Read bura-pabir 2 Kuthlyayeri 23 Bible Online

2 Kuthlyayeri 23 - bura-pabir bible

2 Kuthlyayeri 23

¹Antə Kuthli Yosiya hamta tsawa abbər ka shanga mji na ol'olər Yahuda ka na akwa Urushalima tsaptədzi adzə ni.

²Antə kuthli ni ku ləmta akwa mbwar MTHLAKU ata kəma duku kəga shanga mjir Yahuda, ka mji na akwa bərni Urushalima, ka pristayeri, ka naɓiyayeri, ka shanga mji na ol'ola kəga maɗankyar. Antə kuthli ku karata ala ɗa shanga su na akwa Kakaɗər Alkawal tə mdə wuta akwa mbwar MTHLAKU ni.

³Aghəla tə kuthli ni ku kuri karatə ni antə tsa thləthlata adzə zhimbwal ni, ka hara alkawal aka MTHLAKU abbər tsa ata nu MTHLAKU, ka ɓəlatə tsawayeri ka suayeri tə tsa thlamta abbər ka mdə hara, ka ɗəffari shang, akwa shanga ndzəndziyir mpikari. Tsuwa tsa ata ɓəlatə shanga ndərayeri ar alkawal tə mdə ku rəbuta akwa kakaɗə ni. Antə shanga mji ku paktə kər akwa alkawal ni tsuwa.

⁴Antə Yosiya ku pəla aka Hilkiya prist na ola, ka pristayeri na akwa nu ni akwa olkur, ka mjir gadi nyarmbwa ka da fwaɓəla shanga sur vəngkər səli aka Baal, ka Ashera, ka thliya ka pci ka sasəlkayeri kazhar mbwar vəngkər səli aka MTHLAKU. Antə kuthli ni ku ra mbamta ɗa aɓəla kazhar kuta Urushalima, akwa Mular Kidron ka mwantə pənjuwari ahar Bethlel.

⁵Antə tsa fəgəi pristayeri ar haptu, natə kuthlyayeri ar Yahuda ku pwi ɗa kamnyar hamta saɗaka akwa mashiɗayeri na akwa kauyayeri ar Yahuda ka vəyayeri na kalaktə Urushalima. Pristayeri ni tsuwa ku hamta saɗaka aka Baal, ka pci, ka thliya, ka sasəlkayeri.

⁶Tə tsa ku kəɓəla Ashera na haptu kazhar mbwar vəngkər səli aka MTHLAKU ka kəɓəla kazhar kuta Urushalima ka mwanta akwa Mular Kidron ka mbamta anda. Tsa ku hadləmta Ashera apa bərbər, ka titiləmta bərbərari akwa vəi kulər mji gapani.

⁷Kuthli ni ku huzamta mbwayeri natə shili ana hara karwakur akwa, na akwa kuta vəi mbwar vəngkər səli aka MTHLAKU. Tsuwa anda antə mwanki ana tsa ləptər vəngkər səli aka Ashera.

⁸Yosiya ku kəgaɓəla shanga pristayeri na akwa bərniyayeri ar Yahuda ka da tsaptədzi ahar Urushalima. Tsa higəlantə shanga bagaɗiyayeri natə pristayeri ana hamta saɗaka ata kər, baɗita ahar Geba ka mwanta aka Beyersheba. Tsa ku huzamta mashiɗayeri na akwa lakur ləvəi akwa nyarfur Joshuwa, ajiyar Urushalima.

⁹Wala tə pristayeri ar mashiɗayeri aɗi ana hamta saɗaka ata bagaɗi aka MTHLAKU akwa Urushalima wa, da ku səm susəma na kula yist kəga pristayeri nvwa ɗa.

¹⁰Yosiya ku higəlantə Tofeth vəi vəngkər səli aka haptu na akwa mular Hinnom, natə mda aɗiya jaktə mbamta ɓzərni wala ngkwarni apa saɗaka mbamba aka hyel Molek kəra wa.

