Read bura-pabir 2 Kuthlyayeri 24 Bible Online

2 Kuthlyayeri 24 - bura-pabir bible

2 Kuthlyayeri 24

¹Akwa sakar kuthlikur ar Yehoyakim, antə Nebukadnezzar na kuthlir Babila ku si ka dlər Yahuda. Antə Yehoyakim ku ndzi akirari ar məva makər. Aghəla nda antə tsa ku hara kər ɓəɓalkur aka Nebukadnezzar.

²Antə MTHLAKU ku thlentə dlamar sojayeri ar Babila, ka Siriya, ka Mowab, ka ar Ammon, ka da ra kurəmta mjir Yahuda apa su tə MTHLAKU pəla atar buɗayeri arni na naɓiyayeri.

³Asar nayeri ni ku hara aka Yahuda atar tsawur MTHLAKU. Tsa ku kwamta ka tsa kədləmta mjir Yahuda kazhar kəmari, kamnyar bikayeri natə Manasse ku hara

⁴Tsuwa tsa ku pumta mamshir mji na kula biku, ka nghyantə kuta Urushalima ka mamshir ɗa antə MTHLAKU aɗi ata tifəmtari wa.

⁵Mambila kəthlərayeri ar Yehoyakim, ka shanga su tə tsa hara, mdə ku rəbutə ɗa akwa Kakaɗər Labar na Məva Məva ar Kuthlyayeri ar Yahuda.

⁶Apani Yehoyakim ku mti, ka ngka adzə kəkayeri arni. Antə ɓzərni Yehoyacin ku dlu tsiyari, ka ndzi kuthli.

⁷Kuthlir Masar aɗi jaktə səɓəla kazhar tsəɗiyirni kəra wa, kamnyar tə kuthlir Babila ku dlutsə shanga tsəɗi Masar baɗita akwa Zərkəu Masar ka mwanta adzə Thlyagha Yufiretis.

⁸Yehoyacin ka məvari kumnya ncisu sakatə tsa baɗitə hara kuthlikur akwa Yahuda. Antə tsa ku hara kuthlikur ar məva makər akwa Urushalima. Thləma mama'ni an Nehushta na ngkwar Elnathlan ahar Urushalima.

⁹Amma Yehoyacin ku hara su na ɗimi ata nca MTHLAKU, tsu apatə baba'ni Yehoyakim ku hara.

¹⁰Akwa saka na ndaga, sojayeri ar Nebukadnezzar na kuthlir Babila ku mwari ra dlər Urushalima ka kalaktə di ni.

¹¹Akwa sakatə sojayeri arni ku kalaktə di ni, antə Nebukadnezzar ku si.

¹²Antə Yehoyacin na kuthlir Yahuda ka mama'ni, kəga buɗayeri, ka sojayeri, ka kwakunayeri arni ku hamta kərɗa akwa tsiya kuthlir Babila. Su nayeri ni ku hara akwa məva na nciskur ar Kuthli Nebukadnezzar.

¹³Nebukadnezzar ku famnya shanga gəna na akwa mbwar vəngkər səli aka MTHLAKU, ka na akwa kutakəyir kuthlikur. Tsuwa sojayeri ar Nebukadnezzar ku ɓəgələmta shanga kari dinar na akwa mbwar vəngkər səli aka MTHLAKU, natə Solaman na kuthlir Israila ku namta, apatə MTHLAKU ku pəla.

¹⁴Nebukadnezzar ku fatə mjir Urushalima dəpu kuma ka təra ka da. Da an shanga kwakunayeri, ka shanga sojayeri, ka shanga mjir kəthlər ar tsi ka mjir ɓdla. Mda aɗi mbili wa, tar mji na turturari ta shang akwa tsəɗi ni.

¹⁵Nebukadnezzar ku fatə Yehoyacin ka mama'ni ka mwankirni, ka kwakunayeri arni ka mji ol'ola na akwa Yahuda ka mwantə ɗa ahar Babila.

¹⁶Nebukadnezzar ku fatə sojayeri dəpu murfa, ka mjir kəthlər ar tsi dəpu pal, ka mji natə da ata mzhi kəthlər akwa mpa ka səntə ɗa ahar Babila.

¹⁷Antə Nebukadnezzar ku vəi Mattaniya ɓzərma' baba' Yehoyacin tə tsa ndzi kuthli ata vəya Yehoyacin, ka pali thləmari tə ndzi Zedekiya.

¹⁸Zedekiya ka məvari sərkumari ka ntang ka yarni sakatə tsa baɗitə ndzi kuthli, antə tsa ku hara kuthlikur ar məva kumkantang akwa Urushalima. Thləma mama'ni an Hamutal na ngkwar Irmiya ahar Libna.

¹⁹Amma Zedekiya ku hara su na ɗimi ata nca MTHLAKU, tsu apatə Yehoyakim ku hara.

²⁰Kamnyar tə ɗəffa MTHLAKU ku ɓzi ka duna adza mjir Urushalima ka Yahuda antə tsa ku kədləmta ɗa kazhar kəmari.