala abwa matsəkar wa.

³Akwa məva na kumnya nciskur ar Kuthli Yosiya, antə tsa na kuthli ni ku thlentə Shafan na ɓzər Azaliya, kəkar Meshullam, na sakatari ka tsa mwari akwa mbwar vəngkər səli aka MTHLAKU. Tsa pəla alari,

⁴“Mwari adzə Hilkiya prist na ola, kara pəla alari ka tsa jikatə kwaba natə mjir gadi nyarmbwa ku tsapta akəla mji akwa mbwar vəngkər səli aka MTHLAKU.

⁵Pəla alari ka tsa hamta akwa tsiya mjir wul kəthlər ni ka da ntə mji na akwa nam mbwar vəngkər səli aka MTHLAKU. Da ata ntə

⁶kapəntayeri, ka mjir tsa mbwa, ka mjir həna, ka tsuwa kamnyar masə katako ka pela marmara ar nam mbwa ni.

⁷Mjir wul kəthlər ni da ka jirkur, antə mda aɗi ata tur ka da ngkərɓəla su tə da hara ka kwaba natə mdə pu tsiya ɗa ni wa.”

⁸Antə Hilkiya na prist na ola ku pəla aka Shafan na sakatari abbər, “I ku paktə Kakaɗər Tsawa akwa mbwar vəngkər səli aka MTHLAKU.” Antə Hilkiya ku hamta kakaɗə ni aka Shafan, antə tsa ku karatari.

⁹Antə Shafan na sakatari ku si adzə kuthli, ka pəla alari abbər, “Buɗayeri ar nga ku fwaɓəla kwaba natə mdə ku wuta akwa mbwa ni, ka hamta akwa tsiya mjir wul kəthlər ar mbwar vəngkər səli aka MTHLAKU.”

¹⁰Tsuwa Shafan ku pəla aka kuthli abbər, “Hilkiya na prist ku na ali kakaɗu.” Antə tsa ku karatə kakaɗə ni ka kuraku aka kuthli.

¹¹Sakatə Yosiya ku nggatə ndərayeri na akwa Kakaɗər Tsawu ni, tsa ku kukwahəmta ləptərni kamnyar thlivəra ka ɗəffə ɓzəɓza.

¹²Antə kuthli ni tsawa aka Hilkiya na prist ka Ahikam na ɓzər Shafan, ka Akbor na ɓzər Mikaya, ka Shafan na sakatari, ka Asaya na buɗar kuthli abbər,

¹³“Mwar giri, ka giri ra yuɓəla akəla MTHLAKU, ali ka aka shanga mjir Yahuda, ata kəra ndərayeri na akwa kakaɗə ngəni tə mdə wutə ni. Kamnyar ɗəffa MTHLAKU ku ɓzi ka duna ata kəra mburu, kamnyar tə kəkayeri ar mburu aɗi kələngkər aka ndərayeri na akwa kakaɗə ngəni wa, da aɗi nu suayeri ni kalkal apatə mdə ku rəbuta ata kəra mburu wa.”

¹⁴Antə Hilkiya na prist, ka Ahikam, ka Akbor, ka Shafan, ka Asaya, ku mwari ka gari aka Hulda na naɓi mwala, mwalar Shallum na ɓzər Tikva, kəkar Harhas na ata kəra kari hata na akwa mbwar vəngkər səli aka MTHLAKU. Tsa ku ndzi akwa Urushalima akwa zara na suɗkur. Antə da ku ngkərɓəla alari su na ku hara.

¹⁵Antə mwala ni pəla ala ɗa, “Nggədza su tə MTHLAKU na Hyelər Israila pəla aka mdə na thlentə giri adzə ra ni.

¹⁶Nggədza su tə MTHLAKU pəla, ‘Jiri I ata sənta asar ata kəra tsəɗi ngəni, ka ata kəra mji na akwa, shanga su tə mdə ku rəbuta akwa kakaɗu tə mdə karata aka kuthlir Yahuda ni.

¹⁷Kamnyar mjir Yahuda ku fwari ata kəri ka hamta saɗaka aka haptayeri. Antə apani da ku ɓzamtə ɗəffi ka duna, atar shanga suayeri tə da nam ka tsiya ɗa. Antə hangkali ku thlatə bwarbwar ata kəra tsəɗi ngəni, antə sur mtathliyari aɗi wa!’ ”

¹⁸Amma aka kuthlir Yahuda na thlentə giri abbər ka giri sə yuɓəla alari su akəla MTHLAKU ni, ka giri pəla alari su tə MTHLAKU na Hyelər Israila pəla ata kəra ndərayeri tə giri nggatə ni abbər,

¹⁹“Təng tə gə ka ɗəffər tubi ni, har tə ga ku tərghəi kəra ga akəmi sakatə gə nggatə su tə I pəla ata kəra bərni ngəni ka mji na akwa ni, abbər tsa ata ndzi fya ka su hilhila, antə ga ku thləhumta ləptər nga, ka tuwa ka shimwi akəmi. Antə I ma tsuwa I ku nggatə nga.

²⁰I ata vu ka gə mta, ka mdə harəmta nga akwa msərakur akwa kula adzə kəkayeri ar nga. Antə ga aɗi ata wutə shanga asarayeri tə I ata səntari akwa tsəɗi ni ka nca gə wa.” Antə da ngka ka labar ni aka kuthli.