¹¹Antə tsa ku fagamta takwayeri natə kuthlyayeri ar Yahuda ku hamta aka pci na anyarmbwar ləkwa mbwar vəngkər səli aka MTHLAKU, na kudzəhə ka bəbal natə Nathlan Melek, mdər kəthlər na ola ka ndzi akwa. Antə Yosiya ku mbamta wagənayeri ar pci ka u'u.

¹²Antə Yosiya huzamta ka ɓəgələmta bagaɗiyayeri ar hamta saɗaka natə kuthlyayeri ar Yahuda ku lata ata kəra mbwar Ahaz na amta, ka bagaɗiyayeri ar hamta saɗaka natə Manasse ku lata akwa bəbalayeri ar mbwar vəngkər səli aka MTHLAKU, ka pumta ɗa akwa Mular Kidron.

¹³Yosiya ku higəlantə mashiɗayeri na təbwar raghəi ka Urushalima, na təbwar anəm ka Garər ɗimikur natə Solaman na kuthlir Israila ku lata aka Ashtaroth na haptər mjir Sidon, ka Kemosh na haptər Mowab, ka Milkom na haptər mjir Ammon.

¹⁴Tsa ku ɓəgələmta zhimbwalayeri ka tadərəmta Ashera na haptu, ka shiktə vəyayeri ka ɗethlayeri ar mji.

¹⁵Tsuwa Yosiya ku huzamta mashiɗayeri na ahar Bethlel, natə kuthli Yerobowam na ɓzər Nebat ku lata, mdə na vu mjir Israila akwa hara biku. Yosiya ku ndlamta bagaɗi ka cikthləmta pelayerari raka raka, ka hadləmta ɗa apa bərbər. Tsuwa tsa ku mbamta haptu Ashera.

¹⁶Sakatə Yosiya ku shinardzi ka wutə kulayeri ata gar, antə tsa thlentə ka mdə səntə ɗethlayeri na akwa kulayeri ni. Antə tsa mbamta ɗa ata kəra bagaɗi ni ka hilantə ɗa tsu apa su tə naɓiyir MTHLAKU ku pəla.

¹⁷Antə Yosiya yu abbər, “Kulər wa natə I akwa wulari anda nə ri?” Antə mjir Bethlel shinau alari, “Kulər naɓi na thlata akwa Yahuda na pəla su waci ata kəra suayeri ngəni natə ga ku hara aka bagaɗi Bethlel ni.”

¹⁸Antə Kuthli Yosiya pəla, “Zhar giri ni apatə tsa aɗi, mda aɗiya tsəkwar ɗethlayeri arni wa.” Apani antə da ku zhar ɗethlayeri arni ka ɗethlayeri ar naɓi na səɓəla akwa Samariya ni.

¹⁹Tsu apatə tsa ku hara ahar Bethlel, antə Kuthli Yosiya ku huzamta shanga mashiɗayeri ar haptu natə kuthlyayeri ar Israila ku lata akwa bərniyayeri ar Samariya na ku ɓzamtə ɗəffa MTHLAKU. Tsa ku hara aka shanga bagaɗiyayeri ar hamta saɗaka tsu apatə tsa ku hara aka na akwa Bethlel.

²⁰Antə Yosiya ku tsəgəi shanga pristayeri ar haptu ata kəra bagaɗiyayeri ka mbamta ɗethlər ɗa ata kəra bagaɗiyayeri ni. Aghəla nda antə tsa ku ngka ahar Urushalima.

²¹Antə Kuthli Yosiya ku tsawa aka shanga mji abbər, “Hara giri kucalər Fəlɓəla Kəi aka MTHLAKU na Hyelər giri apa su na ku rəbutədzi akwa Kakaɗər Alkawal ni.”

²²Mda aɗi ɗar hara Kucalər Fəlɓəla Kəi apani wa, wala akwa sakar alkaliyayeri na ku hara kuthlikur ata kəra Israila, wala akwa sakar kuthlyayeri ar Israila, wala akwa sakar kuthlyayeri ar Yahuda.

²³Amma mdə ku hara Kucalər Fəlɓəla Kəi ngəni aka MTHLAKU akwa Urushalima akwa məva na kumnya nciskur ar Kuthli Yosiya.

