Read bura-pabir 2 Kuthlyayeri 25 Bible Online

2 Kuthlyayeri 25 - bura-pabir bible

2 Kuthlyayeri 25

¹Akwa vira thliya kuma ar thliya kumər mjir Yahudi, məva na əmdləkur antə Nebukadnezzar na kuthlir Babila ku səɓəla ka shanga sojayeri arni ka mpa Urushalima. Da fəli ata hildi, ka kalaktə ni, ka həntə bagaɗi ɗuwardzi.

²Da kalaktə bərni ni ka sojayeri har ka mwanta aka məva na kumkantangkur ar kuthli Zedekiya.

³Akwa vira thliya əmdla ar thliya na nfwar, antə mi ku hara mwavər ka duna akwa kuta bərni ni, antə susəma ku kuri akwa Urushalima.

⁴Sakatə sojayeri ar Babila ku ɓələmta katanggar bərni ni. Antə tsu aviri vir nda Zedekiya kəga sojayeri arni ku hwi ləɓəla akwa nyarfu na akwa daɓwa katangga suɗa, na kudzəhə ka fakər kuthli ka təra. Da nu atar lakur Araba.

⁵Amma sojayeri ar Babila ku pungkirdzi aka Zedekiya ka ngkəi ni akwa bəbalər Yariko. Antə shanga sojayeri arni ku titil kazhar ni.

⁶Antə da mwantə Zedekiya aka kuthlir Babila ahar Ribla, vəi tə mdə ku thlamta shariya ata kərari.

⁷Da ku tsəgəi maɗashilərni ata ncari, ka fwaɓəla nca Zedekiya ka mbwahə ni ka məsəsal ka mwantə ni ahar Babila.

⁸Akwa vira thliya murfa ar thliya na ntəfu ar məva na kumnya əmdləkur ar Nebukadnezzar kuthlir Babila, antə Nebuzaradan na olər mjir gadi ka kwakunar kuthlir Babila ku ləkwa Urushalima.

⁹Antə Nebuzaradan mbamta mbwar vəngkər səli aka MTHLAKU, ka kəi kuthlikur, ka shanga kəyayeri na akwa Urushalima. Kəlara kəi na ɓɗaku akwa Urushalima tsa ku mbamta.

¹⁰Antə olər mjir gadi ka shang sojayeri ar Babila ku ndlamta katanggayeri na kalaktə Urushalima.

¹¹Nebuzaradan fatə mambila mji na akwa bərni ni ka mji na ku ngka adzə kuthlir Babila, ka mwantə ɗa ahar Babila.

¹²Amma tsa ku zhar mjir tura ar tsəɗi ni ka da wul fakayeri ar anap, ka tsuhu fakayeri arɗa.

¹³Antə mjir Babila ku ɓəgələmta zhimbwalayeri ar əmza tə da ndzi raka raka, ka amalangkeyayeri ka gəlam ar əmza na akwa mbwar vəngkər səli aka MTHLAKU, ka fatə əmza ni ka mwanta ahar Babila.

¹⁴Antə da fatə hahəyeri ar pənju, ka tebərayeri ar fa su, ka sur pa lagwani, ka tasayeri, ka shanga suayeri ar əmza tə mda ana hara kəthlər kəgari akwa mbwar vəngkər səli aka MTHLAKU.

¹⁵Nebuzaradan ku vu sojayeri arni tə da fatə shanga su tə mdə ku hara ka dinar wala ka adzərfa apa tasayeri ar mba vina, ka tasa na ol'ola, ka təra ka da.

¹⁶Mda aɗi mzhi ngkərtə kəgəɓkur ar əmza ar zhimbwalayeri suɗa, gəlam yimi pal, ka amalangkeyayeri natə Solaman ku namta akwa mbwar vəngkər səli aka MTHLAKU ni wa.

¹⁷Nalkur kəlara zhimbwal ku hara dzartsi kumnya ncisu, ka kuɓashir əmza natə nalkurari dzartsi makər ata kəra kəlara zhimbwal. Mdə ku dəɓata kuɓashayeri ni japu ka yar rumman ar əmza.

¹⁸Aghəla ngəni Nebuzaradan ku fatə Seraiya prist na ola, ka Zafaniya na mdər dlarərni, ka mji ol'ola makər ar mbwar vəngkər səli.

¹⁹Akwa kuta bərni tsa fatə olər sojayeri, ka mjir sauri ntəfu ar kuthli, ka sakatari ar olər sojayeri, tsa an mdə na ana fa sojayeri, ka sojayeri ngkwakumari natə mdə karəngkər akwa bərni ni.

²⁰Nebuzaradan ku fatə ɗa shang ka səntə ɗa aka kuthlir Babila ahar Ribla.

²¹Antə kuthlir Babila ku tsəgəi ɗa ahar Ribla akwa tsəɗi Hamath. Apani antə mdə ku fatə shanga mjir Yahuda kazhar tsəɗiyir ɗa ka mwantə ɗa apa mafayeri akwa tsəɗi damwa.

²²Nebukadnezzar ku vəi Gedaliya na ɓzər Ahikam, kəkar Shafan ata kəra mji na ku mbili akwa tsəɗi Yahuda.

²³Sakatə mji ol'ola ar sojayeri ka sojayeri arɗa ku nggata abbər kuthlir Babila ku vəi Gedaliya ka tsa ndzi ajiya, antə da ku si ata kəma duku kəga mjir ɗa adzə Gedaliya ahar Mizpa. Thləma da an Ishmayel na ɓzər Nethlaniya, Yahwanan na ɓzər Kareya, Seraiya na ɓzər Tanhumeth na mdər Netofa ka Yaazaniya na mdər Maaka.

²⁴Antə Gedaliya ku pəla ala ɗa abbər, “Giri aɗiya thlivəra kwakunayeri ar Babila wa, ndzəndzi giri akwa tsəɗi ni, ka giri kələngkər aka kuthlir Babila. Antə shanga su ata mwa ala giri lapiya.”

²⁵Amma akwa thliya na murfəkur ar məva na ndaga, antə Ishmayel na ɓzər Nethlaniya, kəkar Elishama, na akwa nyarmbwa kuthli ku si ka mji kuma ka tsi Gedaliya ata kəma duku kəga mjir Yahuda ka mjir Babila na adzə ni ahar Mizpa.

²⁶Antə shanga mji na raka raka, ka mji na ol'ola, ka mji ol'ola ar sojayeri ku hwi ka təra mwari ahar Masar kamnyar tə da akwa thlivər mjir Babila.

²⁷Akwa vira thliya sərkumari ka murfa ar thliya na kumnya suɗa akwa məva na makkumari ka murfəkur tə mdə ku mbwi Yehoyacin na kuthlir Yahuda, antə Evilmerodak ku baɗitə hara kuthlikur ata kəra Babila. Tsa ku hara mdəkur ka msərantə Yehoyacin akwa pərsəna akwa məva tə tsa ku ləkwa kuthlikur.

²⁸Antə tsa ku hara gari na msəra, ka na alari vəi ndzəndziyir olkur na təramta ar shanga kuthlyayeri na ata vəi duku ka tsa ahar Babila.

²⁹Antə Yehoyacin ku ntsumta ləptər pərsəna ni. Antə kəlara viri tsa ana səm susəma ata tebər kuthli har kurər mpikari.

³⁰Kuthli ni ana na alari kwabar shamta tədək viri, har kurər mpikari.