²⁴Yosiya ku ləkəma ka famta mjir hakdzi, ka mjir mutukur, ka mjir haptu, ka shanga sur cika na akwa tsəɗiyir Yahuda ka Urushalima. Tsa hara apani atar kələngkər aka tsawayeri na akwa kakaɗu natə Hilkiya na prist ku wuta akwa mbwar vəngkər səli aka MTHLAKU ni.

²⁵Mda aɗi ɗar wutə kuthli apa Yosiya, akəmata tsa wala aghəlari na ku nu MTHLAKU ka ɗəffari shang ka hangkalari shang, ka dunar shang, ka kələngkər aka tsawur Musa wa.

²⁶Wala apani ɗəffa MTHLAKU ku ndzi tsu bwarbwar ata kəra mjir Yahuda kamnyar shanga sur ɗimikur natə Manasse ku hara ku thlentə hangkalari.

²⁷Antə MTHLAKU pəla, “I ata nggəlar mjir Yahuda tsu apatə I ku nggəlar mjir Israila. Antə I ata nggəlar Urushalima bərni natə I ku carɓəla, ka mbwa natə I ku pəla abbər, ‘Mda ata sə vəngkər səli ali anda.’ ”

²⁸Shanga suayeri natə Yosiya ku hara, mdə ku rəbutə ɗa akwa Kakaɗər Labar ar Kuthlyayeri ar Yahuda.

²⁹Akwa sakar Kuthli Yosiya, antə Neko na kuthlir Masar ku ləɓəla kamnyar dlar kuthlir Assiriya akwa Thlyagha Yufiretis. Antə Kuthli Yosiya ku ləɓəla kamnyar ka da kəɓa ka Neko. Amma akwa kəɓar ɗa antə Neko ku tsi Yosiya ahar Megiddo.

³⁰Antə buɗayeri arni ku kətə mshiyirni akwa wagənər taku ahar Megiddo ka sənta akwa Urushalima ka harəmta ni akwa kulərni. Antə mjir Yahuda ku kətə Yehowahaz na ɓzər Yosiya, ka bartə kərari, ka vəi ni kuthli ata baba'ni.

³¹Yehowahaz ka məvari sərkumari ka makər ka yarni sakatə tsa baɗitə hara kuthlikur, antə tsa hara kuthlikur akwa Urushalima ar thliya makər. Thləma mama'ni an Hamutal ngkwar Irmiya na ahar Libna.

³²Antə tsa ku hara su na ɗimi aka MTHLAKU tsu apatə kəkayeri arni ku hara.

³³Antə Kuthli Neko vu ni akwa pərsəna ahar Ribla akwa tsəɗiyir Hamath, kamnyar ta tsa ahara kuthlikur akwa Urushalima. Antə tsa vəngkər ntə tsəma ar adzərfa talent aru pal ka tsuwa ar dinar talent pal.

³⁴Antə Kuthli Neko vətə Eliyakim na ɓzər Yosiya kuthli ata vəya baba'ni Yosiya, ka pali alari thləmari tə ndzi Yehoyakim. Antə Neko kələmta Yehowahaz ka mwantə ni ahar Masar, antə tsa ku mti anda.

³⁵Antə Yehoyakim ku ntəmta aka Kuthli Neko adzərfa ka dinar natə tsa ku bara akəlari. Yehoyakim ku vəngkər tsəma aka kəlara mdə na akwa tsəɗi ni ka tsa nta adzərfa ka dinar kalkal apatə tsa ku thlamta alari, kamnyar ka tsa hamta aka Kuthli Neko.

³⁶Yehoyakim ka məvari sərkumari ka ntəfu sakatə tsa ku baɗitə hara kuthlikur. Antə tsa hara kuthlikur ar məva kumkantang akwa Urushalima. Thləma mama'ni an Zebida na ngkwar Pedaiya ahar Ruma.

³⁷Amma Yehoyakim ku hara su na ɗimi ata nca MTHLAKU, tsu apatə kəkayeri arni ku hara.